លោកមហាសេដ្ឋី ម៉ាក ឃ្យូបេន (Mark Cuban) បច្ចុប្បន្នមានទ្រព្យសម្បត្តិរួមប្រមាណ ៤ប៊ីលានដុល្លារបើយោងទៅតាមទស្សនាវដ្តី Forbes ប៉ុន្តែលោកជាបុរសក្រីក្រមួយរូបកាលពីពេលដែលលោកមានអាយុខ្ទង់ ២០ឆ្នាំ ។ យ៉ាងណាក្តីលោកបានចែករំលែកមកថា អ្វីដែលលោកចង់ប្រាប់ខ្លួនលោកពេលនៅវ័យក្មេង គឺកុំផ្លាស់ប្តូរអ្វីទាំងអស់ កុំស្ត្រេស និងរស់នៅឲ្យសប្បាយ ។
លោកបានបន្តថា «អ្នកមិនចាំបាច់ត្រូវដឹងថាអ្នកនឹងក្លាយជាមនុស្សបែបណាពេលដែលអ្នកធំឡើងទេ ។ អ្នកមិនចាំបាច់ត្រូវតែមានចម្លើយរហូតទេ ។ អ្នកមិនចាំបាច់ត្រូវរៀនមុខជំនាញដែលល្អជាងគេទេ ។ អ្នកមិនចាំបាច់ត្រូវមានការងារដែលអស្ចារ្យទេ ។ អ្នកអាចបរាជ័យបាន» ។
ពេលដែលលោក ឃ្យូបេន នៅជានិស្សិត លោកបានជ្រើសរើសសាលាបង្រៀនផ្នែកអាជីវកម្ម Kelly School of Business របស់សាកលវិទ្យាល័យ Indiana University ព្រោះកម្មវិធីនេះមានតម្លៃទាបជាងគេក្នុងចំណោមកម្មវិធីអាជីវកម្មទាំងអស់ ។ ដើម្បីរកថវិកាបង់ថ្លៃសាកលវិទ្យាល័យបានសុំការបរិច្ចាគពីអ្នកដទៃ ដើរបង្រៀននិស្សិតស្រីៗរាំដើម្បីរកចំណូល និងធ្វើការនៅបារក្នុងសាកលវិទ្យាល័យជាដើម ។ នៅឆ្នាំ ១៩៨១ មុនពេលលោកបញ្ចប់ការសិក្សានៅសាកលវិទ្យាល័យ លោកបានប្រើលុយដែលខិតខំសន្សំពីការងារជាច្រើនដើម្បីបើកផាប់មួយជាមួយនឹងមិត្តភក្តិ ប៉ុន្តែវាបានបរាជ័យហើយលោកក៏ត្រូវបានបង្ខំឲ្យប្តូរទៅរដ្ឋ Texas វិញ ។
លោកបានប្តូរទៅរស់នៅក្នុងអាផាតមិនដែលមានបន្ទប់គេង ៣បន្ទប់តម្លៃ ៦០០ដុល្លារក្នុងមួយខែជាមួយនឹងមិត្តភក្តិប្រុសៗចំនួន ៥អ្នកទៀត ។ លោកមិនមានលុយក្នុងហោប៉ៅទេ ហើយខ្លួនជាប់បំណុលពេញទៀត តែលោកនៅតែរស់នៅដោយសប្បាយរីករាយ ។
លោកបានលាឈប់ពីការងារដំបូងរបស់លោកបន្ទាប់ពីបញ្ចប់សាកលវិទ្យាល័យនៅ Mellon Bank បន្ទាប់មកត្រូវបានបញ្ឈប់ពីក្រុមហ៊ុនបង្កើតកម្មវិធី Software មួយដែរ ។ ប៉ុន្តែបទពិសោធន៍ធ្វើការក្នុងវិស័យបច្ចេកវិទ្យាបានធ្វើឲ្យលោកចាប់ផ្តើមក្រុមហ៊ុនមួយដោយខ្លួនឯងដែលមានឈ្មោះថា MicroSolutions ។
នៅឆ្នាំ ១៩៩០ លោកបានលក់ក្រុមហ៊ុនលោកក្នុងតម្លៃ ៦លានដុល្លារ ហើយ ៥ឆ្នាំក្រោយ លោកនិងមិត្តភក្តិបានចាប់ផ្តើមក្រុមហ៊ុន Broadcast.com ដែលត្រូវបានលក់ឲ្យទៅ Yahoo ក្នុងឆ្នំឫ ១៩៩៩ ក្នុងតម្លៃ ៥.៧ប៊ីលានដុល្លារជាភាគហ៊ុនផងដែរ ៕
កែសម្រួលដោយ ៖ សំណាង
ចែករំលែកព័តមាននេះ