រាជធានីភ្នំពេញ ៖ ក្រុមហ៊ុន Rachna Eco Energy EV Automotive (Cambodia) Co., Ltd (RNA) ដែលជាក្រុមហ៊ុនមានភាគហ៊ុនខ្មែរ ១០០% ដែលបានបោះជំហានយ៉ាងសកម្ម និងមានចក្ខុវិស័យវែងឆ្ងាយ ក្នុងការនាំយកបច្ចេកវិទ្យារថយន្ត អគ្គិសនីទំនើបមកបំពេញតម្រូវការទីផ្សារកម្ពុជាផងនោះ នៅថ្ងៃទី ០៥ ខែកញ្ញា ឆ្នាំ ២០២៦ ក្រុមហ៊ុន RNA បានសម្ពោធជាផ្លូវការនូវរថយន្តអគ្គិសនីម៉ាក រីឡាយ (RELY EV) ។
តាមរយៈលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម បានសម្តែងការកោតសរសើរ និងលើកឡើងថា ៖ «និន្នាការនៃការអភិវឌ្ឍ និងការប្រើប្រាស់យានយន្តអគ្គិសនីនៅក្នុងតំបន់ និងសកលលោក កំពុងកើនឡើងយ៉ាងខ្លាំង ដោយសារយានយន្តអគ្គិសនីផ្តល់អត្ថប្រយោជន៍ជាច្រើនដល់សង្គម-សេដ្ឋកិច្ច រួមមានការបង្កើតការងារ ការបង្កើនតម្លៃបន្ថែមក្នុងសេដ្ឋកិច្ច ការកាត់បន្ថយការបញ្ចេញឧស្ម័នពុល ការការពារបរិស្ថាន និងសុខភាពប្រជាជន ព្រមទាំងការកាត់បន្ថយការពឹងផ្អែកលើការនាំចូលប្រេងឥន្ធនៈពីបរទេស» ។លោកស្រីបន្តថា ការនាំចូលនិងចែកចាយរថយន្តអគ្គិសនី RELY EV ត្រូវបានចាត់ទុកថា ជាការចូលរួមរបស់វិស័យឯកជនក្នុងការគាំទ្រដល់អាទិភាពគោលនយោបាយរបស់រាជរដ្ឋាភិបាល ។
នាឱ្យកាសនេះផងដែរ លោក អូន រចនា អគ្គនាយកនៃក្រុមហ៊ុន RNA បានលើកឡើងថា ការឈានមកដល់ដំណាក់កាលនេះ គឺជាលទ្ធផលនៃការខិតខំប្រឹងប្រែងយ៉ាងខ្លាំងរបស់ក្រុមហ៊ុន RNA និងជាក្តីប្រាថ្នារបស់លោកក្នុងនាមជាកូនខ្មែរ ដែលចង់ចូលរួមចំណែកអភិវឌ្ឍប្រទេសជាតិ ព្រមទាំងបង្ហាញថា សហគ្រិនខ្មែរមានសមត្ថភាពក្នុងការធ្វើអាជីវកម្ម និងនាំយកបច្ចេកវិទ្យាទំនើបមកបម្រើប្រជាពលរដ្ឋ ។
លោកបានបន្តថា ក្រុមហ៊ុន RNA បានសម្រេចផ្តោតលើរថយន្តអគ្គិសនីសុទ្ធ ដោយសារមូលហេតុសំខាន់ៗជាច្រើន ក្នុងនោះមានការចូលរួមជាមួយរាជរដ្ឋាភិបាល ក្នុងការជំរុញការដឹកជញ្ជូនបៃតង និងការអភិវឌ្ឍប្រទេសប្រកបដោយចីរភាព ។ បន្ថែមពីនេះលោក អូន រចនា ថា លោកចង់ឃើញប្រជាពលរដ្ឋកម្ពុជារស់នៅក្នុងបរិស្ថានដែលមានខ្យល់អាកាសស្អាត និងមានសុខភាពល្អ តាមរយៈការកាត់បន្ថយការបញ្ចេញផ្សែងពុលពីយានយន្តប្រើប្រាស់ប្រេងឥន្ធនៈ ។ ចំណុចសំខាន់មួយទៀត គឺការកាត់បន្ថយថ្លៃដើមដឹកជញ្ជូនសម្រាប់អាជីវកម្ម ។ តាមការគណនារបស់ក្រុមហ៊ុន ការប្រើប្រាស់រថយន្តអគ្គិសនីអាចជួយកាត់បន្ថយចំណាយ លើការធ្វើដំណើរ ឬដឹកជញ្ជូនចម្ងាយ១០០គីឡូម៉ែត្រ ពីប្រមាណ១០ ទៅ១៣ដុល្លារ សម្រាប់រថយន្តប្រើប្រាស់សាំង ឬម៉ាស៊ូត មកនៅត្រឹមប្រមាណពី ៣ ទៅ ៤ដុល្លារ ។
ជាមួយគ្នានេះ លោក ស៊ន ភិរម្យ នាយកគ្រប់គ្រងទូទៅនៃរថយន្តអគ្គិសនីសុទ្ធ RELY EV ក៏បានលើកឡើងផងដែរថា ការសម្ពោធរថយន្តភីកអាប់អគ្គិសនីសុទ្ធម៉ាក RELY នៅកម្ពុជា មិនមែនគ្រាន់តែជាការនាំយកផលិតផលយានយន្តថ្មីមកកាន់ទីផ្សារប៉ុណ្ណោះទេ ប៉ុន្តែជាការបង្ហាញពីការបោះជំហានរបស់កម្ពុជាឆ្ពោះទៅកាន់ប្រព័ន្ធដឹកជញ្ជូនបៃតង និងការអភិវឌ្ឍប្រកបដោយចីរភាព ។
លោកបានលើកឡើងថា ៖ «គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ឆ្នាំ ២០២៤-២០៣០ បានកំណត់គោលដៅជំរុញការប្រើប្រាស់យានយន្តអគ្គិសនីនៅកម្ពុជា ខណៈតួលេខដែលលោកបានយោងបង្ហាញថា រថយន្តអគ្គិសនីដែលបានចុះបញ្ជីក្នុងឆ្នាំ ២០២៥ មានចំនួន ៧ ៩៧១គ្រឿង ហើយគិតត្រឹមត្រីមាសទី ២ ឆ្នាំ ២០២៦ ចំនួនរថយន្តអគ្គិសនីគ្រប់ម៉ូដែលដែលបានចុះបញ្ជីបានកើនឡើងដល់ជាង ១១ ៦០០គ្រឿង» ។
លោកបន្ថែមថា ការប្រើប្រាស់រថយន្តអគ្គិសនីអាចជួយកាត់បន្ថយថ្លៃដើម ប្រតិបត្តិការរបស់អាជីវកម្ម តាមរយៈការកាត់បន្ថយចំណាយ លើថាមពលសម្រាប់ការធ្វើដំណើរ និងដឹកជញ្ជូន ។ លោកបានលើកជាឧទាហរណ៍ថា ការធ្វើដំណើរចម្ងាយ ១០០ គីឡូម៉ែត្រ អាចចំណាយប្រមាណពី ១០ ទៅ ១៣ដុល្លារ ប្រសិនបើប្រើប្រាស់រថយន្តសាំង ឬម៉ាស៊ូត ខណៈការប្រើប្រាស់រថយន្តអគ្គិសនី អាចកាត់បន្ថយមកត្រឹមប្រមាណពី ៣ ទៅ ៤ដុល្លារ តាមការគណនារបស់ក្រុមហ៊ុន ។ ក្រៅពីអត្ថប្រយោជន៍ផ្នែកសេដ្ឋកិច្ច លោក ស៊ន ភិរម្យ ក៏បានសង្កត់ធ្ងន់លើអត្ថប្រយោជន៍ផ្នែកបរិស្ថាន និងសុខភាពសាធារណៈ ដោយសារយានយន្តអគ្គិសនីមិនបញ្ចេញផ្សែងពីការចំហេះឥន្ធនៈនៅពេលបើកបរ និងអាចរួមចំណែកកាត់បន្ថយការបំពុលខ្យល់ ។
សូមជម្រាបជូនផងដែរថា ក្រុមហ៊ុនកូនខ្មែរ RNA មានការប្តេជ្ញាចិត្តផ្តល់ជូនរថយន្តភីកអាប់អគ្គិសនីសុទ្ធ RELY ដែលមានបច្ចេកវិទ្យាទំនើប សុវត្ថិភាព និងភាពធន់ខ្ពស់ ព្រមទាំងផ្តល់សេវាកម្មក្រោយពេលលក់ប្រកបដោយគុណភាព ។ បច្ចុប្បន្ន ក្រុមហ៊ុនមានយានដ្ឋានជួសជុលដែលមានជាងជំនាញ និងមានបទពិសោធន៍ ព្រមទាំងទទួលបានការបណ្តុះបណ្តាលពីរោងចក្រ RELY និងមានការរៀបចំស្តុកគ្រឿងបន្លាស់សម្រាប់បម្រើអតិថិជន ។ រាល់រថយន្តដែលអតិថិជនទិញពីក្រុមហ៊ុន ក៏មានការធានាច្បាស់លាស់ពីរោងចក្រផងដែរ ៕ អត្ថបទសហការ
ចែករំលែកព័តមាននេះ