រាជធានីភ្នំពេញ ៖ ករណីគ្រោះថ្នាក់មួយដែលបង្កឡើងដោយរថយន្តស៊េរីទំនើបម៉ាក HUMMER មួយគ្រឿង ដែលបើកបរដោយមន្ត្រីនគរបាលម្នាក់បានបោះពួយក្នុងល្បឿនយ៉ាងលឿនទៅបុករថយន្តម៉ាក TRITON មួយគ្រឿងចំពាក់កណ្តាលពេញទំហឹងខ្ទាតទៅប៉ះម៉ូតូមួយគ្រឿងទៀតបណ្តាលឱ្យស្ត្រីវ័យចំណាស់ម្នាក់បាក់ជើងម្ខាង ហើយអ្នកបើកបររថយន្តបង្កចុះរត់ឡើងជិះម៉ូតូរត់គេចខ្លួនបាត់ស្រមោល ។…
រាជធានីភ្នំពេញ ៖ ករណីគ្រោះថ្នាក់មួយដែលបង្កឡើងដោយរថយន្តស៊េរីទំនើបម៉ាក HUMMER មួយគ្រឿង ដែលបើកបរដោយមន្ត្រីនគរបាលម្នាក់បានបោះពួយក្នុងល្បឿនយ៉ាងលឿនទៅបុករថយន្តម៉ាក TRITON មួយគ្រឿងចំពាក់កណ្តាលពេញទំហឹងខ្ទាតទៅប៉ះម៉ូតូមួយគ្រឿងទៀតបណ្តាលឱ្យស្ត្រីវ័យចំណាស់ម្នាក់បាក់ជើងម្ខាង ហើយអ្នកបើកបររថយន្តបង្កចុះរត់ឡើងជិះម៉ូតូរត់គេចខ្លួនបាត់ស្រមោល ។
ករណីគ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង១១និង០០នាទីព្រឹក ថ្ងៃទី២០ ខែកុម្ភៈ ឆ្នាំ២០១៨ នៅចំណុចផ្លូវលេខ ៦១កែងនឹងផ្លូវលេខ៨៤ ក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីកម្លាំងមានសម្ថកិច្ចបានប្រាប់ឱ្យដឹងថា មុនពេលកើតហេតុគេបានឃើញរថយន្តម៉ាក TRITON ពណ៌ស ពាក់ស្លាកលេខ ភ្នំពេញ ២AQ-៧៥៥៩ មួយគ្រឿងបើកបរដោយបុរសម្នាក់តាមបណ្តោយផ្លូវលេខ៦១ក្នុងទិសដៅពីត្បូងទៅជើង ។
លុះមកដល់ចំណុចខាងលើដដែលជាចំណុចផ្លូវបំបែកជា៤នោះក៏ស្រាប់តែមានរថយន្តស៊េរីទំនើបម៉ាក HUMMER ពណ៌ក្រហម ពាក់ស្លាកលេខ ភ្នំពេញ ២AK-៦៩៤៧ មួយគ្រឿងដែលបើកបរដោយមន្ត្រីនគរបាលនៃក្រសួងមហាផ្ទៃម្នាក់ក្នុងទិសដៅពីកើតទៅលិចបោះពួយក្នុងល្បឿនយ៉ាងលឿនបុកចំពាក់កណ្តាលពេញទំហឹងខ្ទាតទៅប៉ះនឹងម៉ូតូម៉ាកគុប៩០ ពណ៌ទឹកប៊ិច ពាក់ស្លាកលេខ ភ្នំពេញ ១BV-៦៣៥២ មួយគ្រឿងទៀតបណ្តាលឱ្យស្ត្រីវ័យចំណាស់ម្នាក់ដែលជិះខាងក្រោយដួលបាក់ជើងម្ខាងតែម្តង ។
តាមប្រភពដដែលបានប្រាប់បន្តទៀតថា ក្រោយពេលកើតហេតុបុរសដែលអះអាងថា ខ្លូនជានគរបាលនៅក្រសួងមហាផ្ទៃដែលបើករថយន្តម៉ាក HUMMER បង្កនោះបានចុះឡើងជិះម៉ូតូមួយគ្រឿងរត់គេចខ្លួនបាត់ស្រមោលដោយប្រាប់ថា ខ្លួនមានការប្រញាប់ទៅប្រជុំ ។
ពាក់ព័ន្ធទៅនឹងករណីគ្រោះថ្នាកើចរាចរណ៍នេះដែរ គឺកើតឡើងដោយសារតែអ្នកបើកបររថយន្តម៉ាក HUMMER បង្កបើកបរដោយខ្វះការប្រុងប្រយ័ត្នដោយបានបង្កឱ្យស្ត្រីវ័យចំណាស់ម្នាក់រងរបួសបាក់ជើង ហើយរថយន្តម៉ាក TRITON មួយគ្រឿងបាក់កាឡេ និងក្រពឹតអស់មួយចំហៀងខាងស្តាំរងការខូចខាតយ៉ាងដំណំ ។
ក្រោយពេលកើតហេតុស្ត្រីវ័យចំណាស់រងគ្រោះត្រូវបានបុរសអ្នកបើកបរម៉ូតូបញ្ជូនតាមម៉ូតូរ៉ឺម៉កកង់បីយកទៅសង្គ្រោះនៅមន្ទីរពេទ្យកាល់ម៉ែត្រ ហើយកម្លាំងមានសម្ថកិច្ចមូលដ្ឋានក៏បានចុះទៅដល់កន្លែងកើតហេតុធ្វើការវាស់វែងរកខុសត្រូវ និងបញ្ជូនរថយន្តទាំង២គ្រឿង និងម៉ូតូមួយគ្រឿងរបស់ជនរងគ្រោះយកទៅរក្សាទុកនៅការិយាល័យចរាចរណ៍រាជធានីភ្នំពេញដើម្បីរង់ចាំធ្វើការដោះស្រាយគ្រាជាបន្តទៅទៀត ៕
ចែករំលែកព័តមាននេះ