ខេត្តកំពត ៖ ហេតុការណ៍ស្មានមិនដល់មួយបានកើតឡើងលើស្ត្រីពីរនាក់បងប្អូនដែលជិះម៉ូតូវីវ៉ា ស៊េរី២០០៨ ពណ៌ខ្មៅមួយគ្រឿងចេញពីផ្សារក្រុងកំពត ឌុបគ្នា ។ ស្ត្រីជាប្អូនមានផ្ទៃពោះជិតគ្រប់ខែ ឯស្ត្រីជាបងអ្នកបើកម៉ូតូ ។ លុះមកដល់រង្វង់មូលនាគព័ន្ធខាងកើតចំណតរថយន្តក្រុងកំពតចម្ងាយ២០០ម៉ែត្រ ក៏ត្រូវបានកៀរគ្នាជាមួយរថយន្តក្រុងដឹកអ្នកទេសចរ បណ្តាលឱ្យម៉ូតូនិងស្ត្រីជិះម៉ូតូពីរនាក់បងប្អូនដួលចូលក្រោមរថយន្តទាំងពីរនាក់ តែជីវិតថ្លៃមិនស្លាប់គ្រាន់តែរបួស ។ ហេតុការណ៍នេះបានកើតឡើងនៅវេលាម៉ោង៥និង៣០នាទីល្ងាចថ្ងៃទី៧ មីនា ។
តាមសម្តីអ្នកឃើញហេតុការណ៍បានឱ្យដឹងថា នៅវេលាម៉ោងខាងលើគេឃើញរថយន្តក្រុងបើកចេញពីចំណតរបស់ក្រុមហ៊ុនឆ្ពោះទៅទិសខាងកើត ដើម្បីទៅចតនៅចំណតរថយន្ត លុះមកដល់ចំណុចរង្វង់ចូលនាគព័ន្ធក៏បានកៀរ ម៉ូតូវីវ៉ាមួយគ្រឿងរបស់ស្ត្រីពីរនាក់បងប្អូន ធ្វើឱ្យដួលចូលក្រោមរថយន្តទាំងម៉ូតូទាំងមនុស្សបណ្តាលឱ្យស្ត្រីម្នាក់ជាអ្នកបើកម៉ូតូរងរបួសបាក់កជើងស្តាំ និងស្ត្រីជាប្អូនជិះពីក្រោយដែលមានផ្ទៃពោះជិតគ្រប់ខែផងនោះរងរបួសស្រាល ។
ក្រោយពេលកើតហេតុ ប្រជាពលរដ្ឋនិងមន្ត្រីរាជការដែលនៅទីនោះបានរត់មកជួយគាស់និងយកឧបករណ៍មកដូយរថយន្តទើបយកមនុស្សនិងម៉ូតូចេញពីក្រោមរថយន្តធុនធំនេះបានហើយបញ្ជូនទៅគ្លីនិកឯកជនសម្ភពបូកគោដើម្បីសង្គ្រោះ ។
មន្ត្រីប៉ូលិសចរាចរក្រុងបានឱ្យដឹងថា ស្ត្រីរងគ្រោះទាំងពីរនាក់បងប្អូន១-ឈ្មោះលឹម សុគន្ធា អាយុ៣០ឆ្នាំ រងរបួសបាក់កជើងស្តាំ ២-ឈ្មោះលឹម ធារី អាយុ២៩ឆ្នាំ រងរបួសស្រាល ទាំងពីរនាក់រស់នៅភូមិត្រពាំងធំ ឃុំត្រពាំងសង្កែ ស្រុកទឹកឈូ ខេត្តកំពត ។ រីឯរថយន្តបង្កពាក់ស្លាកលេខភ្នំពេញ 3A-1138 ជារថយន្តដឹកភ្ញៀវទេសចរ។ ដោយឡែកអ្នកបើកបររថយន្តនេះក្រោយពេលកើតហេតុបានរត់គេចខ្លួនបាត់៕
ចែករំលែកព័តមាននេះ