រាជធានីភ្នំពេញ ៖ ក្រសួងអប់រំ យុវជន និងកីឡា បានចេញសេចក្តីជូនដំណឹងប្រកាសបើកដំណើរការ គ្រឹះស្ថានសិក្សាឡើងវិញ សម្រាប់កម្រិតមធ្យមសិក្សា ដោយអនុវត្តគោលការណ៍ស្តង់ដារសុវត្ថិភាព ។ ប៉ុន្តែគ្រឹះស្ថានអប់រំឯកជនមួយលើកឡើថា ចំនួនសិស្សានុសិស្ស ដែលមកសិក្សានៅថ្នាក់រៀនផ្ទាល់ហាក់ដូចជានៅមានចំនួនតិចតួចនៅឡើយ និងជំរុញឱ្យអ្នកអាណាព្យាបាលបញ្ចូលកូនៗមករៀន នៅសាលាផ្ទាល់តាមកាលវិភាគសិក្សា ដើម្បីធានាគុណភាពអប់រំឱ្យកាន់តែប្រសើរឡើង ។
លោក គង់ សំនៀង ប្រធាននាយកប្រតិបត្តិការនៃក្រុមហ៊ុន វេសឡាញ អេឌ្យខេសិន បានឱ្យដឹងថា ៖ «បន្ទាប់ពីក្រសួងបានចេញប្រកាស បើកសាលារៀនឡើងវិញ ដោយអនុវត្តវិធីសាស្ត្របង្រៀនបែបបណ្តុំ ឆ្លាស់វេនសិក្សា និងសិក្សាតាមប្រព័ន្ធអនឡាញ (Zoom) ចាប់តាំងពីពាក់កណ្តាលខែកញ្ញាមក ចំនួនសិស្សមកសិក្សានៅថ្នាក់រៀន ជាក់ស្តែងមានចំនួនតិច មិនដូចការរំពឹងទុក» ។
ពាក់ព័ន្ធនឹងមូលហេតុចំនួនសិស្សមករៀនក្នុងថ្នាក់នៅមានកម្រិត លោកប្រធានបានបន្តថា ៖ «មូលហេតុទី ១ ដោយសារអ្នកអាណាព្យាបាលមិនទាន់មានទំនុកចិត្តខ្ពស់ លើការអនុវត្តគោលការណ៍ស្តង់ដារសុវត្ថិភាពរបស់សាលារៀន និងមូលហេតុទី ២ ដោយសារអ្នកអាណាព្យាបាលនៅរង់ចាំមើលអ្នកជិតខាង ឬសាច់ញាតិបញ្ចូលកូនៗមកថ្នាក់រៀន មិនមានបញ្ហាអ្វីកើតឡើង គាត់ក៏នឹងបញ្ចូនកូនៗមករៀនផងដែរ» ។
លោកប្រធានក៏បានលើទឹកចិត្ត ដល់អ្នកអាណាព្យាបាលបញ្ចូនកូនៗមកសាលារៀន ដោយសារបណ្តាញសាលារៀនវ៉េស្ទឡាញន៍ និងសាលារៀនណត្សឡាញន៍ទាំង ១១ សាខា បានត្រៀមលក្ខណៈសម្បត្តិរួចរាល់ ដើម្បីធានាសុវត្ថិភាព និងគុណភាពសិក្សារបស់សិស្សានុសិស្ស ។ ទន្ទឹមនឹងនេះ សាលារៀននឹងអនុវត្តខ្ជាប់ខ្ជួន នូវគោលការណ៍ប្រតិបត្តិស្តង់ដារសុវត្ថិភាព រក្សាចំនួនសិស្សមិនលើសពី ១៥ នាក់ ក្នុងមួយថ្នាក់ ចំណែកសិស្សមួយក្រុមទៀតរៀនតាមប្រព័ន្ធអនឡាញ សម្រាប់សិស្សកម្មវិធីផ្សេងទៀត ត្រូវរក្សាការសិក្សាតាមប្រព័ន្ធអនឡាញដដែល រហូតដល់មានការជូនដំណឹងជាថ្មី ។
លោកក៏បន្តទៀតថា សាលារៀនបានបង្កើតគណៈកម្មការរក្សាបរិស្ថានអនាម័យ តម្រូវឱ្យសិស្សវាស់កំដៅ និងសម្អាតដៃជាមួយទឹកអាល់កុលជាប្រចាំ ផ្តល់ទីកន្លែងលាងដៃ ធ្វើ Rapid Test ក្នុងករណីសង្ស័យ ។ ចំពោះបុគ្គលិក គ្រូបង្រៀន ត្រូវបង្ហាញប័ណ្ណចាក់វ៉ាក់សាំង មុនចូលបម្រើការងារ ហើយត្រូវប្រជុំតាមប្រព័ន្ធអនឡាញ បើមានចំនួនអ្នកចូលរួមច្រើន តាមដានព័ត៌មានជាក់លាក់ ចៀសវាងព័ត៌មានក្លែងក្លាយ និងមិនអនុញ្ញាតឱ្យលក់ចំណីអាហារ ក្នុងបរិវេណអគារសិក្សាឡើយ ។
សូមជម្រាបផងដែរថា កាលពីពេលថ្មីៗកន្លងទៅនេះ ក្រសួងអប់រំ យុវជននិងកីឡា បានចេញសេចក្តីណែនាំស្តីពីការបង្រៀន និងរៀនតាមបណ្តុំ សម្រាប់គ្រឹះស្ថានសិក្សាចំណេះទូទៅ គ្រប់កម្រិត គ្រឹះស្ថានឧត្តមសិក្សា ទាំងសាធារណៈ និងឯកជន និងគ្រឹះស្ថានបណ្តុះបណ្តាលគ្រូ ដើម្បីឈានឆ្ពោះទៅដំណើរការអប់រំ តាមគន្លងប្រក្រតីថ្មី ក្នុងបរិបទកូវីដ-១៩ ចាប់ពីថ្ងៃទី ១ ខែវិច្ឆិកា ឆ្នាំ ២០២១ ៕ ដោយសហការ
ចែករំលែកព័តមាននេះ