ខេត្តកណ្ដាល ៖ ផ្ទះមួយខ្នងសង់អំពីថ្មក្រោម ឈើលើ ដំបូលប្រក់ក្បឿង មានទំហំបណ្តោយ១៦ម៉ែត្រនិងទទឹង៦,២០ម៉ែត្រ ត្រូវអគ្គិភ័យឆាបឆេះបណ្តាលឱ្យផ្ទះជាន់លើខូចខាតអស់ទាំងស្រុង ចំណែកផ្ទះជាន់ក្រោមត្រូវភ្លើងឆេះរោលខ្លាំងមិនអាចប្រើប្រាស់ទៀតបានទេ រីឯទ្រព្យសម្បត្តិមួយចំនួនទៀតក៏ត្រូវភ្លើងឆេះអស់ផងដែរ ។…
ខេត្តកណ្ដាល ៖ ផ្ទះមួយខ្នងសង់អំពីថ្មក្រោម ឈើលើ ដំបូលប្រក់ក្បឿង មានទំហំបណ្តោយ១៦ម៉ែត្រនិងទទឹង៦,២០ម៉ែត្រ ត្រូវអគ្គិភ័យឆាបឆេះបណ្តាលឱ្យផ្ទះជាន់លើខូចខាតអស់ទាំងស្រុង ចំណែកផ្ទះជាន់ក្រោមត្រូវភ្លើងឆេះរោលខ្លាំងមិនអាចប្រើប្រាស់ទៀតបានទេ រីឯទ្រព្យសម្បត្តិមួយចំនួនទៀតក៏ត្រូវភ្លើងឆេះអស់ផងដែរ ។ ពាក់ព័ន្ធនឹងករណីនេះត្រូវបានគេសង្ស័យថា បណ្តាលមកពីទុស្សេខ្សែភ្លើងនៅផ្ទះឈើជាន់លើ ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង១រសៀលថ្ងៃទី៨ ខែកុម្ភៈ ឆ្នា២០២០ នៅចំណុចផ្ទះមួយកន្លែង ស្ថិតក្នុងភូមិខ្សាច់អរិយក្សត្រ ឃុំអរិយក្សត្រ ស្រុកល្វាឯម ។
ម្ចាស់ផ្ទះកើតហេតុខាងលើឈ្មោះ នៅ សារ៉ន ភេទស្រី អាយុ៤៥ឆ្នាំ មានទីលំនៅក្នុងភូមិឃុំកើតហេតុខាងលើ ។
តាមប្រភពព័ត៌មានបានឱ្យដឹងថា មុនពេលកើតហេតុ ដោយសារទុស្សេខ្សែភ្លើងនៅលើផ្ទះឈើជាន់ខាងលើ ហើយម្ចាស់នៅផ្ទះជាន់ខាងក្រោមមិនបានដឹងជាមុនថាមានភ្លើងឆេះឡើយ លុះពេលមានអណ្តាតភ្លើងឆេះខ្លាំង ទើបម្ចាស់ផ្ទះដឹង ហើយបង្កការភ្ញាក់ផ្អើលដល់ប្រជាពលរដ្ឋនៅជិតខាងចេញមកជួយពន្លត់ និងបានរាយការណ៍ទៅសមត្ថកិច្ច។
តាមប្រភពព័ត៌មានបានឱ្យដឹងទៀតថា ក្នុងហេតុការណ៍ខាងលើ កម្លាំងនៃអធិការដ្ឋាននគរបាលបានប្រើប្រាស់រថយន្តពន្លត់អគ្គីភ័យរបស់អធិការដ្ឋាននគរបាលស្រុកល្វាឯម ២គ្រឿង ដោយប្រើប្រាស់ទឹកអស់ចំនួន៦រថយន្ត និងរថយន្តពន្លត់អគ្គិភ័យរបស់ស្រុកខ្សាច់កណ្តាលមួយគ្រឿង ដោយប្រើទឹកអស់មួយរថយន្ត។
តាមប្រភពព័ត៌មានបានឱ្យដឹងទៀតថា អគ្គីភ័យខាងលើបានរលត់ទៅវិញនៅវេលាម៉ោង២និង១០នាទីរសៀលថ្ងៃដដែល។ ក្នុងហេតុការណ៍ខាងលើបណ្តាលឱ្យផ្ទះឈើជាន់ខាងឈើត្រូវភ្លើងឆេះអស់ទាំងស្រុង ចំណែកផ្ទះថ្មជាន់ខាងក្រោមត្រូវភ្លើងឆេះរោលខ្លាំង មិនប្រើប្រាស់ទៀតបានទេ ។ រីឯទ្រព្យសម្បត្តិក្នុងផ្ទះរួមមានប្រាក់ចំនួន៣ពាន់ដុល្លារ និងប្រាក់១លានរៀលត្រូវភ្លើងឆេះអស់ទាំងស្រុង ប៉ុន្តែមិនបណ្ដាលឱ្យមនុស្សណាម្នាក់រងគ្រោះថ្នាក់នោះទេ ។
ក្នុងសកម្មភាពពន្លត់អគ្គីភ័យខាងលើ ដឹកនាំកម្លាំងដោយលោក យី យ៉េន អភិបាលរងស្រុក និងលោកវរសេនីយ៍ឯក ហេង សុផល អធិការនគរបាលស្រុកល្វាឯម និងកម្លាំងសមត្ថកិច្ចចូលរួមសរុប១៨នាក់ ៕ (កែសម្រួលដោយ ៖ ធីតា)
ចែករំលែកព័តមាននេះ