ខេត្តកំពង់ឆ្នាំង ៖ ក្រុមអាជីវករលក់ដូរនៅផ្សារកំពង់ត្រឡាចបានត្អូញត្អែរពីផលប៉ះពាល់ បន្ទាប់ពីមានការរៀបចំសណ្តាប់ធ្នាប់របស់អាជ្ញាធរស្រុករួចមក ។ ពួកគាត់បានលើកឡើងថា ការលក់ដូរមិនសូវដាច់ និងមានការលំបាកដូចជា ត្រូវថ្ងៃ ត្រូវភ្លៀង…
ខេត្តកំពង់ឆ្នាំង ៖ ក្រុមអាជីវករលក់ដូរនៅផ្សារកំពង់ត្រឡាចបានត្អូញត្អែរពីផលប៉ះពាល់ បន្ទាប់ពីមានការរៀបចំសណ្តាប់ធ្នាប់របស់អាជ្ញាធរស្រុករួចមក ។ ពួកគាត់បានលើកឡើងថា ការលក់ដូរមិនសូវដាច់ និងមានការលំបាកដូចជា ត្រូវថ្ងៃ ត្រូវភ្លៀង ពេលអាជ្ញាធរឲ្យកាត់សំយាបចេញ ហេតុដូចច្នេះហើយពួកគាត់សំណូមពរដល់អាជ្ញាធរស្រុកខេត្ត សូមមេត្តាកុំរិតបន្តឹងខ្លាំងពេកដូចជា ការគូសគំនូសកំណត់ឲ្យដាក់លក់ ចូលក្នុងខ្លាំងពេកជាដើម ម្យ៉ាងវិញទៀតសូមធ្វើឲ្យស្មើភាពគ្នាកុំលំអៀង ។
ក្រុមអាជីវករទាំងនោះបានលើកឡើងថា ពួកគាត់មិនជំទាស់ក្នុងការរៀបចំសណ្ដាប់ធ្នាប់របស់អាជ្ញាធរស្រុកនោះទេ ប៉ុន្តែសូមមេត្តាកុំរិតបន្តឹងខ្លាំងពេកដូចជា គូសគំនូសដាក់កំណត់ឱ្យលក់រហូតដល់ចូលដល់ក្នុងផ្ទះតែម្តង សូមជួយអធ្យាស្រ័យដល់ពួកគាត់ជាអាជីវករផងព្រោះបន្ទាប់ពីរៀបចំរបស់អាជ្ញាធរមក ពួកគាត់លក់មិនសូវដាច់ឡើយប៉ះពាល់ដល់ជីវភាពប្រចាំថ្ងៃរបស់ពួកគាត់ ។ បងស្រីអាជីវករលក់អង្ករ និងលក់ជីម្នាក់បាននិយាយថា គាត់ត្រូវបានអាជ្ញាធរកំណត់ឲ្យមូរយាប (យាបរមូលចេញចូលបាន) ចូលក្នុងដោយមិនឲ្យលាចេញក្រៅឡើយ ពេលនេះទំនិញគាត់ត្រូវថ្ងៃ ត្រូវភ្លៀង គាត់សំណូមពរសុំលាយាបគាត់បានចេញបន្តិច មិនដល់ថ្នាក់លានទៅថ្នល់ទេ ដើម្បីការពារកម្តៅថ្ងៃ និងទឹកភ្លៀង ។
ចំណែកស្ត្រីលក់បាយម្នាក់បាននិយាយថា អាជ្ញាធរមិនបានជូនដំណឹងជាមុនទេ ពេលមកដល់ចាប់រើៗ បង្ខំឲ្យរើចេញតែម្តង សូម្បីដើមប្រទាល និងធុងទឹកកកគាត់ឲ្យរើចេញដែរ ខណៈដែលរបស់ទាំងនេះបានដាក់ផុតថ្នល់ ដល់គម្របលូមុខផ្ទះទៅហើយ គាត់មិនអាចទទួលយកបានទេ មកបាញ់គំនូសចូលដល់ក្នុងផ្ទះបែបនេះ ។ ដោយឡែកបុរសអ្នកលក់នំបញ្ចុកម្នាក់ថា គេឲ្យគាត់ចូលក្នុងកន្លះម៉ែត្រទៀត គាត់ថា បើចូលក្នុងទៀតប៉ះគេហើយ គាត់គ្មានកន្លែងលក់ឡើយ ។ ក្រុមអាជីវករទាំងអស់សំណូមពរ សូមអាជ្ញាធរកុំរិតបន្តឹងខ្លាំងពេកសុំយោគយល់អធ្យាស្រ័យខ្លះដល់ពួកគាត់ផង ។
ជាមួយគ្នានេះដែរលោក ស៊ន សំអាត អភិបាលរងស្រុកកំពង់ត្រឡាចបានបញ្ជាក់ថា ដោយទទួលបញ្ជាពីអភិបាលខេត្ត និងអភិបាលស្រុកលោកបានដឹកនាំកម្លាំងចុះរៀបចំសណ្តាប់ធ្នាប់ផ្សារ ពិសេសនៅពីខាងត្បូងផ្សារដែលជាផ្លូវបេតុង ។ នៅទីនោះក្រុមអាជីវករបានលក់ចូលលើផ្លូវអស់ពាក់កណ្តាលតែម្តង មានអ្នកលក់ផ្លែឈើ អ្នកលក់បាយជាដើម ។ ជាមួយគ្នានេះ កន្លែងចាក់សម្រាមរួមផ្សំអ្នកលក់បន្លែផង គឺបណ្តាលឲ្យស្ទះជារៀងរាល់ថ្ងៃ ។ គាត់បានឲ្យក្រុមអាជីវករទាំងនោះលក់ថយទៅក្នុង និងរុញយាបឲ្យចូលកំឲ្យចេញមកក្រៅ ។ ហើយក្រុមអាជីរករទាំងនោះព្រមរៀបចំតាម ឃើញថាបានស្អាតអាចទទួលយកបាន ។ លោកថា ធម្មតាទេ តែកាលណារៀបសណ្តាប់ធ្នាប់ គឺតែងមានប៉ះពាល់ខ្លះហើយ។
យ៉ាងនេះក្តីប្រជាពលរដ្ឋថា ការរៀបចំសណ្តាប់ធ្នាប់របស់អាជ្ញាធរស្រុកហាក់មានការតឹងតែងខ្លាំងពេក ធ្វើឲ្យប៉ះពាល់ដល់អាជីវកម្មរបស់ពួកគាត់ ដែលទាមទារឲ្យអាជ្ញាធរបន្ធូរបន្ថយខ្លះ ដល់ពួកគាត់ផងព្រោះគាត់មានបញ្ហាទី១លក់មិនសូវដាច់ដូចមុន ទី២ ពិបាកក្នុងការលក់ដូរ ៕
ចែករំលែកព័តមាននេះ