អតីតតារាសម្តែង និងអ្នកដឹកនាំរឿងលោកជុំ វណ្ណសន ទទួលមរណភាពក្នុងវ័យ71ឆ្នាំ
រាជធានីភ្នំពេញ ៖ អតីតតារាសម្តែង និងជាអ្នកដឹកនាំរឿងជើងចាស់លោកជុំ វណ្ណសន ហៅហាក់ ហាន បានទទួលមរណភាពកាលពីព្រឹកថ្ងៃទី១៨ ខែកុម្ភៈ ឆ្នាំ២០១៥ ដោយរោគារពាធ
រាជធានីភ្នំពេញ ៖ អតីតតារាសម្តែង និងជាអ្នកដឹកនាំរឿងជើងចាស់លោកជុំ វណ្ណសន ហៅហាក់ ហាន បានទទួលមរណភាពកាលពីព្រឹកថ្ងៃទី១៨ ខែកុម្ភៈ ឆ្នាំ២០១៥ ដោយរោគារពាធ ក្នុងអាយុ៧១ឆ្នាំ ។
សពរបស់លោកជុំ វណ្ណសន ត្រូវក្រុមគ្រួសារតម្កល់ធ្វើបុណ្យនៅផ្ទះលេខ៣៣Eo សង្កាត់ជ័យជំនះ ខណ្ឌដូនពេញ រាជធានីភ្នំពេញហើយបើតាមការគ្រោងទុកសពនឹងត្រូវគ្រួសារដង្ហែយកទៅបញ្ចុះនៅដីឡូត៍មួយនាខេត្តកំពង់ស្ពឺ នៅថ្ងៃអាទិត្យ ទី២២ ខែកុម្ភៈ ឆ្នាំ២០១៥ ។
លោកសុវណ្ណ ភក្តី ជាកូនប្រុសរបស់លោកជុំ វណ្ណសន ប្រាប់កោះសន្តិភាពតាមទូរស័ព្ទថា លោកជុំ វណ្ណសនធ្លាក់ខ្លួនឈឺដោយសារជំងឺជាច្រើនមុខជាច្រើនឆ្នាំមកហើយ ប៉ុន្តែអាការជំងឺធ្លាក់ក្នុងដំណាក់កាលធ្ងន់ត្រឹមតែមួយរយៈខ្លីចុងក្រោយនេះ។ លោកជុំ វណ្ណសន ឈឺធ្ងន់ បន្ទាប់ពីត្រឡប់មកពីព្យាបាលនៅប្រទេសចិនរយៈពេលជាង១ខែ ហើយមុនទទួលមរណភាពលោកបានក្អកធ្លាក់ឈាម ហើយក្រុមគ្រួសារបានបញ្ជូនគៅព្យាបាលនៅមន្ទីរពេទ្យកាលម៉ែត ។
ដោយសារតែមានជំងឺជាច្រើនមុខបូករួមទាំងមានជំងឺក្រពះ និងពោះវៀនធ្ងន់មិនអាចទទួលទានអ្វីបានផងនោះ លោកជុំ វណ្ណសន ទទួលមរណនៅថ្ងៃទី១៨ ខែកុម្ភៈ ឆ្នាំ២០១៥ ។
បើតាមការបញ្ជាក់ពីលោកសុវណ្ណ ភក្តី អំឡុងពេលឪពុករបស់លោកប្រឡូកក្នុងវិស័យសិល្បៈ គឺបានទទួលប័ណ្ណសរសើរ និងមេដាយជាបន្តបន្ទាប់ពីព្រះមហាវីរក្សត្រ និងពីក្របខណ្ឌក្រសួងវប្បធម៌ និងវិចិត្រសិល្បៈ ដោយសារតែឪពុករបស់លោកបានចូលប្រឡូកក្នុងវិស័យនេះតាំងពីឆ្នាំ១៩៨៣មកម្លេ៉ះ ។
មានខ្សែភាពយន្តជាច្រើនរឿងដែលឪពុករបស់លោកភក្តីបានចូលរួមសម្តែង ប៉ុន្តែចាំមិនអស់ឡើយ គឺនៅចាំខ្លះៗប៉ុណ្ណោះដូចជា រឿង «ចិត្តចងចាំ» រឿង«យំមួយពាន់ដង» «នរក៩ជាន់» រឿង «ព្រះបាទលំពង្សរាជា»(តួស្តេច) និងចូលរួមសម្តែងក្នុងខ្សែភាពយន្តជាបន្តបន្ទាប់ថ្វាយព្រះមហាវីរក្សត្រនរោត្តម សីហនុ ។
អ្នកនិយមទស្សនាខ្សែភាពយន្តខ្មែរនាអំឡុងទសវត្សឆ្នាំ៨០ និង៩០ ប្រាកដជាបានស្គាល់យ៉ាងច្បាស់តារាសម្តែងលោកជុំ វណ្ណសន ដែលច្រើនដើរតួជាឪពុក ។ វត្តមានសម្តែងរបស់លោកវណ្ណសន នៅតែមានបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ តួយ៉ាងដូចជា សម្តែងជាតួអង្គស្តេចក្នុងរឿង «ព្រះបាទលំពង្សរាជា» ជាដើម ហើយលោកក៏ជាគ្រូបង្ហាត់សម្តែងដល់អ្នកជំនាន់ក្រោយផងដែរ ។
លោកជុំ វណ្ណសន មានស្រុកកំណើតនៅស្រុកស្រីសន្ធរ ខេត្តកំពង់ចាម និងមានកូន៩នាក់ ក្នុងនោះកូនស្រីម្នាក់របស់លោកជាអ្នករបាំបុរាណ ៕
ចែករំលែកព័តមាននេះ