រាជធានីភ្នំពេញ ៖ ក្នុងកិច្ចប្រជុំបូកសរុបការងារប្រចាំឆ្នាំ ២០២៤ និងផែនការអភិវឌ្ឍឆ្នាំ ២០២៥ លោក គង់ សំនៀង អគ្គនាយករងនៃបណ្តាញគ្រឹះស្ថានអប់រំ…
រាជធានីភ្នំពេញ ៖ ក្នុងកិច្ចប្រជុំបូកសរុបការងារប្រចាំឆ្នាំ ២០២៤ និងផែនការអភិវឌ្ឍឆ្នាំ ២០២៥ លោក គង់ សំនៀង អគ្គនាយករងនៃបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានលើកឡើងថា៖ ផ្អែកតាមផែនការយុទ្ធសាស្ត្រអភិវឌ្ឍ វេសឡាញនឹងពង្រីកវិសាលភាពអប់រំរបស់ខ្លួនដោយបើកសាខាថ្មី៣បន្ថែមទៀត ក្នុងឆ្នាំ ២០២៥ នេះ ដើម្បីបំពេញតម្រូវការរបស់អ្នកអាណាព្យាបាល ដែលចង់បានសាលារៀនដែលមានប្រព័ន្ធអប់រំមួយដែលមានគុណភាព និងប្រសិទ្ធភាព ព្រមទាំងចូលរួមចំណែកជាមួយរដ្ឋាភិបាលក្នុងកាអភិវឌ្ឍមូលធនមនុស្សនៅកម្ពុជា ។
ជាមួយគ្នានេះ បើតាមលោក គង់ សំនៀង បានបន្ថែមថា ៖ ដើម្បីឆ្លើយតបទៅនឹងការរីកចម្រើន ការវិវឌ្ឍរបស់ស្ថាប័ន ក៏ដូចជាពិភពលោក ជាពិសេសតម្រូវការគុណភាពរបស់សិស្សានុសិស្សនាពេលបច្ចុប្បន្ន នៅក្នុងឆ្នាំ ២០២៥ នេះ បណ្តាញសាលារៀនវ៉េស្ទឡាញន៍ និងសាលារៀនណត្សឡាញន៍នឹងអភិវឌ្ឍកម្ម រៀបចំស្តង់ដារបង្រៀនកម្មវិធីមត្តេយ្យសិក្សាភាសាអង់គ្លេស និងខ្មែរនៅសាខាថ្មី និងសាខាកំពុងដំណើរការ, បន្តធ្វើទំនើបកម្ម កម្មវិធីសិក្សាចំណេះទូទៅខ្មែរ ដើម្បីឆ្លើយតបនឹងតម្រូវការអ្នកសិក្សា និងការអប់រំបំណិនសតវត្សរ៍ទី ២១ ដោយបញ្ចូលបច្ចេកវិទ្យាក្នុងការបង្រៀន និងរៀន និងការស្រាវជ្រាវរបស់សិស្សានុសិស្ស បន្តការអនុវត្តកិច្ចការស្រាវជ្រាវ និងពិសោធន៍ឱ្យបានផុសផុលតាមសាខានីមួយៗ រៀបចំផែនការ និងអនុវត្តគម្រោង STEAM បន្ថែមកញ្ចប់គណិតវិទ្យាថ្នាក់ដំបូងក្នុងកញ្ចប់សិក្សារបស់សិស្ស ។
លោកបានបញ្ជាក់ថា ៖ សាលារៀនបន្តពង្រឹងគុណភាពគ្រូបង្រៀនតាមរយៈ ការបណ្តុះបណ្តាលបច្ចេកទេសបន្ត វិធីសាស្ត្របង្រៀនថ្មីៗដល់លោកគ្រូ-អ្នកគ្រូ ការចូលរួមប្រជុំបច្ចេកទេស ការធ្វើថ្នាក់និទស្សន៍ សិក្ខាសាលាប្រចាំឆ្នាំ ការពិនិត្យតាមដាន ការចុះអធិការកិច្ចវាយតម្លៃគ្រូបង្រៀន ការពង្រឹងលើទំនួលខុសត្រូវ និងក្រមសីលធម៌វិជ្ជាជីវៈគ្រូបង្រៀន ការប្រឡងសមត្ថភាពគ្រូបង្រៀនជាដើម ។
គួរជម្រាបជូនថា ចាប់តាំងពីឆ្នាំ ២០០៨ មក បណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប មានការរីកចម្រើន និងបានបន្តពង្រីកខ្លួនជាបន្តបន្ទាប់ ដែលរហូតមកដល់ពេលនេះ ស្ថាប័នបានដាក់ដំណើរការសេវាកម្មអប់រំចំណុះជាង ២០ សាខា ក្នុងនោះសាលារៀនវ៉េស្ទឡាញន៍ មានចំនួន ១៣សាខា, សាលារៀនណត្សឡាញន៍ មានចំនួន ២ សាខា, វិទ្យាស្ថានអភិវឌ្ឍន៍វិស័យអប់រំ ១ សាខា, សាលាអន្តរជាតិហ្វររ៉េសហៀល ១ សាខា, សាលាអង់គ្លេសលីដឺលែន ២ សាខា និងសាលារៀនសហគមន៍ ២១ ចំនួន ៩ សាខា ដោយមានសិស្សកំពុងសិក្សាសរុបប្រមាណ ១៥ ០០០នាក់ និងគ្រូបង្រៀនប្រមាណជាង ១ ៤០០នាក់ ៕ អត្ថបទសហការ
ចែករំលែកព័តមាននេះ