រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាបានប្តេជ្ញាថា នឹងថែរក្សាការពារឯករាជ្យជាតិឲ្យទាល់តែបាន ទោះបីស្ថិតក្នុងកាលៈទេសៈណាក៏ដោយ ។ ថ្លែងក្នុងទិវារំលឹកខួបជ័យជំនះ៧មករា លើកទី៤១ នាព្រឹថ្ងៃទី៧ មករា នៅកោះពេជ្រ សម្តេចតេជោ ហ៊ុន សែន នាយករដ្ឋមន្ត្រីបានលើកឡើងថា នៅលើកំណាត់ផ្លូវដ៏វែងនេះ គណបក្សប្រជាជនកម្ពុជាដែលបានដឹកនាំការប្រយុទ្ធតស៊ូសង្គ្រោះជាតិពីរបបប្រល័យពូជសាសន៍បានឋិតនៅរួមសុខរួមទុក្ខជានិច្ចជាមួយប្រជាជនធ្វើជាបង្អែករបស់ប្រជាជននៅគ្រប់កាលៈទេសៈទាំងក្នុងបុព្វហេតុការពារជាតិ ការពារការរស់ឡើងវិញរបស់ប្រជាជនទាំងបុព្វហេតុសន្តិភាព និងបង្រួបបង្រួមជាតិ និងទាំងបុព្វហេតុស្តា កសាង និងអភិវឌ្ឍន៍សង្គមសេដ្ឋកិច្ចកម្ពុជា ។
សម្តេចបន្តថា ច្បាស់ណាស់ថា ផ្លូវទៅមុខនឹងនៅតែមានឧបសគ្គច្រើនទៀត ប៉ុន្តែគ្មានឧបសគ្គណាអាចមករារាំងដំណើររបស់ជាតិយើងបានឡើយឲ្យតែយើងរក្សាបាននូវឯកភាពជាតិ រួមគ្នាបន្តធ្វើដំណើរលើផ្លូវដ៏ត្រឹមត្រូវនេះទៅមុខទៀត ។ សម្តេចតេជោបានបញ្ជាក់ថា ៖«យើងជឿជាក់លើកម្លាំងនៃការប្រឹងប្រែងរបស់យើង ហើយចងចាំថា គឺកត្តាផ្ទៃក្នុងនោះហើយដែលជាកត្តាកំណត់នៃជ័យជម្នះ ។ ក្នុងស្មារតីនេះយើងទាំងអស់គ្នាប្តេជ្ញាដាច់ខាតក្នុងការការពារសន្តិភាពដែលយើងសម្រេចបានមកដោយលំបាកជាទីបំផុតនោះឲ្យរឹងមាំ ស្ថិតស្ថេរ គង់វង្សជានិច្ច មិនអនុញ្ញាតឲ្យកម្លាំងប្រតិកិរិយាណាមកបំផ្លាញទៅវិញបានឡើយ ទោះបីជាត្រូវបង់ដោយតម្លៃណាក្តី» ។
សម្តេចបន្ថែមថា មានសន្តិភាពទើបធានាការអភិវឌ្ឍប្រកបដោយចីរភាព និងជីវភាពរស់នៅដ៏សុខសាន្ត សម្បូរសប្បាយរបស់ប្រជាជនមានសន្តិភាពទើបធានាដល់ការស្ថិតស្ថេរ និងរីកចម្រើននៃលទ្ធិប្រជាធិបតេយ្យ និងសិទ្ធិសេរីភាព ហើយជោគជ័យនៃដំណើរការអភិវឌ្ឍន៍ និងភាពរឹងមាំនៃប្រជាធិបតេយ្យ និងជះឥទ្ធិពលត្រឡប់មកវិញធានានូវចីរភាពនៃសន្តិភាព ។ បើយើងបាត់បង់សន្តិភាពនោះយើងនឹងត្រូវបាត់បង់អ្វីៗទាំងអស់ ។
សម្តេចប្រមុខរាជរដ្ឋាភិបាលគូសបញ្ជាក់ថា ៖«នៅក្នុងឱកាសនេះ ខ្ញុំក៏សូមបញ្ជាក់យ៉ាងច្បាស់ថា រាជរដ្ឋាភិបាលកម្ពុជាការពារដាច់ខាតនូវឯករាជ្យ អធិបតេយ្យជាតិ ទោះស្ថិតក្នុងកាលៈទេសៈ និងស្ថានភាពណាក្តីហើយការប៉ុងប៉ងណាដែលធ្វើឲ្យកម្ពុជាឃ្លាតចេញពីមាគ៌ាប្រជាធិបតេយ្យ និងនីតិរដ្ឋដោយដាក់បង្ខំឲ្យកម្ពុជាមិនអាចអនុវត្ត សូម្បីតែច្បាប់ជាតិរបស់ខ្លួននោះ គឺពុំអាចទទួលយកបានឡើយ» ។ សម្តេចក៏បានលើកឡើងទៀតថា ការពិតជាក់ស្តែងបានបង្ហាញហើយថា លទ្ធិប្រជាធិបតេយ្យ និងសិទ្ធិសេរីភាព របស់ពលរដ្ឋកម្ពុជាកំពុងត្រូវបានគោរពថែរក្សា និងលើកកម្ពស់ឥតឈប់នៅក្នុងផលប្រយោជន៍របស់ជាតិ និងប្រជាជនកម្ពុជា ។ ដូច្នេះពុំមានមូលហេតុត្រឹមត្រូវណាមួយដែលមជ្ឈដ្ឋានខាងក្រៅខ្លះបានលើកឡើងដដែលៗ អំពីការស្តាឡើងវិញនូវលទ្ធិប្រជាធិបតេយ្យ និងសិទ្ធិមនុស្សនៅកម្ពុជានោះទេ ។
ជាមួយគ្នានោះដែរ សម្តេចតេជោក៏បានគូសបញ្ជាក់ទៀតថា ៖« ខ្ញុំសង្ឃឹមថា មជ្ឈដ្ឋានទាំងនោះនឹងពិចារណាឲ្យបានត្រឹមត្រូវចំពោះការវិវត្តន៍ប្រកបដោយភាពវិជ្ជមាននៅកម្ពុជា ហើយគោរពចំពោះសិទ្ធិនៃ ការជ្រើសរើសរបស់ប្រជាជនកម្ពុជានូវមាគ៌ាសម្រាប់ការអភិវឌ្ឍរបស់ខ្លួនដែលស្របទៅនឹងប្រវត្តិសាស្ត្រ ស្ថានភាពសង្គមវប្បធម៌ និងរដ្ឋធម្មនុញ្ញរបស់ខ្លួន ។ ខ្ញុំក៏សង្ឃឹមផងដែរថា ទំនាក់ទំនងរវាងកម្ពុជាជាមួយនឹងប្រទេសខ្លះដែលធ្លាប់មានទស្សនៈមិនគ្រប់ជ្រុងជ្រោយចំពោះរាជរដ្ឋាភិបាលកម្ពុជានោះនឹងត្រូវបានថែរក្សាពូនជ្រុំលើកស្ទួយឲ្យល្អប្រសើរឡើងដែលនឹងមិនក្លាយជាចំណាប់ខ្មាំងនៃទំព័រដ៏ខ្មៅងងឹតខ្លះនៃប្រវត្តិសាស្ត្រឡើយ»៕ កែសម្រួលដោយ ៖ សុឃាក់
ចែករំលែកព័តមាននេះ