ខេត្តក្រចេះ ៖ ក្រុមមន្ត្រីសាខាកាំកុងត្រូលខេត្តក្រចេះបានឱ្យដឹងថា មន្ត្រីជំនាញបានចុះពិនិត្យលើមុខទំនិញ ចំណីអារហារតាមទីផ្សារក្នុងតំបន់ជាប់និងព្រំដែន ដែលជាតំបន់សម្បូរទៅដោយទំនិញនាំចូលពីប្រទេសវៀតណាម (ព្រំដែនវៀតណាម) ក្នុងគោលបំណងលើកកំពស់សុវត្ថិភាពចំណីអារហារដល់អ្នកទទួលទានក្នុងឱកាសពិធីបុណ្យចូលឆ្នាំថ្មីប្រពៃណីចិន និងវៀតណាម ។
អនុប្រធានសាខាកាំកុងត្រូលខេត្ត លោក យាង បាក បានថ្លែងថា ក្រុមមន្ត្រីរបស់លោក បានសហការជាមួយមន្ទីរពាណិជ្ជកម្មខេត្ត បានបង្កើនសកម្មភាពពេញមួយថ្ងៃទី២១ ខែមករា ក្នុងការចុះត្រួតពិនិត្យមើលលើគ្រប់មុខទំនិញ ដែលកំពុងតែដាក់លក់នៅតាមតូបផ្សារនិងផ្ទះផ្សារជាច្រើនកន្លែងនៅផ្សារកាបី ក្នុងឃុំ
ក្រញូងសែនជ័យ ស្រុកស្នួល ក៏ដូចជានៅតាមបណ្តាផ្សារនានាផ្សេងទៀត នៅក្នុងស្រុកស្នួល ខេត្តក្រចេះ។
លោកបន្តថា ក្នុងសកម្មភាពនាព្រឹកនោះ ក្រុមមន្ត្រីជំនាញបានពិនិត្យលើគ្រឿងឧភោគ បរិភោគប្រចាំថ្ងៃមួយចំនួន ដែលកន្លងមកតែងតែរកឃើញមានសារធាតុគីមីនោះ តែការពិនិត្យគឺរកមិនឃើញមានសារធាតុមិនប្រក្រតីទៀតនោះទេ ។ បើទោះជាបែបណា មានទឹកភេសជ្ជៈនិងគ្រឿងឧបភោគមួយចំនួនដែលកំពុងតែដាក់លក់ ត្រូវបានក្រុមការងារពិនិត្យឃើញហួសសុពលភាពប្រើប្រាស់ និងត្រូវបានរឹបអូសយកមកបំផ្លាញចោល។
លោកថា ដើម្បីធានាសុខភាពពលរដ្ឋជាអ្នកទទួលទាន និងដើម្បីធានាលើមុខម្ហូប គ្មានសារធាតុគីមី គឺមន្ត្រីជំនាញសាខាកាំកុងត្រូល តែងតែចុះពិនិត្យនៅតាមផ្សារមួយចំនួនជាប់ជាប្រចាំ។ ក្រៅពីនោះមន្ត្រីជំនាញ ក៏បានចែកជូនផ្ទាំងរូបភាពផ្សព្វផ្សាយអប់រំសុខភាពសុវត្ថិភាព ចំណីអាហារ មុខទំទិញដែលហាមឃាត់ ហួសកាលបរិច្ឆេត ដូចជាលក្ខណះការវេចខ្ចប់ និងផ្សព្វផ្សាយ ជួនដល់មហាជន ពីវិធីជ្រើសរើសមុខទំនិញគ្រឿងបរិភោគមុននិងទិញមកប្រើប្រាស់។
ចែករំលែកព័តមាននេះ