ដោយចាប់ផ្តើមជីវិតនយោបាយជាមួយគណបក្សប្រជាធិបតេយ្យសេរីសេរីនិយម និងព្រះពុទ្ធសាសនារបស់លោកតាសឺសាន កាលពីឆ្នាំ១៩៩៣ លោក កឹម សុខា អាចចាត់ទុកជាអ្នកនយោបាយឈរជើងបានយូរ និងជោគជ័យគួរឲ្យកត់សម្គាល់ ។ ប៉ុន្តែទន្ទឹមពេលជាមួយគ្នានោះលោកក៏ជាអ្នកនយោបាយជាន់ខ្ពស់ តែមួយរួបដែលប្រឈមនឹងការជាប់ពន្ធនាគារច្រើនជាងគេរហូតដល់ទៅពីរដង ។
ឆ្នាំ២០២០នេះ អាចជាឆ្នាំដ៏សំខាន់ដែលត្រូវយកចិត្តទុកដាក់តាមដានជីវិតនយោបាយ របស់លោក ។ លោក កឹម សុខា នឹងត្រូវឡើងតុលាការ នៅថ្ងៃទី១៥ ខែមករា ឆ្នាំ២០២០ ខាងមុខនេះ ។ ដំណើរការជំនុំជម្រះក្តីនេះនឹងត្រូវស្ថិតនៅក្នុងក្រសែភ្នែកតាម ដានទាំងក្នុងប្រទេសកម្ពុជា និងលើឆាកអន្តរជាតិ ដោយសារតែលទ្ធផលនៃការជំនុំជម្រះនោះមិនត្រឹមតែទាក់ទងនឹងអនាគតនយោបាយរបស់លោកផ្ទាល់នោះទេវាអាចនឹងមានផលប៉ះពាល់ដល់លទ្ធិប្រជាធិបតេយ្យកម្ពុជា និងគម្រោងអ្វីៗទាំងអស់លើកលែងអាវុធ ឬ EBA ដែលអាចឲ្យកម្ពុជានាំទំនិញមិនបាច់បង់ពន្ធចូលក្នុងទីផ្សារអឺរ៉ុប ។
បើសិនជាសំណាងល្អនោះលោកកឹម សុខា នឹងអាចត្រូវតុលាការផ្តល់សេរីភាពពេញ លេញឡើងវិញបើសិនជាតុលាការរកឃើញថា លោកមិនមានធ្វើអ្វីខុសដូចការចោទ ប្រកាន់ពីបទក្បត់ជាតិទេនោះ ។ ក្នុងករណីដែលតុលាការរកឃើញថា លោកមាន ទោសវិញនោះវាប្រហែលជាតម្រូវឲ្យមានការរកច្រកចេញតាមរយៈការលើកលែងទោសពីព្រះមហាក្សត្រ តាមរយៈការស្នើសុំពីនាយករដ្ឋមន្ត្រី បើសិនជាលោកចង់មានសេរីភាពពេញលេញ និងសិទ្ធិនយោបាយវិញមែននោះ ។
ដើម្បីឲ្យលោកកឹម សុខា អាចទទួលបានការលើកលែងទោសពីព្រះមហាក្សត្រតាមរយៈការស្នើសុំពីនាយករដ្ឋមន្ត្រីនោះ លោក កឹម សុខា ប្រហែលជាចាំបាច់ត្រូវតែឈប់ គិតដល់ការរស់ឡើងវិញ នៃគណបក្សសង្គ្រោះជាតិដូចអ្វីដែលលោក សម រង្ស៊ី កំពុងតែសង្ឃឹម ។
ក្នុងន័យនេះលោកនឹងត្រូវបង្កើតគណបក្សថ្មីមួយ ដើម្បីចូលរួមការបោះឆ្នោតឃុំ សង្កាត់ នៅឆ្នាំ២០២២ និងការបោះឆ្នោតជ្រើសរើសតំណាងរាស្ត្រ នៅឆ្នាំ២០២៣ ។ ប៉ុន្តែបើសិនជានយោបាយរបស់លោកធ្វើដំណើរតាមផ្លូវនេះមែននោះវានឹងជាសញ្ញា ដ៏ប្រាកដមួយនៃការចែកផ្លូវគ្នារវាងរូបលោក និងលោក សម រង្ស៊ី ។ ពេលនោះអ្នកដែល ខាតបង់ជាងគេ គឺលោក សម រង្ស៊ី ខណៈដែលលោកមិនអាចមានសំណាងធ្វើនយោបាយដូចដើមវិញដូចលោក កឹម សុខា ដោយសារតែលោកមិនបានទទួលការលើកលែងទោសពីព្រះមហាក្សត្រដូចលោក កឹម សុខា ។
ប៉ុន្តែបើសិនជាគ្មានការកលើកលែងទោសពីព្រះមហាក្សត្រទេនោះ ជីវិតនយោបាយ របស់លោកកឹម សុខា នឹងមិនអាចវិលត្រឡប់មកដូចដើមបានវិញឡើយ ។ លោក ប្រហែលជានឹងស្ថិតនៅដូចស្ថានភាពបច្ចុប្បន្ន គឺមានសិទ្ធិត្រឹមធ្វើដំណើរក្នុងប្រទេសកម្ពុជា ឬក៏អាចផងដែរនឹងត្រូវបញ្ជូនទៅកាន់មន្ទីរឃុំឃាំងនៅពេលដែលសាលក្រមស្ថាពរមួយប្រកាសថា លោកមានទោសក្បត់ជាតិមែននោះ ។
ប៉ុន្តែបើសិនជារឿងក្តីតុលាការរបស់ លោកកឹម សុខា ធ្វើដំណើរតាមផ្លូវនេះមែននោះ ជីវិតនយោបាយរបស់ លោកកឹមសុខា ប្រហែលជានឹងត្រូវងងឹតសូន្យ ឬក៏ពិបាកនឹង វិលត្រឡប់មករកភាពដើមវិញណាស់ ។ លោក កឹម សុខា ប្រហែលជាដឹងច្បាស់អំពីបញ្ហានេះហើយលោក ប្រហែលជាអាច នឹងស្វះស្វែងរកច្រកចេញនយោបាយមួយនៅពេលដែលតុលាការកាត់ក្តីឲ្យលោកមានទោសនោះ៕ កែសម្រួលដោយ ៖ សុឃាក់
ចែករំលែកព័តមាននេះ