រាជធានីភ្នំពេញ ៖ សាលាអន្តរជាតិរ៉េហ្វលម៉ុនតេសសូរី បានរៀបចំពិធីប្រគល់វិញ្ញាបនបត្របញ្ចប់ការសិក្សាដល់កុមារជាង២៧០នាក់ដើម្បីលើកទឹកចិត្ត និងអបអរសាទរដល់ប្អូនៗដែលបានបញ្ចប់ថ្នាក់សិក្សាដោយជោគជ័យក្នុងឆ្នាំ២០១៣-២០១៤ ក្រោមប្រធានបទ ធម្មជាតិយើងទាំងអស់គ្នាដើម្បីបណ្តុះគោលគំនិតកុមារទៅនឹងធម្មជាតិ និងបរិស្ថាន។
ពិធីប្រគល់វិញ្ញាបនបត្រដល់កុមារនេះធ្វើឡើងកាលពីព្រឹកថ្ងៃទី១៨ មិថុនា នៅសាលមហោស្រពសន្និសីទចតុមុខ ដោយមានការអញ្ជើញជាកិត្តិយសពីលោកហ៊ាង ស៊ីណេ អនុរដ្ឋលេខាធិការក្រសួងអប់រំ យុវជន និងកីឡា រួមទាំងថ្នាក់ដឹកនាំបុគ្គលិកសាលា និងមាតាបិតាកុមារជាច្រើននាក់ទៀត។
លោកហ៊ាង ស៊ីណេ អនុរដ្ឋលេខាធិការក្រសួងអប់រំ យុវជន និងកីឡាមានប្រសាសន៍ថា សាលាអន្តរជាតិរ៉េហ្វលម៉ុនតេសសូរី គឺជាថ្នាលបណ្តុះចំណេះវិជ្ជាមួយដែលត្រូវបានអនុញ្ញាតឱ្យបង្កើតឡើងដោយមានការសហការជាមួយសាលារ៉េហ្វលម៉ុនតេសសូរី របស់ប្រទេសសិង្ហបុរីប្រកបដោយគុណភាពស្របតាមស្តង់ដារអប់រំអន្តរជាតិដោយប្រើប្រាស់ភាសាអង់គ្លេសជាគោលលើគ្រប់មុខវិជ្ជា និងសម្រាប់ការប្រាស្រ័យទាក់ទង។
សាលានេះចាប់បើកដំណើរការតាំងពីឆ្នាំ២០១១ សម្រាប់កុមារតូចៗតាំងពីថ្នាក់ទារកដ្ឋាន និងថ្នាក់មត្តេយ្យសិក្សាចាប់ពីអាយុុ១ឆ្នាំកន្លះដល់៦ឆ្នាំ ក្នុងនោះបុត្រធីតារបស់លោកអ្នកនឹងទទួលបានការបង្ហាត់បង្រៀន និងថែទាំដោយផ្ទាល់ពីលោកគ្រូ អ្នកគ្រូជនជាតិបរទេស ដើមកំណើតនិយាយភាសាអង់គ្លេសដោយបូករួមជាមួយកម្មវិធីបង្រៀនម៉ុនតេសសូរី ដែលចែកជាផ្នែកធំៗ រួមមានការអនុវត្តន៍សកម្មភាពប្រចាំថ្ងៃ សកម្មភាពគិតដោះស្រាយ លំហាត់ ភាសា ការរៀនអាន សរសេរគណិតវិទ្យា សិល្បៈតន្ត្រី វប្បធម៌ និងសកម្មភាពខាងសង្គម៕
ចែករំលែកព័តមាននេះ