រាជធានីភ្នំពេញ ៖ នៅថ្ងៃពុធ ១ កើត ខែជេស្ឋ ឆ្នាំឆ្លូវ ព.ស.២៥៦៥ ត្រូវនឹងថ្ងៃទី ១២ ខែឧសភា ឆ្នាំ ២០២១ ក្រសួងអប់រំ យុវជន និងកីឡា និងក្រុមហ៊ុន មិត្តហ្វូន បានបើកកិច្ចប្រជុំមួយតាមប្រព័ន្ធវីដេអូអេឡិចត្រូនិក Zoom ស្តីអំពីគម្រោង ដាក់ឲ្យប្រើប្រាស់នូវប្រព័ន្ធ SIS System សម្រាប់សាលារៀនទូទាំងប្រទេសកម្ពុជា ដោយមានការចូលរួមដ៏ខ្ពង់ខ្ពស់ពី ឯកឧត្តមបណ្ឌិសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា​ និងថ្នាក់ដឹកនាំក្រសួងដែលពាក់ព័ន្ធ ព្រមទាំងវត្តមាន លោក ហ្វុង វ៉ាន់គឿង នាយកប្រតិបត្តិរបស់ក្រុមហ៊ុន មិត្តហ្វូន​  ព្រមទាំងគណៈគ្រប់គ្រង ។

នៅក្នុងកិច្ចប្រជុំ លោក ហ្វុង វ៉ាន់ គឿង បានលើកឡើងអំពីចក្ខុវិស័យរបស់ក្រុមហ៊ុន មិត្តហ្វូន និងការចូលរួមចំណែកអភិវឌ្ឍន៍វិស័យអប់រំនៅកម្ពុជា ។ លោក ហ្វុង វ៉ាន់ គឿង ក៏បានលើកឡើងផងដែរថា ក្រុមហ៊ុន មិត្តហ្វូន បានផ្តល់ជូនដោយឥតគិតថ្លៃនូវប្រព័ន្ធអុីនធឺណិតចំនួន ១,០០០ ខ្សែដល់ក្រសួង អប់រំ យុវជន និងកីឡាសម្រាប់ប្រើប្រាស់អស់រយៈពេលជាង ១០ ឆ្នាំមកហើយ ។​ ជាជំហ៊ានបន្ត ក្រុមហ៊ុន មិត្តហ្វូន នឹងបន្តការសហប្រតិបត្តិការជាមួយក្រសួងនេះដើម្បីអនុវត្តន៏ផែនការយុទ្ធសាស្ត្រនៃវិស័យអប់រំអោយកាន់តែទូលំទូលាយថែមទៀត ។ ក្នុងឱកាសនោះគណៈគ្រប់គ្រងរបស់ក្រុមហ៊ុន មិត្តហ្វូន ក៏បានធ្វើបទបង្ហាញអំពីកាលានុវត្តន៍ភាព ទៅលើគម្រោងប្រព័ន្ធបច្ចេកវិទ្យា SIS System ដែលជាគម្រោងមួយ សម្រួលការសិក្សារបស់សិស្ស និងការបង្រៀនរបស់គ្រូទូទាំងប្រទេស ។ ​រហូតមកដល់បច្ចុប្បន្ននេះ ប្រព័ន្ធនេះ បានដាក់ឲ្យប្រើប្រាស់ចំនួន ១៥០ សាលារៀនរួចរាល់ហើយ ដែលមានថ្នាក់រៀនចំនួន ៥,០៦៧ បន្ទប់ ចំនួនសិស្ស ២២១,៨០៧ នាក់ និងមានគ្រូបង្រៀនចំនួន​ ១០,៨៤៨ នាក់ ។ ជាពិសេស គ្រូបង្រៀន និងសិស្សានុសិស្សកំពុងបង្រៀននិងរៀនពីចម្ងាយតាមរយៈប្រព័ន្ធ E-Learning (Online learning-teaching) ដែលជាផ្នែកមួយនៅក្នុងប្រព័ន្ធ SIS System ។

នៅក្នុងឆ្នាំ ២០២១ នេះ​ ក្រុមហ៊ុន មិត្តហ្វូន មានគម្រោងពង្រីក រហូតទៅដល់ ១,០០០​ សាលារៀន និងប្រព័ន្ធ ត្រួតពិនិត្យតាមអនឡាញជាក់ស្តែងសម្រាប់ក្រសួង ព្រមទាំងបង្វឹកលោកគ្រូ អ្នកគ្រូចំនួន ៣០,០០០ នាក់ ឲ្យចេះប្រើប្រាស់ប្រព័ន្ធ (SIS System) ដែលនៅក្នុងនោះ លោកគ្រូ អ្នកគ្រូ ចំនួន ១០,០០០នាក់ នឹងត្រូវបានបង្វឹក ឲ្យចេះប្រើប្រាស់នូវ ប្រព័ន្ធបង្រៀនពីចម្ងាយ (E-Learning) បន្ថែមទៀត ។ នៅក្នុងផែនការស្ថិតិ សិស្សចំនួន ៨០០,០០០ នាក់​ ត្រៀមដាក់បញ្ចូលទៅក្នុងប្រព័ន្ធ (SIS System) ក្នុងចំណោមសិស្សទាំងនោះ មានសិស្សចំនួន ២០០,០០០នាក់ នឹងត្រូវបង្រៀនឲ្យចេះ​ប្រើប្រាស់ការសិក្សាពីចម្ងាយ (E-learning) តាមរយៈប្រព័ន្ធ (SIS System) នេះ ។

បន្ទាប់ពីបានស្តាប់ការធ្វើបទបង្ហាញរបស់ក្រុមហ៊ុន មិត្តហ្វូន រួចមក ឯកឧត្តមបណ្ឌិតសភាចារ្យ ហង់ ជួន​ណារ៉ុន បានកោតសសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រុមហ៊ុន មិត្តហ្វូន ដែលជួយបង្កើតនូវប្រព័ន្ធនេះឡើង ។ ក្នុងឱកាសនោះ ឯកឧត្តមបណ្ឌិតសភាចារ្យរដ្ឋមន្ត្រីបានចែករំលែកបទពិសោធន៍ល្អៗ និងបានបង្ហាញអំពីអាទិភាពសំខាន់ៗក្នុងវិស័យអប់រំសម្រាប់ឆ្នាំ ២០២១ ជាពិសេសបានឆ្លុះបញ្ចាំងពីគំនិតនវានុវត្តន៍ក្នុងការធ្វើកំណែទម្រង់ការអប់រំតាមប្រព័ន្ធឌីជីថលឲ្យទទួលបានជោគជ័យ និងបានណែនាំដល់មន្ទីរអប់រំ យុវជន និងកីឡា ២៥ រាជធានី/ខេត្ត ត្រូវពន្លឿនការចាក់វ៉ាក់សាំងដល់ បុគ្គលិកអប់រំឲ្យបានគ្រប់ៗគ្នា ក្នុងដំណាក់កាលនៃការរីករាលដាលនៃជំងឺកូវីដ ១៩ ជាពិសេសឯកឧត្តមរដ្ឋមន្រ្តីបានស្នើឲ្យមានការបង្កើតការិយាល័យបច្ចេកវិទ្យាព័ត៌មាននៅតាមមន្ទីរ ការិយាល័យអប់រំ យុវជន និងកីឡា រាជធានី-ខេត្ត ព្រមទាំងជនបង្គោលព័ត៌មានវិទ្យាតាមសាលារៀននីមួយៗផងដែរ ។ ហើយឯកឧត្តម ក៏បានស្នើរសុំអោយបណ្តាមន្ទីរ អប់រំ យុវជន និងកីឡា គ្រប់បណ្តាខេត្ត ក្រុងឲ្យជ្រើសរើសគ្រូ បង្គោលដើម្បីអោយចូលរៀនវគ្គបណ្តុះបណ្តាលអំពីរបៀបប្រើប្រាស់ប្រព័ន្ធ SIS System សម្រាប់មន្ទីររបស់ខ្លួន ដើម្បីអោយចេះពីរបៀបបង្រៀនពីចម្ងាយនេះ ៕