រាជធានីភ្នំពេញ ៖ លោកម៉ៅ មុនីវណ្ណ អតីតតំណាងរាស្ត្រមណ្ឌលកំពង់ចាម និងបច្ចុប្បន្នជាប្រធានក្រុមការងារគណបក្សសម រង្ស៊ី ប្រចាំខេត្តតាកែវ បានប្រកាសលាឈប់ពីតំណាងរាស្ត្រគណបក្សសម រង្ស៊ី ជាផ្លូវការនិងសុំឱ្យមានការកែទម្រង់គណបក្សនេះជាបន្ទាន់។ លោកអះអាងថា គណបក្សសម រង្ស៊ី ស្ថិតនៅក្នុងគំនាបគ្រួសារលោក យឹម សុវណ្ណ និងលោកអេង ឆៃអ៊ាង ។ ការប្រកាសបែបនេះក្នុងសន្និសីទកាសែតមួយនៅឯ មន្ទីរដ្ឋសភានាព្រឹកថ្ងៃទី២២ មីនា ឆ្នាំ២០១១។
លោកម៉ៅ មុនីវណ្ណ ថ្លែងថា លោកសម រង្ស៊ី កំពុងស្ថិតនៅក្នុងគំនាបគ្រួសាររបស់លោកយឹម សុវណ្ណ និងលោកអេង ឆៃអ៊ាង ។ លោកអំពាវនាវឱ្យថ្នាក់ដឹកនាំគណបក្សសម រង្ស៊ី ទាំងអស់ជួយរំដោះលោកសម រង្ស៊ី ចេញពីគំនាបនេះ។ បើគ្មានការកែទម្រង់ទេ លោកម៉ៅ មុនីវណ្ណ អំពាវនាវឱ្យសមាជិកគណបក្សសម រង្ស៊ី ទៅចូលរួមជាមួយគណបក្សណាដែលមានប្រជាធិបតេយ្យពិតប្រាកដ ។
លោកម៉ៅ មុនីវណ្ណ បន្តថា គោលការណ៍ សំខាន់ដែលលោកធ្វើសន្និសីទនេះចង់បញ្ជាក់ប្រាប់សកម្មជនទាំងអស់ឱ្យដឹងថា ថ្នាក់ដឹកនាំត្រូវតែអនុវត្តគោលការណ៍ពាក់កណ្តាលអាណត្តិនៅពេលខ្លួនបាននិយាយជាសាធាណៈ។ លោកចង់ឱ្យគណបក្សមានគោលការណ៍ប្រជាធិបតេយ្យពិតប្រាកដ កុំឲ្យអំណាចធ្លាក់ទៅលើតែពីរគ្រួសារនេះ ។លោកអំពាវនាវឲ្យគណៈកម្មាធិការនាយកគណបក្សរួមជាមួយលោកទម្លាក់មេដឹកនាំណាដែលគ្មានសីលធម៌ដែលប្រព្រឹត្តល្បែងស៊ីសង និងចង់រំដោះលោកសម រង្ស៊ី ចេញពីគ្រួសារពីរនេះ។
លោកម៉ៅ មុនីវណ្ណ ថ្លែងថា «ខ្ញុំគ្រាន់តែចង់ឲ្យមានការកែប្រែផ្ទៃក្នុងរបស់គណបក្ស តើខ្ញុំ ខុសអី ឬខ្ញុំចង់កែទម្រង់ទៅវាមានការប៉ះពាល់ដល់គ្រួសារទាំងពីរនោះ តែបែរកំចាត់ខ្ញុំចេញវាមានន័យថាអំណាចគណបក្សនេះ ស្ថិត នៅលើដៃពីរគ្រួសារនេះហើយ។ សូមសកម្មជនទាំងអស់គិតមើលទៅ តើពួកយើងគួរបំរើគ្រួសារ ពីរនោះឬបំរើជាតិ។ ខ្ញុំចាប់តាំងពីធ្វើនយោបាយមកមិនដែលមានសាច់ញាតិ ឬគ្រួសារនៅគណបក្សទេ» ។
លោកបន្តថា បើគ្រាន់តែលោកតវ៉ាក្នុងការកែទម្រង់បក្ស ហើយបែរជាគេដេញចេញពីបក្ស គឺសកម្មជនរបស់លោកនៅកំពង់ចាមពិតជានៅមិនស្ងៀមទេ ពីព្រោះលោកបានជាប់ឆ្នោតដោយសារមានការបោះឆ្នោតឲ្យ មិនមែនបានមកដោយសារគណបក្សសម រង្ស៊ី ឲ្យនោះទេ»។
លោកម៉ៅ មុនីវណ្ណ អះអាងថា លោក មិនទាន់បានសំរេចចិត្តទៅចូលរួមជាមួយគណបក្សប្រជាជនកម្ពុជានៅឡើយទេ ដែលពេលនេះលោកនៅតែជាមន្រ្តីជាន់ខ្ពស់របស់គណបក្សសម រង្ស៊ីដដែល។ លោកឱ្យដឹងថា មានអ្នកមិន សប្បាយចិត្តជាច្រើននៅក្នុងគណបក្សសម រង្ស៊ី ដោយបញ្ជាក់ថា បើមានការបោះឆ្នោតជ្រើសរើសអគ្គលេខាបក្សថ្មីនឹងមានបេក្ខជនថ្មីឈរឈ្មោះ ។ មានការអះអាងថា លោកបានទៅចូលរួមជាមួយគណបក្សប្រជាជនកម្ពុជាវាគ្រាន់តែជាការលាបពណ៌របស់ក្រុមមួយវាជារឿងដដែលៗទេ។
លោកម៉ៅ មុនីវណ្ណ បានបន្តថា កន្លងមក មានការងើបឈរឡើងរបស់សមាជិកមួយចំនួនដែរអំពីបញ្ហានេះ តែក្រោយមកត្រូវបានគេ ហៅទៅបង្រ្កាបជាបន្តបន្ទាប់ជាការសម្របសម្រួលទេ នៅពេលមានការស្នើឲ្យអនុវត្តគោលការណ៍ពាក់កណ្តាលអាណត្តិកន្លងមក ។ ប៉ុន្តែ មានការសន្យារបស់ថ្នាក់ដឹកនាំគ្រាន់តែកុហកហើយតាមពិតវាត្រូវតែគោរពសេចក្តីសំរេចរបស់ខ្លួនដែលបានចុះហត្ថលេខាទាំងអស់គ្នា នោះដែលគ្រោងធ្វើនៅក្នុងថ្ងៃទី២៤មីនា ២០១១ ខាងមុខនេះ ដើម្បីអនុវត្តគោលការណ៍ពាក់កណ្តាលអាណត្តិនេះហើយ។
លោកសុន ឆ័យ ប្រធានក្រុមតំណាងរាស្រ្តរបស់គណបក្សសមរង្ស៊ីបានថ្លែងប្រាប់អ្នកកាសែតនៅឯរដ្ឋសភាថា លោកម៉ៅ ម៉ុនីវណ្ណ ធ្វើដោយការសំរេចចិត្តដោយបុគ្គលខ្លួនឯង ។ ក្រោយពីមានការសំរេចរបស់គណបក្សសម រង្ស៊ី នៅឆ្នាំ២០០៨ ក្នុងការចែកអាណត្តិគ្នា មកមានការប្រែប្រួលទៅលើសេចក្តីសំរេចចាស់នោះ។ កាលពីកិច្ចប្រជុំនៅទីក្រុងម៉ានីលបានសំរេចថា អ្នកដែលជាប់ជាតំណាងរាស្រ្តអាណត្តិ២០០៨ និង២០១១នេះត្រូវបន្តអាណត្តិទៅទៀត ពេលនោះមានការយល់ព្រមគ្នាទាំងស្រុងរួចហើយពីគណៈកម្មាធិការអចិន្ត្រៃយ៍ដែលពេលនោះលោកម៉ៅ ម៉ុនីវណ្ណ ក៏បានចូលរួមចុះហត្ថលេខាយល់ព្រមដែរ។
លោកសុន ឆ័យបន្តថា វាជាការសំរេចចិត្តផ្ទាល់ខ្លួនរបស់គាត់ ហើយគណបក្សបានសំរេចរួចហើយបើទោះបីជាការសំរេចនេះមានការខុសពីមុនក្តីក៏គ្មានអ្វីអាចទប់ស្កាត់ឬឃាត់ឃាំងបានទេ។ ប៉ុន្តែយើងសង្ឃឹមថា បញ្ហាផ្ទៃក្នុងរបស់ គណបក្សនេះត្រូវដោះស្រាយដោយគណបក្សខ្លួនឯង ហើយលោកម៉ៅ មុនីវណ្ណ ជាសមាជិក គណៈកម្មាធិការអចិន្ត្រៃយ៍មានសិទិ្ធចូលរួមកែលម្អគណបក្សផងដែរ ។ គាត់មិនគួរ យកបញ្ហានេះមកធ្វើសន្និសីទកាសែតទេ ព្រោះយើងយល់ថា គណបក្សនីមួយៗវាមិនមានភាពល្អ ទាំងអស់នោះទេ វាតែងតែមានការខ្វះខាត។
លោកសុន ឆ័យ បន្តថា យើងនឹងណែនាំគាត់ អំពីបញ្ហានេះ ព្រោះគាត់ជាមនុស្សសំខាន់ នៅក្នុងគណបក្ស ។ នៅពេលអ្នកនយោបាយយល់ពីកាតព្វកិច្ចរបស់ខ្លួនប្រហែលជាមិនមកធ្វើសន្និសីទកាសែតដូចនេះទេ។ការដោះស្រាយគួរធ្វើនៅផ្ទៃក្នុង យើងមិនដឹងថាគាត់កំពុងមានបំណងអ្វីផ្សេងពីនេះ បើសិនជាត្រឹមតែការងារគណបក្សលោកគិតថា គាត់មិនគួរមកធ្វើដូច នេះទេ ។ វាជាការបរិហារផ្ទៃក្នុងរបស់គាត់
ចំពោះគណបក្ស។តែរឿងបុគ្គលយើងមិនបានយកចិត្តទុកដាក់ទេ ហើយយើងមានការសោក ស្តាយដែលគាត់បានធ្វើការងារជាយូរមកហើយមិនគួរគាត់យកបញ្ហាបក្សក៏ដូចជាគ្រួសារទៅលាតត្រដាងជាសាធារណៈបែបនេះទេ ៕
ចែករំលែកព័តមាននេះ