ខេត្តកំពង់ចាម៖ ជំងឺផ្តាសាយបក្សី (H5N1) ត្រូវបានគេមើលឃើញថា បានកើតមានស្ទើរគ្រប់ទីកន្លែងនៅក្នុងប្រទេសកម្ពុជា ដោយបានឆ្លងពីសត្វមកមនុស្សបណ្តាលឱ្យមនុស្សជាច្រើននាក់ស្លាប់ ដែលភាគច្រើនជាកុមារទៀតផង ។
ជាក់ស្តែងនៅផ្ទះរបស់ប្រជាពលរដ្ឋម្នាក់ក្នុងភូមិទី៣ សង្កាត់វាលវង់ ក្រុងកំពង់ចាម មាន់ជាច្រើនក្បាលបានងាប់ជាបន្តបន្ទាប់ ហើយត្រូវជំនាញបសុពេទ្យខេត្តចុះប្រមូលដុតកំទេច និងកប់ចោលនាព្រឹកថ្ងៃទី១៧ កក្កដា ២០១៤ ដើម្បីជៀសវាងកុំឲ្យឆ្លងផ្តាសាយបក្សី ។
តាមលោកហេង ប៊ុនធឿន អាយុ៤៥ឆ្នាំ ម្ចាស់ផ្ទះបានប្រាប់ឲ្យដឹងថា កាលពីល្ងាចថ្ងៃទី១៦ កក្កដា រូបលោកបានត្រឡប់មកពីធ្វើការនៅអង្គភាពវិញ ស្រាប់តែឃើញមេមាន់ និងអាគកចំនួន២ក្បាលបានងាប់នៅក្នុងទ្រុងចិញ្ចឹមមាន់ ភ្លាមៗនោះលោកមិនបានយកទៅណាទេ គឺរង់ចាំតាមដានបន្តទៀត ។
លោកប៊ុន ធឿន ប្រាប់បន្តថា លុះរហូតមកដល់ព្រឹកថ្ងៃទី ១៧ កក្កដា មិនដឹងជាមូលហេតុអ្វីនោះទេ ស្រាប់តែកូនមាន់បានងាប់ក្នុងទ្រុង និងក្រោមទ្រុងបន្តទៀតចំនួន៤ក្បាល ។ ពេលឃើញបែបនេះរូបលោកមានក្តីបារម្ភជាខ្លាំង សង្ស័យតែជំងឺផ្តាសាយបក្សីផ្ទុះឡើង អាចបង្កឲ្យគ្រោះថ្នាក់ដល់សមាជិកក្រុមគ្រួសាររបស់លោក លោកក៏បានរាយការណ៍ទៅលោកនង ម៉េងហ៊ាង ប្រធានការិយាល័យផលិតកម្មបសុព្យាបាលខេត្តចុះមកត្រួតពិនិត្យជាមួយនឹងសហការីម្នាក់ គឺបានយកមាន់ងាប់ និងរស់ទាំងតូចធំ សរុបចំនួន១៦ក្បាល ព្រមទាំងពងចំនួន១៣គ្រាប់បោះចូលរណ្តៅដុតកំទេច និងបាញ់ថ្នាំប្រភេទ TH4 សម្លាប់មេរោគកប់ក្នុងរណ្តៅសុវត្ថិភាពផងដែរ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ