ខេត្តព្រះសីហនុ ៖ យុវជនញៀនថ្នាំម្នាក់បានធ្វើសកម្មភាពសម្រុកចូលក្នុងផ្ទះសំណាក់ឌីឌីម៉ាត២ ដែលមានទីតាំងស្ថិតនៅក្នុងក្រុមទី៥ ភូមិ៣ សង្កាត់លេខ២ ក្រុងព្រះសីហនុ ដោយដុតបំផ្លាញបន្ទប់ផ្ទះសំណាក់ឆេះអស់២បន្ទប់ បង្កឱ្យមានការភ្ញាក់ផ្អើលកាលពីវេលាម៉ោង៤ និង៣០នាទីទៀបភ្លឺ ថ្ងៃទី ១៥ ធ្នូ ២០១៣ ។
តាមការឱ្យដឹងពីលោកភុល ភ័ស្តា អធិការនគរបាលក្រុងព្រះសីហនុបានឱ្យដឹងថា ជនសង្ស័យឈ្មោះថន ចំរើន ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅភូមិនាងកុក ឃុំបាក់ខ្លង ស្រុកមណ្ឌលសីម៉ា ខេត្តកោះកុង បានធ្វើសកម្មភាពសម្រុកចូលទៅដុតបន្ទប់ស្នាក់នៅលេខ៣០៨ និង៣០៩ របស់ផ្ទះសំណាក់ឌីឌីម៉ាត២ ដែលមានម្ចាស់ឈ្មោះហាន់ ចិន្តា ភេទប្រុស ។ ប្រភពដដែលបន្តថា បន្ទាប់ពីធ្វើសកម្មភាពដុតបន្ទប់ផ្ទះសំណាក់រួច ជនសង្ស័យបានរតល់ឡើងលើដំបូលផ្ទះជួលរបស់ ឈ្មោះយឹម សុផាត ភេទប្រុស អាយុ៣៨ឆ្នាំ ជាមន្ត្រីនគរបាលរហូតដល់ម៉ោង៦ព្រឹកទើបកម្លាំងសមត្ថកិច្ចលួងលោម និងឃាត់ខ្លួនបញ្ជូនមកកាន់អធិការដ្ឋាននគរបាលក្រុងព្រះសីហនុដើម្បីកសាងសំណុំរឿងបញ្ជូនបន្តទៅកាន់ស្នងការដ្ឋាននគរបាលខេត្តព្រះសីហនុ។
សូមបញ្ជាក់ផងដែរថា ខណៈភ្លើងកំពុងឆាបឆេះបន្ទប់ផ្ទះសំណាក់នោះ ការិយាល័យជំនាញពន្លត់អគ្គិភ័យនៃស្នងការដ្ឋាននគរបាលខេត្តព្រះសីហនុបានប្រើប្រាស់រថយន្តពន្លត់អគ្គិភ័យចំនួន២គ្រឿងទើបភ្លើងរលត់ជាស្ថាពរ៕
ចែករំលែកព័តមាននេះ