តារាសម្តែង និងពិធីការិនី ព្រះ កាយច័ន្ទ បានតាំងចិត្តថា នាងនឹងមិនធ្វើរឿងមួយ ក្នុងករណីដែលនាងមិនបានជាប់ទៅប្រកួតកម្មវិធី «Miss Grand International» ខណៈពេលដែលកម្មវិធីនេះ គឺជាការដាក់ពាក្យប្រឡងលើកដំបូងសម្រាប់តារារូបនេះ
រាជធានីភ្នំពេញ ៖ តារាសម្តែង និងពិធីការិនី ព្រះ កាយច័ន្ទ បានតាំងចិត្តថា នាងនឹងមិនធ្វើរឿងមួយ ក្នុងករណីដែលនាងមិនបានជាប់ទៅប្រកួតកម្មវិធី «Miss Grand International» ខណៈពេលដែលកម្មវិធីនេះ គឺជាការដាក់ពាក្យប្រឡងលើកដំបូងសម្រាប់តារារូបនេះ ក្នុងវិស័យបវរកញ្ញា ។
សម្រាប់រឿងដែលនាងនឹងមិនធ្វើនោះ គឺនាងមិនដាក់ពាក្យទៅប្រកួតកម្មវិធីផ្សេងៗបន្តទៀតឡើយ ប្រសិនបើនាងមិនបានជាប់ទៅប្រកួត «Miss Grand International» ខណៈពេលនោះដែរ នាងក៏បានធ្វើការសន្យាថា នាងនឹងមិនធ្វើឲ្យអ្នកគាំទ្រអស់សង្ឃឹមមកលើរូបនាងសម្រាប់ការប្រកួតមួយនេះឡើយ ។
ស្រីស្រស់ ព្រះ កាយច័ន្ទ បានបង្ហោះសារនៅលើបណ្តាញសង្គមថា «នាងខ្ញុំដាក់ពាក្យប្រកួត Miss Grand Cambodia ចឹងបើនាងខ្ញុំមិនបានជាប់ទៅប្រកួតនៅ Miss Grand International ទេ នាងខ្ញុំសុំមិនទៅប្រកួតក្នុងកម្មវិធីផ្សេងនោះទេ អរគុណដែលបងប្អូនគ្រាំទ្រ ខ្ញុំនឹងមិនធ្វើឲ្យបងប្អូនអស់សង្ឃឹមឡើយ ខ្ញុំនឹងព្យាយាមបន្ថែម ដើម្បីកម្ពុជា»។
ជាការកត់សម្គាល់ ទស្សនិកជនដែលជាអ្នកលេងបណ្តាញសង្គម បាននាំគ្នាសម្តែងការភ្ញាក់ផ្អើលយ៉ាងខ្លាំង ក្នុងពេលដែលស្ងាត់ៗ ស្រាប់តែគេឃើញតារាសម្តែងនាង ព្រះ កាយច័ន្ទ លេចវត្តមានចូលរួមប្រឡងក្នុងកម្មវិធី «Miss Grand Cambodia 2024» តំបន់ភ្នំពេញ ក្នុងពេលដែលបេក្ខភាពរបស់នាងកំពុងស្ថិតក្នុងវគ្គជម្រុះជុំដំបូង ។
បើយោងតាមការបង្ហោះពីផេក «Miss Grand Phnom Penh» បានបញ្ជាក់ប្រាប់ឱ្យថា «បេក្ខភាពស្ថិតក្នុងវគ្គជំរុះជុំទី១ Miss Grand Phnom Penh 2024 កញ្ញា «ព្រះ កាយច័ន្ទ» អាយុ : ២៨ឆ្នាំ សញ្ជាតិ : ខ្មែរ កម្ពស់ : 1.73m ទំហំទាំង៣ (28 34 36) ការសិក្សា : បញ្ចប់ថ្នាក់សិក្សាទុតិយភូមិ កំរិតភាសា : ខ្មែរ អង់គ្លេស ថៃ ការងារបន្ថែម : តារាសម្តែង តារាចម្រៀង គ្រូបង្ហាត់ម៉ូឌែល និងនារីរបាំបុរាណ»។
សម្រាប់ការការចូលរួមប្រកួត «Miss Grand Cambodia 2024» នាពេលនេះ គឺជាក្តីស្រមៃធំដែលនាងធ្លាប់បានសន្យាជាមួយឪពុកនាងកាលពីនៅរស់ ហើយមិនថា លទ្ធផលបែបណា ព្រះ កាយច័ន្ទ ប្តេជ្ញាចិត្តធ្វើឱ្យបានល្អបំផុត ។ នៅក្នុងកម្មវិធីបំពាក់ឆៀង Miss Grand Phnom « ព្រះ កាយច័ន្ទ» បានសម្ដែងនូវការរំភើបចិត្តយ៉ាងខ្លាំង ក្រោយពីនាងបានចូលរួមកម្មវិធីដ៏ធំមួយនេះ ខណៈពេលដែលនាងបានដាក់ការសង្ឃឹមច្រើនក្នុងការទទួលជ័យជំនះ ដើម្បីបន្តទៅប្រកួតនៅលើឆាកអន្តរជាតិ ក៏ព្រោះតែនាងជឿជាក់ទៅលើសមត្ថភាពរបស់ខ្លួននាងផ្ទាល់៕
ចែករំលែកព័តមាននេះ