រាជធានីភ្នំពេញ៖ ឯកឧត្ដម ជា ចាន់តូ បានអំពាវនាវដល់ថ្នាក់ដឹកនាំ និងប្រជាជននៅទូទាំងស្រុកសន្ទុក ឲ្យរៀបចំខ្លួនរៀនរស់ជាមួយកូវីដ ១៩ ដើម្បីរួបរួមគ្នាស្ដាសេដ្ឋកិច្ចជាបណ្ដើរៗឡើងវិញ តបតាមការណែនាំដ៏ខ្ពង់ខ្ពស់របស់សម្ដេចតេជោ ហ៊ុន សែន ។
ការអំពាវនាវដូចនេះរបស់ឯកឧត្ដម ជា ចាន់តូ សមាជិកអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា អនុប្រធានក្រុមការងារថ្នាក់ជាតិចុះជួយខេត្តកំពង់ធំ និងជាប្រធានក្រុមការងារថ្នាក់ជាតិចុះជួយស្រុកសន្ទុក ដូចនេះត្រូវបានឯកឧត្ដមលើកឡើង ក្នុងពិធីផ្សព្វផ្សាយគោលនយោបាយអភិវឌ្ឍន៍ ឃុំសង្កាត់ឆ្នាំ២០២២-២០២៧ ជូនដល់សមាជិកសមាជិកាគណបក្សប្រជាជនកម្ពុជា ស្រុកសន្ទុកនាថ្ងៃទី២៣ ខែតុលា ឆ្នាំ២០២១ ។
ឯកឧត្ដម ជា ចាន់តូ បានបន្តទៀតថា÷ «ចាប់ពីពេលនេះតទៅយើងត្រូវចូលរួមជួយដល់ការបើក វិស័យទេសចរណ៍និងវិស័យផ្សេងៗទៀត ដើម្បីស្ដាសេដ្ឋកិច្ចជាតិជាបណ្ដើរឡើងវិញ »។
ឯកឧត្ដម ជា ចាន់តូ បានបន្តទៀតថា÷ «ដើម្បីឲ្យកិច្ចការនេះមានដំណើរបានល្អ នោះគឺត្រូវការការចូលរួមជាចាំបាច់ ពីប្រជាជនទាំងអស់ទើបធ្វើឲ្យសេដ្ឋកិច្ចជាតិយើងងើបឡើងវិញបាន ។ ហើយនៅបរិបទនេះ ប្រជាជនយើងគ្រប់ៗរូបត្រូវរស់នៅ ដោយការប្រុងប្រយត្ន័តាមការណែនាំរបស់ក្រសួងសុខាភិបាល និងប្រសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានោះ “គឺចេះរៀបចំខ្លួនជាមួយកូវីដ១៩” » ។
សូមបញ្ជាក់ថា÷ គោលនយោបាយអភិវឌ្ឍន៍ ឃុំសង្កាត់ឆ្នាំ២០២~២០២៧ របស់គណបក្សប្រជាជនកម្ពុជា ដែលបានយកមកផ្សព្វផ្សាយនេះ ត្រូវបានឯកឧត្ដម ជា ចាន់តូ បញ្ជាក់ផងដែរថា÷ «គឺគណបក្សបានរៀបចំឡើង ដោយឈរលើមូលដ្ឋានតថភាពនៃសង្គម សេដ្ឋកិច្ចកម្ពុជា ស្ថានភាពជាក់ស្ដែងរបស់ ឃុំ សង្កាត់ និងបំណងប្រាថ្នារបស់ប្រជាពលរដ្ឋគ្រប់រូប នៅគ្រប់មូលដ្ឋានក្នុងការថែរក្សាសន្តិភាព និងការលើកស្ទួយកម្រិត ជីវភាពរស់នៅឲ្យបានកាន់តែប្រសើរ ។ ហើយនៅក្នុងគោលនយោបាយរអភិវឌ្ឍន៍ ឃុំ សង្កាត់ គោលនយោបាយសម្រាប់ឆ្នាំ ២០២២~២០២៧ ដែរនេះក៏បានបញ្ជាក់ច្បាស់ដែរថា ពីជំហរហ៊ានគិត ហ៊ានធ្វើ និងហ៊ានទទួលខុសត្រូវ និងដោយមានការគាំទ្រយ៉ាងរឹងមាំពីប្រជាពលរដ្ឋ និងគណបក្សប្រជាជនកម្ពុជា គឺមានសមត្ថភាព និងលទ្ធភាពគ្រប់គ្រាន់ក្នុងការបម្រើប្រជាជន» ។
ទោះជាយ៉ាងនេះក៏ដោយឯកឧត្ដមជា ចាន់តូ បានបន្ថែមថា ដើម្បីឲ្យគោលនយោបាយអភិវឌ្ឍន៍ឃុំសង្កាត់២០២២_២០២៧ សម្រេចបានជោគជ័យបាននោះ លុះត្រាណាយើងម្នាក់ៗ មានការពុះពារនិងមានសាមគ្គីភាពគ្នា បានល្អតាំងពីថ្នាក់ដល់មូលដ្ឋាន ៕ ដោយសហការ
ចែករំលែកព័តមាននេះ