ចិន៖ តាមប្រភពព័ត៌មាន South China Morning Post បានឱ្យដឹងថា ក្រុមហ៊ុនបច្ចេកវិទ្យា Huawei ដែលបច្ចុប្បន្នជាក្រុមហ៊ុនផលិតស្មាតហ្វូនធំជាងគេបំផុតនៅលើពិភពលោក បាននិយាយថា ខ្លួនកំពុងត្រៀមផ្លាស់ប្តូរពីប្រព័ន្ធប្រតិបត្តិការ Android ដែលត្រូវបានគេប្រើយ៉ាងទូលំទូលាយរបស់ Google ទៅជាប្រព័ន្ធប្រតិបត្តិការផ្ទាល់ខ្លួនដែលឈ្មោះថា Harmony នៅក្នុងជំហានដ៏សំខាន់មួយ ខណៈដែលខ្លួនព្យាយាមរក្សាស្មាតហ្វូនរបស់ខ្លួនឱ្យមានការប្រកួតប្រជែង ជាលទ្ធផលនៃការដាក់ទណ្ឌកម្មរបស់សហរដ្ឋអាមេរិកដែលមាន។

លោក Richard Yu Chengdong ប្រធានផ្នែកអាជីវកម្មអតិថិជនរបស់ក្រុមហ៊ុន ដែលមានមូលដ្ឋាននៅទីក្រុង Shenzhen បាននិយាយនៅក្នុងសន្និសីទអ្នកអភិវឌ្ឍន៍របស់ខ្លួនកាលពីថ្ងៃព្រហស្បតិ៍ថា កម្មវិធី Harmony OS ដែលជាកម្មសិទ្ធិរបស់ក្រុមហ៊ុន Huawei នឹងត្រូវបានតំឡើងនៅលើស្មាតហ្វូនទាំងអស់របស់ខ្លួននៅឆ្នាំក្រោយ។

លោក Yu បានមានប្រសាសន៍ថា «ជំនាន់ចុងក្រោយនៃ Harmony OS ត្រូវបានបើកជាផ្លូវការសម្រាប់អ្នកអភិវឌ្ឍន៍ទូទាំងពិភពលោក »។ លោកបានបន្ថែមថា ក្រុមហ៊ុន Huawei កំពុងបង្កើនល្បឿនបង្កើតប្រព័ន្ធអេកូឡូស៊ីកម្មវិធី នៅជុំវិញប្រព័ន្ធប្រតិបត្តិការនេះ។ ប្រព័ន្ធសេវាកម្មទូរស័ព្ទចល័ត Huawei ឥឡូវនេះ មានអ្នកអភិវឌ្ឍន៍កម្មវិធី ១.៨លាននាក់ និងអ្នកប្រើប្រាស់សកម្ម ៤៩០លាននាក់ ក៏ដូចជា ៩៦,០០០កម្មវិធីផងដែរ។

ពិភពបច្ចេកវិទ្យាកំពុងសំឡឹងមើលសន្និសីទអ្នកអភិវឌ្ឍន៍របស់ក្រុមហ៊ុន Huawei ដែលកើតឡើងនៅទីក្រុងដុងហ្គួនភាគខាងត្បូងប្រទេសចិន ដើម្បីមើលផែនការអាជីវកម្មនាពេលអនាគតរបស់ក្រុមហ៊ុនចំពេលមានការហាមឃាត់របស់សហរដ្ឋអាមេរិក ដែលគម្រាមកាត់ផ្តាច់ការទទួលបានអ្វីៗគ្រប់យ៉ាងពីបន្ទះឈីប ដែលផ្តល់ថាមពលដល់ស្មាតហ្វូនរបស់ខ្លួននិងស្ថានីយ៍មូលដ្ឋាន 5G សំរាប់ប្រព័ន្ធ Android ដែលពេញនិយមទូទាំងពិភពលោក

ប្រព័ន្ធប្រតិបត្តិការ Android ជាប្រព័ន្ធប្រតិបត្តិការរបស់ស្មាតហ្វូនរាប់លានគ្រឿង ដែលក្រុមហ៊ុនដែលមានមូលដ្ឋាននៅទីក្រុងសិនជិន ដូច្នេះ Harmony OSមានសារៈសំខាន់ណាស់សម្រាប់អនាគតរបស់អតិថិជន។ ក្រុមហ៊ុន Huawei បានអះអាងថា ទទួលបានចំណាត់ថ្នាក់លេខ ១ ទូទាំងពិភពលោកលើស្មាតហ្វូននៅក្នុងត្រីមាសទី២ ដោយបានធ្វើអោយ Samsung ធ្លាក់ចុះមកនៅលំដាប់ទី ២ ។

ទោះយ៉ាងណាអ្នកវិភាគមួយចំនួន មានការងឿងឆ្ងល់អំពីសមត្ថភាពរបស់ Harmony ក្នុងការជំនួសប្រព័ន្ធប្រតិបត្តិការ Android ជាពិសេសនៅក្នុងទីផ្សារបរទេស ដែលអ្នកប្រើប្រាស់ជាច្រើនបានយកកម្មវិធីរបស់ Google ដូចជា YouTube និង Gmail៕