រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃទី១៧ ខែកុម្ភៈ ឆ្នាំ២០២០ បានលើកយកសំណុំរឿងស្ត្រីប្រើសាហាយឲ្យតាមបាញ់សម្លាប់បុរសជាប្តីមកបើកសវនាការជំនុំជម្រះទោស ដែលសំណុំរឿងនេះត្រូវបានតំណាងអយ្យការចោទប្រកាន់ពីបទ«ឃាតកម្មគិតទុកជាមុន» ។ ស្ត្រីជាប់ចោទឈ្មោះ ឃឿន…
រាជធានីភ្នំពេញ ៖ សាលាដំបូងរាជធានីភ្នំពេញកាលពីព្រឹកថ្ងៃទី១៧ ខែកុម្ភៈ ឆ្នាំ២០២០ បានលើកយកសំណុំរឿងស្ត្រីប្រើសាហាយឲ្យតាមបាញ់សម្លាប់បុរសជាប្តីមកបើកសវនាការជំនុំជម្រះទោស ដែលសំណុំរឿងនេះត្រូវបានតំណាងអយ្យការចោទប្រកាន់ពីបទ«ឃាតកម្មគិតទុកជាមុន» ។ ស្ត្រីជាប់ចោទឈ្មោះ ឃឿន ស៊ី ហ៊ន ហៅ ស៊ី ហ៊ន អាយុ២៦ឆ្នាំ គ្មានមុខរបរពិតប្រាកដ ស្នាក់នៅជាមួយប្តី ភូមិសែនសុខ៥ សង្កាត់ឃ្មួញ ខណ្ឌសែនសុខ រាជធានីភ្នំពេញ ។
ប្រធានក្រុមប្រឹក្សាជំនុំជម្រះគឺលោក ឃុន សុខណា និងតំណាងអយ្យការគឺលោក ខៀវ ផល្លា ព្រះរាជអាជ្ញាររង ក្រោយបញ្ចប់ការសាកសួរដេញដោលប្រធានក្រុមប្រឹក្សាបានសម្រេចលើកពេលប្រកាសសាលក្រមផ្តន្ទាទោសលើជនជាប់ចោទទៅថ្ងៃទី៦ ខែមីនា ឆ្នាំ២០២០ ខាងមុខវិញ ។
សូមរំលឹកថា កាលពីល្ងាចថ្ងៃទី២ ខែកញ្ញា ឆ្នាំ២០១៩ លោកស្រី ម៉ាក់ នី តំណាងអយ្យការសាលាដំបូងរាជធានីភ្នំពេញ បានបញ្ចប់ការសាកសួរលើជនសង្ស័យគឺស្ត្រីម្នាក់ដែលបានប្រើប្រុសសាហាយឲ្យតាមបាញ់សម្លាប់ប្តីជាគ្រូបង្រៀន និងបានចោទប្រកាន់ជាផ្លូវការហើយក្រោមបទ«ផ្តើមគំនិតក្នុងអំពើឃាតកម្ម» តាមមាត្រា២៨ និងមាត្រា២០០ នៃក្រមព្រហ្មទណ្ឌ ។ ជនរងគ្រោះត្រូវបានខ្មាន់កាំភ្លើងបាញ់ប្រហារបណ្តាលឲ្យស្លាប់កាលពីពាក់កណ្តាលអធ្រាត្រយប់ថ្ងៃទី២៧ ខែសីហា ឆ្នាំ២០១៩ នៅចំណុចភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ ខណៈជនរងគ្រោះកំពុងជិះម៉ូតូម្នាក់ឯង ។
ក្នុងពេលនោះគេបានឃើញស្ត្រីជាភរិយាដែលជាជនសង្ស័យបានទៅអោបសពប្តីទ្រហោយំ ហាក់បីដូចធ្វើជាមិនដឹងរឿងអ្វីទាំងអស់តែទីបំផុតនាងជាឃាតករប្រើសាហាយឲ្យបាញ់សម្លាប់ប្តីខ្លួនឯង ។ ក្រោយកើតមានអំពើឃាតកម្មនោះសមត្តកិច្ចនគរបាលបានបើកការស៊ើបអង្កេត និងស្រាវជ្រាវជាបន្ទាន់ទើបនៅល្ងាចថ្ងៃទី២៩ ខែសីហា បានរកឃើញ និងកំណត់មុខសញ្ញាជនជាឃាតករគឺនាង ឃឿន ស៊ីហ៊ន ជាភរិយាជនរងគ្រោះ ដូច្នោះទើបបានសមត្ថកិច្ចសម្រេចចិត្តធ្វើការឃាត់ខ្លួនជនសង្ស័យតែម្តងទៅ ។ ទីបំផុតជនសង្ស័យបានសារភាពថា នាងជាអ្នករៀបចំផែនការបាញ់សម្លាប់ប្តីរបស់ខ្លួនឯងមែនដោយសារជនរងគ្រោះជាប្តីរស់នៅមិនចុះសម្រុងគ្នាទើបនាងសម្រេចចិត្តយ៉ាងដូច្នេះ ៕
កែសម្រួលដោយ ៖ សំណាង
ចែករំលែកព័តមាននេះ