ប្រទេសលីប៊ី-តួកគី ៖ សភាតួកគីកាលពីថ្ងៃទី២ មករា បានអនុម័តញត្តិមួយ ដែលអុញ្ញាតឲ្យប្រធានាធិបតី លោករីស៊ីបតៃយីបអ័រដូហ្គាន បញ្ជូនកងទ័ពទៅកាន់ប្រទេសលីប៊ី ដើម្បីជួយទ្រទ្រង់ដល់រដ្ឋាភិបាលក្រុងទ្រីប៉ូលី។ នោះជាវិធានការមួយដែលអាចធ្វើឲ្យធ្ងន់ធ្ងរថែមទៀត ដល់ជម្លោះដណ្ដើមអំណាចគ្នាក្នុងប្រទេសដែលហែកហួរដោយសង្គ្រាមស៊ីវិលនេះ។
ប្រធានាធិបតីអាមេរិកលោកដូណាល់ត្រាំ បានព្រមាន ក្នុងកិច្ចសន្ទនាតាមទូរស័ព្ទជាមួយសមភាគីតួកគី ប្រឆាំងការជ្រៀតជ្រែករបស់បរទេស ដែលអាចធ្វើឲ្យស្មុគ្រស្មាញថែមទៀតដល់សភាពការណ៍នៅលីប៊ី។ ប្រទេសអ៊ីស្រាអែល ស៊ីប និងក្រិកបានបរិហារថា នោះជាការគំរាមកំហែងប្រកបដោយគ្រោះថ្នាក់មួយសម្រាប់ស្ថេរភាពតំបន់ ក៏ដូចជាអេហ្ស៊ីបដែរ។
កាលពីខែវិច្ឆិកាកន្លងទៅ ក្រុងវ៉ាស៊ិនតោន ធ្លាប់បានអំពាវនាវ ដល់សេនាប្រមុខខាលីហ្វាហាហ្វតាបុរសខ្លាំង ភាគខាងកើតលីប៊ីឲ្យបញ្ឈប់ការវាយលុករបស់ខ្លួន សំដៅដណ្ដើមយកក្រុងទ្រីប៉ូលី ក៏ទោះបីកាលមុនលោកត្រាំធ្លាប់សំដែងការគាំទ្រ ចំពោះសេនាប្រមុខរូបនេះក្ដី។
ក្នុងសម័យប្រជុំវិសាមញ្ញមួយរបស់សភា សមាជិកសភាតួកគី៣២៥រូបបានបោះឆ្នោត គាំទ្រការសម្រេចចិត្តនោះ ទល់នឹង១៨៤រូបបោះឆ្នោតប្រឆាំង។ បែបនេះសភាអុញ្ញាតឲ្យកងទ័ពនូវអាណត្តិមួយ ដែលមានសុពលភាពរយៈពេល១ឆ្នា សម្រាប់ធ្វើអន្តរាគមន៍នៅលីប៊ី។
គិតទៅជម្លោះនៅលីប៊ី ទាំងអ.ស.បទាំងពួកលោកខាងលិចពុំមានលទ្ធភាពទប់ស្កាត់និងអាចរកដំណាះណាមួយឃើញឡើយ ក្នុងការបញ្ចប់ជម្លោះចាបតាំងពីការផ្ដួលរំលំរបបលោកមូអាម៉ាកាដាហ្វី ដោយសារអន្តរាគមន៍របស់ពួកលោកខាងលិចមក៕ (កែសម្រួលដោយ ៖ បុប្ផា)
ចែករំលែកព័តមាននេះ