ខេត្តពោធិ៍សាត់ ៖ កាលពីព្រឹកថ្ងៃទី៩ មីនា ២០១១ ក្រុមប្រឹក្សារំសាយកងកម្លាំងប្រដាប់អាវុធសហការជាមួយអង្គការ JICA បានបើកសិក្ខាសាលាស្តីពីការស្វែងរកទីផ្សារការងារ និងដៃគូបណ្តុះបណ្តាលវិជ្ជាជីវៈជូនយោធិនរំសាយទ្រង់ទ្រាយធំជំហាន១ ។ ពិធីនេះបានប្រារព្ធធ្វើនៅមន្ទីរសង្គមកិច្ចអតីតយុទ្ធជន និងយុវនីតិសម្បទា ក្រោមអធីបតីភាពលោកខូយ សុខា អភិបាលខេត្ត និងលោកអ៊ុក រិន អគ្គលេខាធិការរងនៃអគ្គលេខាធិការដ្ឋានក្រុមប្រឹក្សារំសាយកងកម្លាំងប្រដាប់អាវុធ តំណាងអង្គការ អភិបាលស្រុក និងមេឃុំ ។
លោកញ៉ឹក សារ៉េត ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តបានជម្រាបជូនថា យោធិនរំសាយទ្រង់ទ្រាយធំជំហានមួយដែលបានកាត់រំសាយនៅឆ្នាំ២០០១ កំពុងរស់នៅក្នុងខេត្តពោធិ៍សាត់ចំនួន៤៦៥
នាក់ ក្នុងនោះយោធិនប្រភេទ១ចំនួន២១២នាក់ ប្រភេទ ២ ចំនួន២៥៣នាក់ ។ ការបណ្តុះ បណ្តាលនេះនឹងធ្វើទៅតាមតម្រូវការរបស់យោធិនរំសាយ និងគ្រួសារ ព្រមទាំងពិភាក្សាអំពីទីផ្សារការងារនៅតាមជនបទ ទីប្រជុំជន និងនៅទីក្រុង ។ លទ្ធផលសមត្ថភាពរបស់យោធិនរំសាយ និងគ្រួសារដែលទាក់ទងនឹងមុខជំនាញត្រូវបណ្តុះបណ្តាលស្វែងរកដៃគូ ដើម្បីសហការបណ្តុះបណ្តាលលើមុខវិជ្ជាជីវៈ ។ សិក្សា ផ្តោតសំខាន់ទៅលើការងារកសិកម្ម សិប្បកម្ម ឥណទានខ្នាតតូច ជំនួញខ្នាតតូច ជួសជុលគ្រឿងយន្ត អគ្គិសនី និងអេឡិចត្រូនិក ។
លោកខូយ សុខា មានប្រសាសន៍ថា ការកាត់រំសាយទ័ពឆ្នាំ២០១១ គឺជាការអនុវត្តគោលនយោបាយកំណែទម្រង់កងកម្លាំងប្រដាប់អាវុធរបស់រាជរដ្ឋាភិបាល ហើយមកទល់ពេលនេះស្ថានភាពរបស់យោធិនរំសាយអាចមានការកែប្រែដោយអ្នកខ្លះចាស់ជរា អ្នកខ្លះទុព្វលភាព និងមានអ្នកខ្លះផ្លាស់ប្តូរទីលំនៅទៀតផង ។ ការយកចិត្តទុកដាក់ដោះស្រាយមុខរបរផ្តល់ការងារដោយផ្តើមចេញពីការបណ្តុះបណ្តាលមុខជំនាញ វិជ្ជាជីវៈច្បាស់លាស់បង្កលក្ខណៈជាមធ្យោបាយ សំភារផ្តល់ឥណទានដល់ពួកគាត់ គឺជាមធ្យោបាយអាចជួយឱ្យបងប្អូនយោធិនរំសាយ និងគ្រួសារមានឱកាសចូលរួមចំណែកលើកស្ទួយស្ថានភាពសេដ្ឋកិច្ចគ្រួសារកាន់តែប្រសើរឡើង រួមចំណែកកាត់បន្ថយភាពក្រីក្រ ។ នៅពេលមានមុខរបរដែលមានចំណូលសមរម្យ ពួកគាត់រស់នៅជួបជុំក្រុមគ្រួសារមិនធ្វើចំណាកស្រុកដែលកាត់បន្ថយការប្រឈមមុខនឹងភាពងាយរងគ្រោះផ្សេងៗ ។ លោកអភិបាលខេត្តសង្ឃឹមថា អង្គសិក្ខាសាលានេះនឹងបញ្ចេញមតិយោបល់ពិភាក្សា តាមកម្មវិធីដែលបានគ្រោងទុកទៅលើលទ្ធភាព ជាក់ស្តែងរបស់យោធិនរំសាយ និងក្រុមគ្រួសារ ស្របនឹងស្ថានភាពទីផ្សារបច្ចុប្បន្ន ដើម្បី ជ្រើសរើសនូវមុខជំនាញវិជ្ជាជីវៈសម្រាប់ធ្វើការបណ្តុះបណ្តាល ដើម្បីបង្កើត ឬពង្រីកមុខរបរនាពេលអនាគត ។
នៅក្នុងឱកាសនោះគណៈអធិបតីបានធ្វើពិធីប្រគល់ថវិកាមរណៈសង្គ្រោះថ្នាក់កណ្តាលចំនួន១២.០០០.០០០រៀល ជូនដល់គ្រួសារសពដែលសមាជិករបស់សមាគមអតីតយុទ្ធជនកម្ពុជាខេត្តពោធិ៍សាត់ចំនួន៣នាក់ម្នាក់៤.០០០.០០០រៀល គឺ ១-គ្រួសារជនពលីឈ្មោះញ៉ាំង វ៉ែន រស់នៅឃុំបឹងខ្នារ ស្រុកបាកាន ត្រូវប្រគល់ឱ្យទៅឈ្មោះឆាយ សាវន ភេទស្រី ត្រូវជាកូន ។ ២-ជនពិការឈ្មោះម៉ៃ ចាន់ថា នៅឃុំត្នោតជុំ ស្រុកក្រគរ ប្រគល់ឱ្យទៅឈ្មោះមឿង សួស ភេទស្រី ត្រូវជាប្រពន្ធ ។ ៣-គ្រួសារជនពលីឈ្មោះជុក ណុត នៅឃុំអន្លង់ត្នោត ស្រុកក្រគរ ប្រគល់ឱ្យទៅឈ្មោះទួត ហុង ភេទស្រី ត្រូវជាកូន៕
ចែករំលែកព័តមាននេះ