ត្រីបាឡែន មានស្បែកពណ៌សដូចព័រសឺឡែន ១ក្បាលត្រូវបានគេប្រទះឃើញក្នុងដែនទឹកនៃទីក្រុងស៊ីដនី ប្រទេសអូស្រ្ដាលី ។ ត្រីបាឡែនពណ៌សនោះត្រូវបានមនុស្សជាច្រើននាក់ប្រទះឃើញ កាលពីថ្ងៃទី១៩និង២០ មិថុនា នៅឆ្នេរសមុទ្រខាងកើតរបស់ប្រទេស ។ ត្រីបាឡែននោះពិតជាត្រីបាឡែនពូជ MIGALOO ជាពូជកម្រមានពណ៌ស មិនងាយប្រទះឃើញឡើយ ។ ត្រីបាឡែន នោះពិតណាស់ជាត្រីឈ្មោលមានអាយុប្រហែលជា៣០ឆ្នាំ ត្រូវបានប្រទះឃើញជាលើកដំបូង កាលពីឆ្នាំ១៩៩១ រួចការលេចមុខរបស់វាពេលនោះត្រូវបានមើលដោយមនុស្សជាច្រើនពាន់នាក់ ។
លោក JONAS LIEBSEHNER នៃសមាគមតាមពិនិត្យត្រីបាឡែននិយាយថា នេះជាឱកាសតែមួយគត់ដែលបានឃើញត្រីបាឡែន MIGALOO ពណ៌ស ហែលទឹក ។ វាហែលក្នុងចំណោមត្រីបាឡែនឈ្មោល៥ក្បាល ដោយហែលដេញគ្នា ហើយវាលោតលើផ្ទៃទឹកជាច្រើនលើក ត្រីបាឡែនឈ្មោលទាំងនោះប្រហែលជាប្រជែងដណ្ដើមញីគ្នា ។
ចំណែកលោក OSKAR PETERSON ដែលដឹកនាំមជ្ឈមណ្ឌលស្រាវជ្រាវមួយលើត្រីបាឡែនពណ៌ស មានមូលដ្ឋាននៅអូស្រ្ដាលីថ្លែងថា វាជាត្រីបាឡែនពណ៌ស នៃអឌ្ឍគោលខាងត្បូងដែលយើងស្គាល់ ។ យើងធ្លាប់បានប្រទះឃើញត្រីបាឡែនពណ៌សក្នុងដែនទឹកនៃប្រទេសន័រវែស ក្នុងតំបន់អាក់ទិក ហើយតាំងពីនោះមកបាត់ពុំឃើញទៀត ៕
ចែករំលែកព័តមាននេះ