រាជធានីភ្នំពេញ ៖ នៅពេលដែលធនាគារ ឈីហ្វ ឈានចូលទីផ្សារប្រទេសកម្ពុជាជាលើកដំបូងនៅចុងឆ្នាំ ២០១៣ ធនាគារ ឈីហ្វ ទទួលបានសិទ្ធិសម្រាប់បម្រើការជាធនាគារឯកទេសដែលមានបុគ្គលិកតិចជាង ៣០…
រាជធានីភ្នំពេញ ៖ នៅពេលដែលធនាគារ ឈីហ្វ ឈានចូលទីផ្សារប្រទេសកម្ពុជាជាលើកដំបូងនៅចុងឆ្នាំ ២០១៣ ធនាគារ ឈីហ្វ ទទួលបានសិទ្ធិសម្រាប់បម្រើការជាធនាគារឯកទេសដែលមានបុគ្គលិកតិចជាង ៣០ នាក់ប៉ុណ្ណោះ ។ ទោះយ៉ាងណា ធនាគារបានរីកចម្រើនក្នុងល្បឿនមិនគួរឲ្យជឿដែលបានក្លាយជាធនាគារដ៏ធំមួយនាពេលបច្ចុប្បន្ន ។ យ៉ាងណាមិញ ធនាគារក៏បានប្រឈមនឹងការប្រកួតប្រជែងយ៉ាងខ្លាំងនៅក្នុងវិស័យធនាគារនៅកម្ពុជា ផងដែរ ។ លោក កៃ គឹមសុង ចាងហ្វាងការផ្សាយរបស់ AMAZADIA (អាម៉ាហ្សាឌៀ) ដែលជាបណ្ដាញផ្សព្វផ្សាយអបរំតាមប្រព័ន្ធឌីជីថល បានជួបពិភាក្សាជាមួយ បណ្ឌិត សឿង ម៉ូរ៉ារិទ្ធ ប្រធាននាយកប្រតិបត្តិ ធនាគារ ឈីហ្វ អំពីវិធីសាស្ត្រក្នុងការរក្សាការប្រកួតប្រជែង ខណៈពេលដែលមានការពង្រីកខ្លួននៅក្នុងប្រទេស ។
អាម៉ាហ្សាឌៀ ៖ យោងតាមធនាគារជាតិនៃកម្ពុជា (NBC) កម្ពុជាមានធនាគារពាណិជ្ជ ចំនួន ៤៧ ធនាគារឯកទេសចំនួន ១៥ ស្ថាប័នមីក្រូហិរញ្ញវត្ថុចំនួន ៧៦ ដែលចំនួន ៧ មានសិទ្ធិប្រមូលប្រាក់កម្ចីរបស់អតិថិជន ។ តើលោកអាចនិយាយយ៉ាងម៉េច អំពីទីផ្សារដែលមានទំហំតូចបែបនេះ ជាមួយនឹងចំនួនប្រជាជនតែប្រមាណ ១៦ លាននាក់ប៉ុណ្ណោះ ?
លោក បណ្ឌិត ម៉ូរ៉ារិទ្ធ ៖ វាពិតជាលំបាកណាស់នៅក្នុងបរិបទនៃការប្រកួតប្រជែងក្នុង ទីផ្សាររបស់យើង ។ ឧទាហរណ៍ និន្នាការដែលកំណត់ភាពជោគជ័យនៃផលិតផល ឬសេវាកម្មហិរញ្ញវត្ថុរបស់យើង គឺអត្រាការប្រាក់ ។ ហើយនៅពេលដែលមានគូប្រកួតប្រជែងកាន់តែច្រើននៅក្នុងទីផ្សារ នោះនឹងមានអ្វីកើតឡើងចំពោះតម្លៃនៃផលិតផល ? ប្រាកដណាស់តម្លៃនឹងត្រូវមានការទម្លាក់ចុះ ។ នោះហើយជាគោលការណ៍នៃសេដ្ឋកិច្ច ។ ហើយវាក៏ជាបញ្ហាប្រឈមសម្រាប់យើងក្នុងនាមជាអ្នកប្រឡូកនៅក្នុងទីផ្សារ និងជាស្ថាប័នហិរញ្ញវត្ថុដែរ ។ ទី ២ គឺមិនអាចមានអត្រានៃកំណើនឥណទានខ្ពស់នោះទេ ពីព្រោះទំហំនៃឥណទានដែលត្រូវបានផ្តល់ឲ្យទៅអតិថិជន គឺអាស្រ័យទៅលើប្រភេទអាជ្ញាប័ណ្ណដែលយើងបានលើកឡើងមុននេះ ហើយវាក៏ជាកត្តាមួយដែលផ្តល់ឲ្យយើងនូវសិទ្ធិខុសៗគ្នាក្នុងការធ្វើប្រតិបត្តិការនៅលើទីផ្សារ ។ កំណើនឥណទានមិនមានការកើនឡើងលឿននោះទេ ពីព្រោះប្រាក់ចំណេញរបស់ធនាគារភាគច្រើនបានមកពីការផ្តល់ឥណទាន ។ នៅពេលដែលកំណើនឥណទានរបស់យើងមានកម្រិត វាប៉ះពាល់ដល់សមត្ថភាពក្នុងការរក្សាឲ្យនៅកម្រិតជាក់លាក់មួយ ។ ទីបី វារឹតបន្តឹងកម្រិតប្រាក់ចំណេញ ។ ដូច្នេះ សរុបមកបញ្ហាប្រឈម គឺអត្រាការប្រាក់ទាប កំណើនឥណទានមានកម្រិត និងការរឹតបន្តឹងកំរិតប្រាក់ចំណេញ ។
អាម៉ាហ្សាឌៀ ៖ ខណៈពេលដែលអតិថិជនអាចទទួលបានអត្ថប្រយោជន៍ពីអត្រាការប្រាក់ទាប តើធនាគារ ឈីហ្វ បានធ្វើអ្វីខ្លះដើម្បីចៀសពីដំណាក់កាលលំបាកនេះ ?
លោក បណ្ឌិត ម៉ូរ៉ារិទ្ធ ៖ ចាប់តាំងពីយើងបានវិវឌ្ឍខ្លួនពីធនាគារឯកទេសទៅជាធនាគារពាណិជ្ជ មក យើងអាចផ្តល់សេវាហិរញ្ញវត្ថុពេញលេញបាន រួមទាំងការទទួលប្រាក់បញ្ញើពីសាធារណជន ជាពិសេសអតិថិជនដែលមានប្រភពចំណូលសមរម្យ និងស្របច្បាប់ ។ សេវាកម្មឥណទាន គឺជាជំនាញបឋមរបស់យើង សេវាកម្មហិរញ្ញវត្ថុពាណិជ្ជកម្ម ផ្តោតលើការផ្តល់ហិរញ្ញប្បទានដល់ប្រតិបត្តិការពាណិជ្ជកម្មអន្តរជាតិ ការប្តូររូបិយប័ណ្ណបរទេស ដែលនិយាយឲ្យសាមញ្ញមានន័យថា ការប្តូររូបិយប័ណ្ណរបស់ប្រទេសមួយ ទៅប្រទេសមួយទៀត ការផ្ទេរប្រាក់ ឬការទូទាត់ប្រាក់ និងសេវាធនាគារចល័ត ។ ទន្ទឹមនឹងនេះដែរ សេវាកម្ម ATM របស់ធនាគារ គឺមានលក្ខណពិសេស ដោយសាយើង ជាសមាជិក Cambodian Shared Switch (CSS) ដូច្នេះអ្នកដែលកាន់កាត ATM របស់ធនាគារ ឈីហ្វ អាចដកប្រាក់ និងផ្ទេរប្រាក់នៅទូទាំងប្រទេសពីម៉ាស៊ីន ATM របស់ធនាគារផ្សេងៗដែលជាសមាជិករបស់ CSS ផងដែរ ។ CSS គឺជាប្រព័ន្ធប្រតិបត្តិការណ៍ហិរញ្ញវត្ថុអន្តរធនាគារ ដែលត្រូវបានដាក់អោយប្រើប្រាស់ ដោយធនាគារជាតិនៃកម្ពុជា ។
ដូច្នេះ វាពិតជាមានភាពងាយស្រួលណាស់ ។ អ្នកអាចប្រើប្រាស់ទូរ ATM របស់ធនាគារ ឈីហ្វ ដើម្បីដកប្រាក់ពីធនាគារណាមួយនៅខេត្តព្រះសីហនុ បានដរាបណាធនាគារនោះ មានទូរ ATM និងជាសមាជិកភាព CSS ។ គ្រឹះស្ថានមីក្រូហិរញ្ញវត្ថុធំៗ ក៏ជាសមាជិក CSS ដែរ ។ ធនាគារ ឈីហ្វ កំពុងដំណើរការនូវគម្រោងដើម្បីធ្វើឲ្យការប្រើប្រាស់មានភាពកាន់តែងាយស្រួលសម្រាប់អតិថិជន ។ នៅចុងឆ្នាំនេះ យើងនឹងមានសេវាកម្មមួយផ្សេងទៀតដែល អនុញ្ញាតឲ្យមានការផ្ទេរប្រាក់តាមរយៈប្រព័ន្ធបាគង ដែលជាគម្រោងដ៏ល្អមួយត្រូវបានផ្តួចផ្តើមដោយធនាគារជាតិ ។ ទន្ទឹមនឹងនេះ យើងនឹងខិតខំឲ្យអស់ពីសមត្ថភាព ដើម្បីបង្កើនភាពងាយស្រួលក្នុងការផ្ទេរប្រាក់ និងដាក់ប្រាក់ជាដើម ។
អាម៉ាហ្សាឌៀ ៖ សេវាធនាគារចល័ត គឺជាយុទ្ធសាស្ត្រមួយដែលធនាគារបានប្រើប្រាស់ ដើម្បីតាមឲ្យទាន់ក្នុងវិស័យឌីជីថល ។ តើលោក បណ្ឌិត អាចប្រាប់អំពីការអភិវឌ្ឍនៃសេវាធនាគារចល័តរបស់ ធនាគារឈីហ្វ បានដែរ ឬទេ ?
លោក បណ្ឌិត ម៉ូរ៉ារិទ្ធ ៖ សេវាធនាគារចល័តរបស់ធនាគារ ឈីហ្វ មានមុខងារច្រើនណាស់ ។ អតិថិជនអាចពិនិត្យមើលសមតុល្យនៅក្នុងគណនីដោយមិនចាំបាច់មកធនាគារផ្ទាល់ ។ ទីពីរ គឺពួកគេអាចប្រើសេវាកម្មបញ្ចូលទឹកប្រាក់ ដូចជាការទិញកាតទូរស័ព្ទ ការបង់ប្រាក់តាមអ៊ិនធើរណេត និងការទូទាត់ផ្សេងៗ ។ អតិថិជនក៏អាចផ្ទេរប្រាក់ទៅគណនីដទៃ ទៀតរបស់ធនាគារ ឈីហ្វបានដែរ ។ ពួកគេក៏អាចពិនិត្យមើលសេវាកម្មឥណទានដែលធនាគារ ឈីហ្វ មាននិងអាចទទួលបានព័ត៌មាន និងសារផ្សេងៗទៀតនៅលើទូរស័ព្ទដៃ ។ ក្នុងនោះក៏មានមុខងារ នៃផលិតផលផ្សេងទៀតដែលផ្តល់នូវភាពងាយស្រួលបំផុត នៅពេលត្រូវបានដាក់ឲ្យដំណើរការ ។
អាម៉ាហ្សាឌៀ ៖ តើនរណាជាអតិថិជនគោលដៅរបស់ធនាគារ ឈីហ្វ ?
លោក បណ្ឌិត ម៉ូរ៉ារិទ្ធ ៖ យើងមានផ្នែកអាជីវកម្មសំខាន់ៗចំនួនបីទាក់ទងនឹងអតិថិជនរបស់យើង ។ ដំបូងជា សហគ្រាសខ្នាតតូចបំផុត ខ្នាតតូច និងខ្នាតមធ្យម (MSMEs) ។ ទីពីរ ជាអតិថិជនទូទៅ ។ ទីបី អតិថិជន ជាក្រុមហ៊ុន ។ អតិថិជនទាំង ៣ នេះគឺជាផ្នែកដ៏សំខាន់សម្រាប់អាជីវកម្មធនាគារ ។ MSMEs សំដៅទៅលើសហគ្រាសខ្នាតតូចបំផុត តូច និងមធ្យម ។ ផ្នែកទី ២ ផ្តោតសំខាន់ទៅលើអតិថិជនទូទៅ (អតិថិជនដែលត្រូវការប្រាក់កម្ចី) ។ ផ្នែកទី ៣ គឺអតិថិជន ជាសាជីវកម្ម រួមទាំងក្រុមហ៊ុនផងដែរ ។ ទាំងនេះគឺជាអតិថិជនគោលដៅ ទាំងបីដែល យើងបានបម្រើការ ។ យើងផ្តោតទៅលើអតិថិជនដែលជាដៃគូរយៈពេលវែង ហើយយើងបានប្រឹងប្រែងឲ្យអស់ពីសមត្ថភាព ដើម្បីទទួលបាននូវការជឿទុកចិត្តគ្នាទៅវិញទៅមក ។ នៅពេលយើងមានការទុកចិត្តគ្នា យើងនឹងក្លាយជាដៃគូយូរអង្វែង ហើយតម្លាភាពនឹងមាន ដោយឯកឯង។ ទី ៤យើងបានបង្កើតនូវយីហោ តាមការសន្យា ដែលយើងសន្យាថាធនាគារ ឈីហ្វ ត្រូវបានបង្កើតឡើងដោយប្រជាជនកម្ពុជាសម្រាប់ប្រជាជនកម្ពុជា ។ ធនាគារត្រូវបានបង្កើតឡើងដោយប្រជាជនកម្ពុជារួមទាំងខ្ញុំផងដែរ ខណៈបុគ្គលិកភាគច្រើន ក៏ជាជនជាតិខ្មែរដែរ ។ មានជនបរទេសមកពីប្រទេសឥណ្ឌា ហុងកុង និងម៉ាឡេស៊ីដែលធ្វើការ នៅក្នុងធនាគារ ឈីហ្វ ប៉ុន្តែបុគ្គលិកភាគច្រើនជាប្រជាជនក្នុងស្រុក ។ លោកបណ្ឌិត និយាយថា ៖ «បង្កើតឡើងដោយប្រជាជនកម្ពុជាសម្រាប់ប្រជាជនកម្ពុជា គឺបង្ហាញពីការប្តេជ្ញាចិត្តរបស់យើងចំពោះប្រជាជនកម្ពុជា ។ យើងជាគ្រួសារ ឈីហ្វ ។ ហើយនេះគឺជាទស្សនវិជ្ជាដែលយើងបានអនុវត្ត ៕ ដោយសហការ
ចែករំលែកព័តមាននេះ