ឃាត់ខ្លួន​មនុស្ស​៥​នាក់​សង្ស័យ​ធ្វើ​សកម្មភាព​រាវរក និង​គាស់​យក​វត្ថុ​បុរាណ​មាន​អាយុកាល​រាប់​ពាន់​ឆ្នាំ


ខេត្តព្រះវិហារ ៖ ជនសង្ស័យ​ជា​មេ​ក្លោ​ង និង​បក្សពួក​៥​នាក់ ជួញដូរ​វត្ថុ​បុរាណ​ល្មើសច្បាប់ ត្រូវ​បាន​មន្ត្រី​នៃ​មន្ទីរ​វប្បធម៌ និង​វិចិត្រសិល្បៈ​ខេត្ត​សហ​ការណ៍​ជាមួយ​កម្លាំង​កងរាជអាវុធហត្ថ​ខេត្តព្រះវិហារ​ចុះ​បង្ក្រាប និង​ឃាត់ខ្លួន​បាន ព្រមទាំង​ដកហូត​វត្ថុ​តាង​បទល្មើស​មួយ​ចំនួន​បញ្ជូន​មក​អនុវត្ត​តាម​ផ្លូវច្បាប់ ។ នេះ បើ​យោង​តាម​ព័ត៌មាន​ពី​ហ្វេ​ស​ប៊ុ​ក​ផ្លូវការ​របស់​រដ្ឋមន្ត្រីក្រសួង​ព័ត៌មាន​លោក ខៀវ កញ្ញា​រី​ទ្ធ ។

ប្រតិបត្តិការ​នេះ​បាន​ធ្វើ​ឡើង កាលពី​ថ្ងៃ​ទី​០៤ កុម្ភៈ​នេះ នៅ​ចំណុច​ប្រាសាទខ្នារ ស្ថិត​ក្នុងភូមិ​ក្រឡាពាស ឃុំ​ព្រីង​ធំ ស្រុក​ជាំ​ក្សាន្ត ដឹកនាំ​បញ្ជាការ​បង្ក្រាប ដោយ​មេបញ្ជាការ​រង​កងរាជអាវុធហត្ថ​ខេត្ត លោក ឆេ​ង ហៀ​ត និង​មន្ត្រី​អាវុធហត្ថ​ខេត្ត ១៥​នាក់ ។

មន្ត្រី​អាវុធហត្ថ​ខេត្ត​បាន​ប្រាប់​ឲ្យ​ដឹង​ថា នៅ​ថ្ងៃ​០៤ កុម្ភៈ ក្រោយ​ពី​ទទួល​បាន​ដំណឹង​ថា មាន​ជនខិលខូច​មួយ​ក្រុម​បាន និង​កំពុង​ធ្វើ​សកម្មភាព​ប្រើ​ឧបករណ៍​រាវរក​វត្ថុ​បុរាណ​ដែល​កប់​ជ្រៅ​នៅ​ក្នុង​ដី​រាប់​ពាន់​ឆ្នាំ​មក​ហើយ​នោះ ដើម្បី​ជីក​គាស់កកាយ​យក​វត្ថុ​បុរាណ​នាំ​យក​ទៅ​ធ្វើការ​ជួញដូរ​ដោយ​ខុសច្បាប់​នោះ​មក​ប្រធាន​មន្ទីរ​វប្បធម៌ និង​វិចិត្រសិល្បៈ​ខេត្ត រួម​ជាមួយ​មន្ត្រី និង​មន្ត្រី​កិច្ចសន្យា​ខេត្ត​បាន​សហ​ការណ៍​ជាមួយ​កម្លាំង​កងរាជអាវុធហត្ថ​ខេត្ត ចុះ​ទៅ​កាន់​ទីតាំង​ដែល​ជនសង្ស័យ​កំពុង​ប្រព្រឹត្ត​បទល្មើស ។

មន្ត្រី​ដដែល​បាន​បន្ត​ទៀត​ថា នៅ​ក្នុង​ប្រតិបត្តិ​ការណ៍​នោះ​កម្លាំង​សមត្ថកិច្ច​បាន​ឈាន​ទៅ​ឃាត់ខ្លួន​ជនសង្ស័យ​ជា​មេ​ក្លោ​ង និង​បក្សពួក​ជួញដូរ​វត្ថុ​បុរាណ​បាន​៥​នាក់ ១.​ឈ្មោះ ហេង ប៊ុ​ន​សុ​ខុន ភេទ​ប្រុស អាយុ​៣៧​ឆ្នាំ រស់នៅ​ភូមិ​តា​វៀន ឃុំ​សាលា​កំរើក ក្រុង​សៀមរាប ជា​ថៅកែ​ដកហូត​បាន​វត្ថុ​តាង​រូប​លោហៈ ២. ឈ្មោះ ប៊ុ​ន សាន ភេទ​ប្រុស អាយុ​៤៥​ឆ្នាំ ជា​មេ​ប៉ុស្តិ៍​នគរបាល​រដ្ឋបាល​ឃុំ​ព្រីង​ធំ ៣.​ឈ្មោះ សៀ​ក សុ​ភ័​ក្រ ភេទ​ប្រុស អាយុ​៥៤​ឆ្នាំ ៤. ឈ្មោះ ង៉ែត តៃ ភេទ​ប្រុស អាយុ​៥៤​ឆ្នាំ និង​៥. ឈ្មោះ ព្រ​លាន ព្លឿ​ង ភេទ​ប្រុស អាយុ​៥៤​ឆ្នាំ ជនសង្ស័យ​ទាំង​៣​នាក់ ជា​កសិករ​រស់នៅ​ភូមិ​គោក​ព្រិច ឃុំ​គោក​រមៀត ស្រុក​ពួក ខេត្តបន្ទាយមានជ័យ ។

លោក​បាន​បញ្ជាក់​ថា ក្រោយ​ការ​ឃាត់ខ្លួន​ជនសង្ស័យ​ទាំង​៥​នាក់​រួច​ហើយ សមត្ថកិច្ច​ដកហូត​បាន​ឧបករណ៍​រាវរក​វត្ថុ​បុរាណ​២​គ្រឿង នៅ​ខាងត្បូង​ប្រាសាទខ្នារ​ប្រមាណ ១០០​ម៉ែត្រ ដកហូត​រថយន្ត ដែល​ជា​មធ្យោបាយ​បម្រើ​ឲ្យ​ការ​ធ្វើ​សកម្មភាព​ប្រព្រឹត្ត​បទល្មើស ចំនួន​២​គ្រឿង ថែម​ទៀត ។

ក្រោយ​ការ​ឃាត់ខ្លួន​ជនសង្ស័យ​ជួញដូរ​វត្ថុ​បុរាណ​ទាំង​៥​នាក់ រួម​ទាំង​វត្ថុ​តាង​នោះ​រួច ប្រធាន​មន្ទីរ​វប្បធម៌ និង​វិចិត្រសិល្បៈ​ខេត្តព្រះវិហារ​បាន​ធ្វើ​កំណត់ហេតុ​ផ្ទេរ​ប្រគល់​ជនសង្ស័យ និង​វត្ថុ​តាង​ទៅ​អោយ​កម្លាំង​កងរាជអាវុធហត្ថ​ខេត្ត ដើម្បី​កសាង​សំណុំរឿង បញ្ជូន​ទៅ​កាន់​តុលាការខេត្ត​ចាត់ការ​ទៅ​តាម​នីតិវិធី​ច្បាប់ ៕

ព័ត៌មាន​ជាតិ

Sponsored News

ការស្ទង់មតិគេហទំព័រថ្មី




សូម​អរគុណ