រាជធានីភ្នំពេញ ៖ ធនាគារ អេស៊ីលីដា ភីអិលស៊ី បានរៀបចំដំណើរការបង្កើតកូដ QR សម្រាប់ការទូទាត់ឆ្លងប្រទេសក្នុងចំណោមអាស៊ាន (សមាគមប្រជាជាតិ អាស៊ីអាគ្នេយ៍)…
រាជធានីភ្នំពេញ ៖ ធនាគារ អេស៊ីលីដា ភីអិលស៊ី បានរៀបចំដំណើរការបង្កើតកូដ QR សម្រាប់ការទូទាត់ឆ្លងប្រទេសក្នុងចំណោមអាស៊ាន (សមាគមប្រជាជាតិ អាស៊ីអាគ្នេយ៍) ។ ដោយមានការកំណត់ពី ធនាគារជាតិនៃកម្ពុជា ដែលជាអាជ្ញាធររូបិយវត្ថុ និងធនាគារកណ្តាលរបស់កម្ពុជា នោះ ធនាគារ អេស៊ីលីដា ភីអិលស៊ី នឹងបង្កើតកូដ QR សម្រាប់ការទូទាត់ឆ្លងដែនរវាងកម្ពុជា-វៀតណាម និងកម្ពុជា-ឡាវ ខណៈដែលកូដ QR របស់ធនាគារត្រូវបានប្រើរួចហើយនៅក្នុងប្រទេសថៃ ចាប់តាំងពីត្រូវបានដាក់ឱ្យដំណើរការក្នុងខែកុម្ភៈ ឆ្នាំ ២០២០ ។
សម្រាប់ពលរដ្ខខ្មែរដែលធ្វើដំណើរទៅប្រទេសថៃ ចាប់ពីពេលនេះទៅលែងបារម្ភពីការទុកដាក់ប្រាក់តាមខ្លួន លែងបារម្ភពីអត្រាប្តូរប្រាក់ទៀតហើយ ដោយសារពេលនេះមានធនាគារ ៤ ហើយនៅប្រទេសថៃដែលអាចឲ្យពលរដ្ឋខ្មែរស្កេនទូទាត់ជាប្រាក់រៀលតាម QR ជាមួយអេស៊ីលីដាម៉ូបាលបានរហូតដល់ ៥ លានរៀល ក្នុងមួយថ្ងៃ តាមរយៈគណនី អេស៊ីលីដាម៉ូបាល និង ១០ លានរៀលក្នុងមួយថ្ងៃ តាមរយៈគណនី ធនាគារ អេស៊ីលីដា បានយ៉ាងងាយស្រួល និងឆាប់រហ័ស ។ ធនាគារ ៤ នោះ មានដូចជា ៖ – Kasikornbank (KBank) – Siam Commercial Bank (SCB) – Bangkok Bank – Bank of Ayudhya ។
ធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួនបួន (៤) គឺ៖ ១) វិទ្យាស្ថាន ពាណិជ្ជសាស្ត្រ អេស៊ីលីដា ២) អេស៊ីលីដា ស៊ីឃ្យួរឹធី ភីអិលស៊ី ៣) ធនាគារ អេស៊ីលីដា ឡាវ លីមីធីត និង ៤) ស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា ព្រមទាំងមានការិយាល័យតំណាងនៅសាធារណរដ្ឋសហភាពមីយ៉ានម៉ា ។ ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួនជាង ៨,៣៤ ប៊ីលានដុល្លារអាមេរិក សមតុល្យឥណទានសរុបចំនួន ៦ ប៊ីលានដុល្លារអាមេរិក និងប្រាក់បញ្ញើសន្សំសរុបចំនួន ៦,០១ ប៊ីលានដុល្លារអាមេរិក និងមានអតិថិជនប្រមាណជាង ៣,៥៩ លាននាក់ គិតត្រឹមដំណាច់ខែមិថុនា ឆ្នាំ ២០២២ នេះ ។ គិតត្រឹមដំណាច់សីហា ឆ្នាំ ២០២២ ធនាគារ អេស៊ីលីដា ភីអិលស៊ី មានអ្នកប្រើប្រាស់អេស៊ីលីដាម៉ូបាល លើស ២,៥ លាននាក់ និងមានដៃគូអាជីវកម្មចំនួន ១៧៥ ពាន់ ៕
ចែករំលែកព័តមាននេះ