ADផ្ទាំងផ្សព្វផ្សាយពាណិជ្ជកម្ម

ចម្អិនម្ហូបទុកចោល ខ្ទេចអស់គ្មានសល់ (មានវីដេអូ)

4 ឆ្នាំ មុន

ភ្នំពេញ
០៦ ខែ មករា ឆ្នាំ ២០២០ ម៉ោង ១៧:១០

រាជធានីភ្នំពេញ ៖ ផ្ទះជួលមួយខ្នងធ្វើអំពីឈើប្រក់ស័ង្កសីចំនួន៧បន្ទប់ និងបន្ទប់សម្ភារៈមួយកន្លែងត្រូវបានក្លាយជាចំណីព្រះអគ្គីទាំងកណ្តាលថ្ងៃខ្ទេចគ្មានសល់ បន្ទាប់ពីបុរសជាជនជាតិចិន២នាក់នាំគ្នាចំអិនម្ហូបអាហារទុកចោល ដោយមិនពន្លត់ភ្លើងចង្ក្រាន ទើបបង្កជាអគ្គិភ័យឆាបឆេះយ៉ាងសន្ធោសន្ធៅ និងបង្កអោយមានការភ្ញាក់ផ្អើលយ៉ាងខ្លាំងទៅដល់កម្លាំងមានសមត្ថកិច្ច និង រថយន្តពន្លត់អគ្គិភ័យជាច្រើនគ្រឿងចុះមកជួយធ្វើអន្តរាគមន៍បាញ់ទឹកពន្លត់។…

ហេតុការណ៍ខាងលើនេះបានកើតឡើងកាលពីវេលាម៉ោង២និង៥០នាទីរសៀលថ្ងៃទី៥ ខែ មករា ឆ្នាំ ២០២០ នៅចំណុចផ្ទះលេខ៥៣៩ ផ្លូវព្រះមុនីវង្ស ក្នុងសង្កាត់បឹងកេងកងទី២ ខណ្ឌបឹងកេងកង។

តាមប្រភពព័ត៌មានពីនគរបាលបានប្រាប់ឱ្យដឹងថា បុរសជាជនជាតិចិនទាំង២នាក់ត្រូវបានកម្លាំងសមត្ថកិច្ចធ្វើការ ឃាត់ខ្លួនក្នុងនោះម្នាក់ឈ្មោះ ZHAO JIKUI អាយុ៣២ឆ្នាំ និងម្នាក់ទៀតឈ្មោះ HAO XINMING អាយុ៤៣ឆ្នាំ ស្នាក់នៅផ្ទះជួល កើតហេតុខាងលើ។

តាមប្រភពដដែលបានបន្តថា មុនពេលកើតហេតុ បុរសជនជាតិចិនទាំងពីរនាក់បាននាំគ្នាធ្វើការចំអិនម្ហូប អាហារទុកចោលលើចង្ក្រាននៅក្នុងបន្ទប់ផ្ទះបាយ ដោយមិនបានពន្លត់ភ្លើងចង្ក្រានឱ្យបានត្រឹមត្រូវ ក៏បង្កអោយមានអណ្តាតភ្លើងឆាបឆេះឡើង ហើយពួកគេនាំគ្នាស្រែកអោយគេឯងជួយ និងបង្កការភ្ញាក់ផ្អើលកើតឡើងតែម្តង។

តាមប្រភពដដែលបានប្រាប់បន្តទៀតថា ពេលដែលភ្លើងកំពុងតែឆេះចេញពីបន្ទប់ជួល របស់បុរសជនជាតិចិនទាំង២នាក់ខាងលើក៏បានរាលដាលទៅដល់បន្ទប់ជួលនៅជាប់ៗគ្នា និងបន្ទប់ទុកសម្ភារៈប្រើប្រាស់មួយ កន្លែងនៅក្បែរនោះ ត្រូវបានអណ្តាតភ្លើងឆាបឆេះយ៉ាងសន្ធោសន្ធៅ និង ផ្សែងខ្មៅហុយទ្រលោមឡើងលើផងដែរ។

តាមប្រភពដដែលបានប្រាប់បន្តទៀតថា ភ្លាមៗនោះដែរ កម្លាំងសមត្ថកិច្ចជាច្រើននាក់ក៏បានចុះមកដល់កន្លែងកើតហេតុ និងនាំគ្នាជួយយកទឹក និងបំពង់ពន្លត់អគ្គិភ័យទៅធ្វើការបាញ់ពន្លត់ដែរ តែភ្លើងមិនរលត់ឡើយ ហើយក៏បានហៅរថយន្តពន្លត់ជាច្រើនគ្រឿងមកជួយធ្វើអន្តារាគមន៍បាញ់ទឹកពន្លត់ផងដែរ តែក៏មានការពិបាកក្នុងការចូលទៅជួយបាញ់ពន្លត់យ៉ាងខ្លាំង ដោយសារតែទីតាំងកើតហេតុតូចចង្អៀតនិងគ្មានផ្លូវចូលទៅដល់នោះទេ។

ពាក់ព័ន្ធនឹងករណីអគ្គិភ័យខាងលើនេះដែរ គឺបានបង្ករឡើងដោយសារតែការធ្វេសប្រហែសរបស់បុរសជនជាតិចិនទាំង២នាក់ ក្នុងការចំអិនម្ហូបអាហារទុក ចោល ដោយមិនពន្លត់ភ្លើងចង្ក្រាន ទើបបង្កជាអគ្គិភ័យកើតឡើងឆេះរាលដាលទៅដល់បន្ទប់ជួលដែលនៅជាប់គ្នា ព្រមទាំងបន្ទប់ដាក់សម្ភារៈប្រើប្រាស់ និងឆេះរោលខ្លោចផ្ទះមួយល្វែងទៀតបែបនេះ តែមិនបានបង្ករអោយមនុស្សណាម្នាក់រងគ្រោះថ្នាក់ឡើយ។

ក្នុងករណីអគ្គិភ័យនេះដែរ បណ្តាលឱ្យបន្ទប់ជួលដែលធ្វើអំពីឈើប្រក់ស័ង្កសីចំនួន៧បន្ទប់ និង បន្ទប់ទុកសម្ភារៈចំនួន ១បន្ទប់ រួមទាំងសម្ភារៈប្រើប្រាស់ និងទ្រព្យសម្បត្តិមួយចំនួនទៀតបានក្លាយជាចំណីព្រះអគ្គីឆេះអស់គ្មានសល់ ចំណែកឯផ្ទះ ល្វែងចំនួនមួយល្វែងទៀតក៏ត្រូវបានភ្លើងឆេះរោលរងការខូចខាតផងដែរ។

ដោយឡែក កម្លាំងសមត្ថកិច្ចបានប្រើប្រាស់ទឹកបាញ់អស់ចំនួន៨គ្រឿង រហូតដល់ម៉ោង៤និង៣០នាទីថ្ងៃដដែល ទើបភ្លើងបានរលត់ទៅវិញ ចំណែកឯបុរសជនជាតិចិនទាំង២នាក់ ក៏ត្រូវបានកម្លាំងមានសមត្ថកិច្ចធ្វើការចាប់ឃាត់ខ្លួនទៅធ្វើការសាកសួរនៅអធិការខណ្ឌបឹងកេងកងផងដែរ ៕ (កែសម្រួលដោយ ៖ ធីតា)