រាជធានីភ្នំពេញ៖ ថ្ងៃទី១២ ខែវិច្ឆិកា ឆ្នាំ២០២១- ក្រុមហ៊ុន អេអាយអេ (ខេមបូឌា) ឡាយហ្វ៍ អ៊ិនសួរេន ម.ក…
រាជធានីភ្នំពេញ៖ ថ្ងៃទី១២ ខែវិច្ឆិកា ឆ្នាំ២០២១- ក្រុមហ៊ុន អេអាយអេ (ខេមបូឌា) ឡាយហ្វ៍ អ៊ិនសួរេន ម.ក និងធនាគារកម្ពុជាសាធារណៈ ភីអិលស៊ី (“ធនាគារកម្ពុ”) បានចុះហត្ថលេខា បន្ដភាពជាដៃគូអាជីវកម្ម ប៊ែងកាសួរេន (bancassurance) ដើម្បីចូលរួមចំណែកបង្កើនប្រតិបត្តិការធានារ៉ាប់រងនៅព្រះរាជាណាចក្រកម្ពុជា និងផ្ដល់ជូនអតិថិជននូវដំណោះស្រាយហិរញ្ញវត្ថុកាន់តែទូលំទូលាយ និងមានរយៈពេលវែង ។
ក្រុមហ៊ុន អេអាយអេ ខេមបូឌាគឺជាដៃគូអាជីវកម្មប៊ែងកាសួរេន ផ្ដាច់មុខរបស់ធនាគារកម្ពុ ។ ភាពជាដៃគូដ៏រឹងមាំដែលបានចាប់ផ្ដើមនៅក្នុងឆ្នាំ ២០១៧ និងដែលកំពុងបន្ដសម្រាប់រយៈពេល ១៥ ឆ្នាំបន្ដទៀត នឹងកសាងភាពជោគជ័យបន្ថែមទៀត លើកិច្ចសហប្រតិបត្តិការរវាងក្រុមហ៊ុន និងធនាគារនាពេលបច្ចុប្បន្ន ។ តាមរយៈភាពជាដៃគូនេះ បានស្ដែងឱ្យឃើញថា គ្រឹះស្ថានទាំងនេះនឹងផ្ដល់គុណតម្លៃបន្ថែមដល់អតិថិជន លើកកម្ពស់ការយល់ដឹងអំពីអត្ថប្រយោជន៍ នៃការទទួលបានធានារ៉ាប់រង និងជួយពង្រឹងភាពជាដៃគូអាជីវកម្មប៊ែងកាសួរេន ឈានមុខគេនៅកម្ពុជា ។
រហូតមកដល់បច្ចុប្បន្ននេះ អតិថិជនរបស់ធនាគារកម្ពុប្រមាណ ៤.០០០ នាក់បានទទួលការការពារផ្នែកហិរញ្ញវត្ថុពីក្រុមហ៊ុន អេអាយអេ ខេមបូឌា ។ ក្រុមហ៊ុនធានារ៉ាប់រង បានទូទាត់សំណងប្រមាណជិត ៤០០.០០០ ដុល្លារអាមេរិក ដោយក្នុងនោះរួមមានការធានារ៉ាប់រងលើជំងឺកូវីដ ១៩ ដោយឥតគិតថ្លៃ ដែលបានដាក់ដំណើរការ នៅក្នុងអំឡុងពេលឆ្លងរាលដាលនៃជំងឺកូវីដ ១៩ ។
ជាមួយនឹងការបន្ដភាពជាដៃគូនេះ អតិថិជនរបស់ធនាគារកម្ពុអាចបន្ដភាពងាយស្រួល ក្នុងការទទួលបាននូវព័ត៌មានអំពីផលិតផលធានារ៉ាប់រង និងប្រឹក្សាយោបល់ពីក្រុមហ៊ុន អេអាយអេ ខេមបូឌា ព្រមទាំងស្វែងរកនូវការផ្ដល់ជូនពិសេស និងសេវាកម្មពីក្រុមហ៊ុន និងធនាគារ ។ ភាពជាដៃគូនេះដើរតួរជាសេវាកម្មហិរញ្ញវត្ថុដ៏សំបូរបែប សម្រាប់ឯកត្តបុគ្គល និងក្រុមហ៊ុនក្នុងការទទួលបានសេវាធនាគារ និងដំណោះស្រាយធានារ៉ាប់រងអាយុជីវិត ដែលមានគុណភាពខ្ពស់ សំដៅឆ្ពោះទៅរកការបំពេញតម្រូវការហិរញ្ញវត្ថុរបស់អតិថិជន ។
ពិធីចុះហត្ថលេខានេះ ត្រូវបានប្រព្រឹត្តទៅក្រោមវត្តមានរបស់គណៈគ្រប់គ្រងជាន់ខ្ពស់ របស់ក្រុមហ៊ុន អេអាយអេ ខេមបូឌា និងធនាគារកម្ពុ ព្រមទាំងមានការចូលរួម ពីអតិថិជនប្រាំរូបដំបូង នាគ្រាចាប់ផ្ដើមភាពជាដៃគូរបស់ ក្រុមហ៊ុន និងធនាគារនៅក្នុងឱកាសចុះហត្ថលេខានេះ ។ អតិថិជនទាំងប្រាំរូបបានបង្ហាញភាពរីករាយ និងពេញចិត្តក្នុងការទទួលបានការការពារផ្នែកហិរញ្ញវត្ថុដែលបានបន្ដដល់ពេលបច្ចុប្បន្ន ។
នៅក្នុងឱកាសនៃពិធីចុះហត្ថលេខានេះ លោក Andrew Loh នាយកប្រតិបត្តិនៃក្រុមហ៊ុន អេអាយអេ ខេមបូឌា បានមានប្រសាសន៍ថា៖ «ភាពជាដៃគូរបស់យើងខ្ញុំ មិនត្រឹមតែពង្រឹងការប្ដេជ្ញាចិត្តរបស់យើងខ្ញុំ សម្រាប់អតិថិជនប៉ុណ្ណោះទេ ប៉ុន្ដែថែមទាំងអាចឱ្យយើងខ្ញុំបង្កើនកិច្ចខិតខំប្រឹងប្រែង ជួយដល់ការរស់នៅរបស់ប្រជាពលរដ្ឋកាន់តែប្រសើរឡើង និងប្រកបដោយសុខភាព និងអាយុយឺនយូរ ។ យើងខ្ញុំសូមថ្លែងអំណរគុណដល់ធនាគារកម្ពុ ព្រោះបច្ចុប្បន្ន យើងខ្ញុំអាចស្ថិតនៅក្នុងស្ថានភាពដ៏រឹងមាំ ដើម្បីផ្សព្វផ្សាយបន្ថែម ដល់ប្រជាពលរដ្ឋកម្ពុជាអំពីសារសំខាន់ នៃការធានារ៉ាប់រងអាយុជីវិត និងផ្ដល់ជូននូវដំណោះស្រាយហិរញ្ញវត្ថុដែលផ្ដល់ជូនអត្ថប្រយោជន៍កាន់តែច្រើន ក្នុងការជួយគាំពារសុខុមាលភាពរបស់អតិថិជននាពេលអនាគត ។
លោក អុង មីងតិច នាយកប្រតិបត្តិនៃធនាគារកម្ពុបានមានប្រសាសន៍ថា៖ «កិច្ចសហប្រតិបត្តិការជាមួយក្រុមហ៊ុន អេអាយអេ ខេមបូឌា នឹងបន្ថែមភាពងាយស្រួល និងបទពិសោធន៍ហិរញ្ញវត្ថុកាន់តែទូលំទូលាយ ។ ធនាគារកម្ពុតែងតែឈរនៅជួរមុខក្នុងការផ្ដល់សេវាអតិថិជនប្រកបដោយឧត្តមភាព ហើយនឹងបន្ដផ្ដល់សេវាកម្ម និងផលិតផលថ្មីៗដែលបំពេញទៅតាមតម្រូវការរបស់អតិថិជន ។ ការបន្ដភាពជាដៃគូនេះនឹងជួយដល់អតិថិជន បំពេញតម្រូវការរបស់ខ្លួនក្នុងការសន្សំប្រាក់ និងការការពារ»។
ក្នុងនាមជាធនាគារ ដែលមានការយកចិត្តទុកដាក់ខ្ពស់ លើសកម្មភាពមនុស្សធម៌ និងសង្គម និងដើម្បីធ្វើឱ្យពិធី ចុះហត្ថលេខានេះប្រព្រឹត្ដទៅប្រកបដោយអត្ថន័យ ធនាគារកម្ពុបានចូលរួមចំណែកថវិកាចំនួន ៥.០០០ ដុល្លារអាមេរិក ដល់យុទ្ធនាការ Fit for Hope ដែលបានរៀបចំដោយក្រុមហ៊ុន អេអាយអេ ខេមបូឌា រៀងរាល់ខែតុលា ដើម្បីលើកកម្ពស់ការយល់ដឹងអំពីជំងឺមហារីកសុដន់ទូទាំងប្រទេស ។ យុទ្ធនាការប្រចាំឆ្នាំនេះត្រូវបានធ្វើឡើងតាមអនឡាញ សកម្មភាពនៅទីសាធារណៈ និងសកម្មភាពផ្សេងៗ ដោយបានរៃអង្គាសថវិកាជំនួយចំនួន ៦០.០០០ ដុល្លារអាមេរិក ជូនដល់មន្ទីរពេទ្យព្រះសីហនុ មណ្ឌលនៃក្ដីសង្ឃឹម ។
សម្រាប់ព័ត៌មានបន្ថែមស្ដីពីការផ្ដល់ជូនរបស់ក្រុមហ៊ុន អេអាអេ ខេមបូឌា តាមរយៈធនាគារកម្ពុ និងដំណោះស្រាយសម្រាប់អត្ថប្រយោជន៍ហិរញ្ញវត្ថុរបស់អតិថិជន សូមទំនាក់ទំនងផ្នែកបម្រើសេវាអតិថិជន អេអាយអេ តាមរយៈលេខទូរស័ព្ទ ០៨៦ ៩៩៩ ២៤២ ឬតាមរយៈគេហទំព័រ aia.com.kh ៕ ដោយសហការ
ចែករំលែកព័តមាននេះ