រាជធានីភ្នំពេញ ៖ ឯកឧត្ដម ជា ចាន់តូ បានបញ្ជាក់ថា ការផ្ដល់សេវាសាធាណៈនានា ដែលជាតម្រូវការក្នុងជីវភាពរស់នៅប្រចាំថ្ងៃរបស់ប្រជាជនបានរហ័សទាន់ពេលវេលា គឺជាការទទួលខុសត្រូវរបស់មន្ត្រីមូលដ្ឋាន ពិសេសថ្នាក់ឃុំដែលត្រូវសម្រេចឱ្យបាន ។
ការលើកឡើងរបស់ឯកឧត្ដម ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាល គណបក្សប្រជាជនកម្ពុជា អនុប្រធានក្រុមការងារថ្នាក់ជាតិ ចុះជួយខេត្តកំពង់ធំ និងប្រធានក្រុមការងារថ្នាក់ជាតិ ចុះជួយស្រុកស្ទោង ដូចនេះកាលពីថ្ងៃទី ២៤ ខែតុលា ឆ្នាំ ២០២១ នៅក្នុងឱកាសដែលឯកឧត្ដមអញ្ជើញជាអធិបតីភាពក្នុងពិធីផ្សព្វផ្សាយគោលនយោបាយអភិវឌ្ឍន៍ ឃុំ សង្កាត់ឆ្នាំ ២០២២~២០២៧ ជូនដល់សមាជិកសមាជិកាគណបក្សប្រជាជនកម្ពុជា ថ្នាក់ស្រុក និងឃុំក្នុងស្រុកស្ទោង ។
ឯកឧត្ដម ជា ចាន់តូ បានបញ្ជាក់ទៀតថា «មន្ត្រីមូលដ្ឋាន និងមន្ត្រីថ្នាក់ឃុំជាអ្នកនៅផ្ទាល់ ជាមួយប្រជាជន ដូចនេះចាំបាច់ត្រូវពង្រឹងបន្ថែម លើកការងារផ្ដល់សេវាសាធារណៈនានា ឱ្យកាន់តែប្រសើរប្រកបដោយប្រសិទ្ធិភាព គុណភាណ តម្លាភាព និងការជឿទុកចិត្ត ពិសេសសេវាអប់រំនិងសុខាភិបាល» ។
ឯកឧត្ដម បានបញ្ជាក់ឱ្យដឹងដែរថា «គោលនយោបាយអភិវឌ្ឍន៍ ឃុំ សង្កាត់ឆ្នាំ ២០២២~២០២៧ នេះ គឺរៀបចំឡើងក្នុងគោលដៅពង្រឹង និងពង្រីកសមិទ្ធផលគ្រប់ផ្នែកនៅឃុំ សង្កាត់ ដើម្បីឆ្លើយតបទៅនឹងបំណងប្រាថ្នារបស់ប្រជាជន នៅគ្រប់មូលដ្ឋាន ។ ហើយគោលនយោបាយនេះ ក៏មានបំណងថែរក្សាសន្តិភាព និងការលើកស្ទួយកម្រិតជីវភាពរស់នៅប្រជាជន ឱ្យកាន់តែប្រសើរឡើងផងដែរ ។ ប៉ុន្តែដើម្បីឱ្យគោលនយោបាយនេះ ទទួលបានលទ្ធផលល្អ និងជោគជ័យលុះត្រាណាមានការគាំទ្រ និងចូលរួមអនុវត្តយ៉ាងសកម្មពីប្រជាពលរដ្ឋ គ្រប់មជ្ឈដ្ឋានទាំងក្នុងប្រទេស និងក្រៅប្រទេស ទើបយើងបង្កើតបានសមិទ្ធផលថ្មីៗទៀត លើគ្រប់វិស័យនៅថ្នាក់ឃុំ សង្កាត់ សម្រាប់ក្នុងដំណើរការទៅមុខ របស់ប្រទេសជាតិលើមាគ៌ា សន្តិភាព ប្រជាធិបតេយ្យ នីតិរដ្ឋនិងការអភិវឌ្ឍ ។
នៅក្នុងឱកាសនោះដែរ ឯកឧត្ដម ជា ចាន់តូ បានអំពាវនាវដល់ថ្នាក់ដឹកនាំ និងប្រជាជននៅទូទាំងស្រុក ត្រូវចេះរៀបចំខ្លួនរៀនរស់ជាមួយនឹងកូវីដ ១៩ ដើម្បីរួបរួមគ្នាស្ដាសេដ្ឋកិច្ចឡើងវិញ តបតាមការណែនាំដ៏ខ្ពង់ខ្ពស់ របស់សម្ដេចតេជោ ហ៊ុន សែន ៕ ដោយសហការ
ចែករំលែកព័តមាននេះ