ខេត្តសៀមរាប ៖បច្ចុប្បន្នដោយកត្តាអាយុកាល និងកត្តា ផ្សេងៗទៀតបានបង្កឱ្យជាន់ទី៣ (ប្រាង្គកណ្តាល) នៃប្រាសាទបាយ័នមានភាពសឹករេចរឹល និងកំពុងប្រឈមនឹងហានិភ័យយ៉ាងធ្ងន់មួយចំនួន ។
ផេកហ្វេសប៊ុកអាជ្ញាធរជាតិអប្សរាកាលពីថ្ងៃទី១ មករា ២០២០ ផ្សាយថាក្នុងស្ថានភាពនេះអ្នកជំនាញការចំពោះកិច្ចផ្នែកអភិរក្សនៃគណៈកម្មាធិការអន្តរជាតិកិច្ចគាំពារអភិរក្សនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ហៅកាត់ថា អាយស៊ីស៊ី-អង្គរ) បានផ្តល់អនុសាសន៍ឱ្យបិទការទស្សនានៅជាន់ទី៣នៃប្រាសាទបាយ័នដើម្បីផ្តល់លទ្ធភាពដល់ក្រុមអ្នកជំនាញសិក្សាអំពីការខូចខាត និងបញ្ហាប្រឈមនានា ដើម្បីរៀបចំផែនទីហានីនិភ័យ ព្រមទាំងកំណត់ទីតាំងអាទិភាពក្នុងការពង្រឹងស្ថានភាព និងជួសជុលផ្នែកដែលប្រឈមនឹងគ្រោះថ្នាក់ទាំងអស់នោះ ។
ក្នុងន័យនេះ ដើម្បីថែទាំ និងការពារប្រាសាទ ក៏ដូចជាការគិតគូរយ៉ាងយកចិត្តទុកដាក់ដល់សុវត្ថិភាពភ្ញៀវទេសចរជាតិ-អន្តរជាតិ អាជ្ញាធរជាតិអប្សរា នឹងបិទចរាចរណ៍ឡើង-ចុះ វង់ទស្សនាជាន់ទី៣នៃប្រាសាទបាយ័នប់ពីថ្ងៃទី១ ខែមករា ឆ្នាំ២០២០ តទៅដោយទុកលទ្ធភាពឱ្យក្រុមការងារជំនាញផ្នែកអភិរក្សបំពេញការងាររបស់ខ្លួនរហូតបានរួចរាល់ជាស្ថាពរ ។
ចំពោះទីតាំងទស្សនា សំខាន់ៗផ្នែកខាងក្រោមនៃប្រាសាទបាយ័នដែលមានចម្លាក់ក្បូរក្បាច់រចនាដ៏ល្អវិចិត្រ នៅបើកជាប្រក្រតីសម្រាប់ភ្ញៀវទេសចរជាតិ-អន្តរជាតិ ៕ (កែសម្រួលដោយ ៖ បុប្ផា)
ចែករំលែកព័តមាននេះ