មូលនិធិរក្សាកុមារ បរិច្ចាគថេប្លេត ៤០ គ្រឿង ដល់អង្គការ ៤ ក្នុងវិស័យអប់រំ
រាជធានីភ្នំពេញ ៖ កាលពីថ្ងៃព្រហស្បតិ៍ ទី ២៩ ខែកក្កដា ឆ្នាំ ២០២១ កន្លងទៅ មូលនិធិរក្សាកុមារ…
រាជធានីភ្នំពេញ ៖ កាលពីថ្ងៃព្រហស្បតិ៍ ទី ២៩ ខែកក្កដា ឆ្នាំ ២០២១ កន្លងទៅ មូលនិធិរក្សាកុមារ បានបរិច្ចាគថេប្លេត Huawei MatePad ចំនួន ៤០គ្រឿង ដល់អង្គការក្រៅរដ្ឋាភិបាលចំនួន ៤ ដែលធ្វើការជាចម្បងក្នុងវិស័យអប់រំ ។ អង្គការទាំងបួននោះ គឺ អង្គការលើកស្ទួយប្រជាពលរដ្ឋ (PIO), អង្គការដើម្បីភាពញញឹមនៃកុមារ (PSE), អង្គការគ្រួសារថ្មី និងអង្គការក្តីសង្ឃឹមថ្មីនៃកម្ពុជា ។
លោកជំទាវ ជា សិរី ស្ថាបនិកមូលនិធិរក្សាកុមារ បានផ្តួចផ្តើមអោយមានការបរិច្ចាគនេះឡើង ដោយលោកជំទាវយល់ឃើញថា កង្វះឧបករណ៍ថេបេ្លតនេះគឺជាឧបសគ្គចម្បងមួយសម្រាប់សិស្សានុសិស្ស ជាពិសេសសិស្សានុសិស្សក្រីក្រដែលកំពុងសិក្សារៀនសូត្រនៅតាមសាលាអង្គការ ដែលគាត់ត្រូវការរៀនពីចម្ងាយ តែមិនមានលទ្ធភាពទិញឧបករណ៍ ។ លោកជំទាវ ជា សិរី បានមានប្រសាសន៍ថា «ជំងឺកូវីដ-១៩ បានធ្វើឱ្យការសិក្សានៅសាលារៀនមានការលំបាកសម្រាប់កុមារទូទៅ ជាពិសេសនោះ គឺកុមារដែលមានជីវភាពខ្វះខាត ។ ខ្ញុំសង្ឃឹមថា ការបរិច្ចាគថេប្លេតនាថ្ងៃនេះ នឹងជួយដោះស្រាយបញ្ហាមួយចំនួនដែលអង្គការទាំងបួនកំពុងជួបប្រទះ ហើយសិស្សានុសិស្សកាន់តែច្រើនអាចបន្តការសិក្សាពីចម្ងាយ ជាពិសេសសិស្សដែលត្រូវឆ្នាំប្រលង» ។
ក្នុងកិច្ចប្រជុំតាមអនឡាញរវាងលោកជំទាវ ជា សេរី និងតំណាងអង្គការទទួលផល លោកជំទាវ នួន ភីមាន ជាស្ថាបនិក និងនាយកប្រតិបត្តិអង្គការលើកស្ទួយប្រជាពលរដ្ឋ (PIO) បានថ្លែងអំណរគុណយ៉ាងជ្រាលជ្រៅចំពោះលោកជំទាវ ជា សិរី និងបានចែករំលែកអំពីគុណប្រយោជន៍នៃថេប្លេតទាំងនេះ ចំពោះសិស្សានុសិស្សដែលកំពុងរៀននៅអង្គការ PIO ។
លោកជំទាវ នួន ភីមាន បានមានប្រសាសន៍ដូចនេះថា «ខ្ញុំសូមថ្លែងអំណរគុណយ៉ាងជ្រាលជ្រៅចំពោះមូលនិធិរក្សាកុមារ និងលោកជំទាវ ដែលបានបរិច្ចាគថេប្លេតដ៏ល្អទាំងនេះមកអោយយើងខ្ញុំ ។ មានសិស្សជាច្រើនដែលខ្វះខាតឧបករណ៍សម្រាប់ការសិស្សាពីចម្ងាយ ។ យើងនឹងប្រើប្រាស់ថេប្លេតទាំងនេះអោយបានជាប្រយោជន៍ដល់សិស្សច្រើនគ្នា ដោយអោយអាទិភាពដល់សិស្សថ្នាក់ទី ៩ និងទី ១២ ដែលជាឆ្នាំប្រឡង» ។
លោក ប៊ន សុខហេង នាយកប្រតិបត្ដិនៃអង្គការក្ដីសង្ឃឹមថ្មីនៃកម្ពុជា លោក សាមុអេល ចូសេប អេ កេប (Samuel Joseph A. Cappe) នាយកផ្នែកទំនាក់ទំនងនៃអង្គការដើម្បីភាពញញឹមនៃកុមារ (PSE) និងលោកស្រី មាច សុខជា មន្ត្រីត្រួតពិនិត្យ និងវាយតម្លៃ នៃអង្គការគ្រួសារថ្មី ដែលមានវត្តមានក្នុងការប្រជុំតាមអនឡាញនោះ បានសម្តែងនូវអារម្មណ៍ និងការថ្លែងអំណរគុណដូចគ្នា ព្រមទាំងបានចែករំលែកពីបញ្ហាប្រឈមផ្សេងៗដែលអង្គការរបស់ពួកគាត់កំពុងជួបប្រទះ ។
លោកជំទាវ ជា សិរី បានឆ្លើយតបដោយបញ្ជាក់ចេតនាគាំទ្រ និងសហការជាមួយអង្គការទាំងអស់ក្រោមទម្រង់ និងតាមមធ្យោបាយដ៏ទៃទៀតនាពេលអនាគត ។ លោកជំទាវបានស្នើឱ្យអង្គការទាំងបួនផ្តល់មតិយោបល់ត្រឡប់វិញអំពីអត្ថប្រយោជន៍នៃថេប្លេត និងលើកទឹកចិត្តអោយពួកគាត់រក្សាទំនាក់ទំនងជិតស្និទ្ធជាមួយមូលនិធិរក្សាកុមារបន្តទៅទៀត ។ លោកជំទាវក៏បានបង្ហោះសារនៅលើបណ្តាញសង្គមផ្ទាល់របស់ខ្លួន និងអំពាវនាវអោយសប្បុរសជនចូលរួមបរិច្ចាគ និងធ្វើការរួមគ្នាដើម្បីជ្រោមជ្រែងសិស្សានុសិស្ស និងអង្គការដែលកំពុងជួបការលំបាក ។
លោកជំទាវបានបង្ហោះសារយ៉ាងនេះថា ៖ «អង្គការក្រៅរដ្ឋាភិបាលនីមួយៗមានសិស្សចំនួន ៣០០-៦០០០ នាក់ ដូច្នេះថេប្លេត ចំនួន ១០ គ្រឿងសម្រាប់អង្គការនីមួយៗនេះ ប្រៀបដូចជាទឹកមួយតំណក់នៅមហាសមុទ្រអ៊ី ប៉ុន្តែយ៉ាងណាក្តី យើងសង្ឃឹមថា យើងអាចធ្វើបានច្រើនជាងនេះនាពេលអនាគត តាមរយៈការទទួលបានជំនួយពីអ្នកទាំងអស់គ្នា» ។
យើងសង្ឃឹមថា សារចែករំលែករបស់លោកជំទាវនឹងជំរុញអោយមានសកម្មភាពចូលរួម និងការបរិច្ចាគពីសប្បុរសជនក្នុង និងក្រៅប្រទេសកាន់តែផុសផុលឡើង ដើម្បីជួយដល់ឧបត្ថម្ភដល់សិស្សានុសិស្សខ្វះខាត និងអង្គការក្នុងវិស័យអប់រំ ។
អំពីមូលនិធិរក្សាកុមារ
ផ្តួចផ្តើមឡើងដោយស្ថាបនិកខ្មែរ និងដឹកនាំដោយ លោកជំទាវ ជា សិរី មូលនិធិរក្សាកុមារ មានបេសកកម្មលើកកម្ពស់សុខភាព សុខមាលភាព និងផលប្រយោជន៍កុមារកម្ពុជាពីគ្រប់ស្រទាប់វណ្ណៈ ។ ជារៀងរាល់ឆ្នាំ តាមរយៈថវិការបស់លោកជំទាវផ្ទាល់ ក៏ដូចជាថវិកាដែលរៃអង្គាសបានពីសប្បុរសជននានា មូលនិធិរក្សាកុមារបានចូលរួមឧបត្ថម្ភក្នុងគម្រោង និងសកម្មភាពរបស់អង្គការដៃគូជាច្រើន ជាពិសេសក្នុងវិស័យសុខាភិបាល ដើម្បីជួយផ្លាស់ប្តូរជីវិតរបស់ប្រជាជនកម្ពុជាឱ្យកាន់តែប្រសើរឡើង ។ សូមបញ្ជាក់ថា មូលនិធិរក្សាកុមារ មិនអនុវត្តគម្រោង ដោយខ្លួនឯងផ្ទាល់ទេ ។ យើងសហការណ៍ជាមួយដៃគូដែលមានបទពិសោធន៍ ដោយផ្តល់ថវិកានិងជំនួយទំនាក់ទំនងផ្សេងទៀត ៕ ដោយសហការ
សម្រាប់ព័ត៌មានបន្ថែម សូមចូលទៅ ៖ http://www.raksakoma.org/
ចែករំលែកព័តមាននេះ