រាជធានីភ្នំពេញ៖ នៅក្នុងឆ្នាំ២០១៩នេះបើយោងតាមការកំណត់របស់របាយការណ៍ប្រចាំឆ្នាំរបស់ក្រសួងរៀបចំដែនដី គនរូបនីយកម្ម និងសំណង់ បង្ហាញថានៅតាមមន្ទីរក្នុងខេត្តមិនច្រើននោះទេ ដែលប្រមូលចំណូលពីវិស័យសំណង់និងអចលទ្រព្យចាប់ពីត្រឹមកម្រិតពី៣ពាន់លានរៀល (ប្រមាណ 737 891.37 ដុល្លារអាមេរិក) ឡើងចូល ក្នុងទៅក្នុងថវិកាជាតិ គឺមាននៅក្នុងខេត្តចំនួន៥ ក្នុងនោះមាននៅខេត្តព្រះសីហនុ, ខេត្តតាកែវ,សៀមរាប, កណ្តាល និងខេត្តកំពង់ស្ពឺ។
បើយោងតាមរបាយការណ៍ប្រចាំឆ្នាំ២០១៩របស់ក្រសួងខាងលើបានឲ្យដឹងថា សម្រាប់មន្ទីរដែលប្រមូលច្រើននិងឈានមុខគេមាន ៖ទី១-) មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ បានចំនួន ជាង៦៦ពាន់លានរៀល, ទី២-) មន្ទីររៀបចំដែនដី នគរូបនីយកម្ម សំណង់និងសុរិយោដីខេត្តតាកែវ បានប្រមូលចំណូលចូលថវិកាជាតិសរុបមានចំនួនជាង៩.១៥៦លានរៀល,ទី៣-) មន្ទីររៀបចំដែនដីនគរូបនីយកម្ម សំណង់និងសុរិយោដីខេត្តសៀមរាបចំណូលទទួលបានជាង៥.១៨៦លានរៀល ហើយចំណាយថវិកាទូទៅរបស់អង្គភាពអស់ជាង២.៦៩១លានរៀល។ ទី៤-)មន្ទីរសូរិយោដីខេត្តកណ្តាលរកចំណូលបានពីសុរិយោដីនិងសំណង់សរុបបាន៣.៩៣៣លានរៀលបើធៀបនិងឆ្នាំ២០១៨កើនឡើង៦៨% និងទី៥-) មន្ទីររៀបចំដែនដីនគរូបនីយកម្ម សំណង់និងសុរិយោដីខេត្តកំពង់ស្ពឺ ប្រមូលចំណូលសរុបបានជាង៣.៤៤០លានរៀលមកពីពន្ធប្រថាប់ត្រា, ពន្ធដីធ្លីមិនទាន់ប្រើប្រាស់និងសេវាសំណង់កើនឡើង២៧០%បើប្រៀបធៀបនឹងឆ្នាំ២០១៨។
ទន្ទឹមនឹងការប្រមូលចំណូលឈានមុនក្នុងចំណោមមន្ទីរផ្សេងទៀតគេសង្កេតឃើញថាបញ្ហាប្រឈមក៏មានការកើតឡើងច្រើនផងដែរ ជាក់ស្តែងនៅមន្ទីររៀបចំដែនដីនគរូបនីយកម្ម សំណង់និងសុរិយោដីខេត្តព្រះសីហនុបើយោងតាមរបាយការណ៍របស់មន្ទីរមានរហូតដល់ចំនួន៩ចំណុចសំខាន់ៗ។
ក្រៅពីការប្រមួលបានចំណួលក៏នូវមានបញ្ហាប្រឈមមួយចំនួន ដែលមានដូចជា
៖ ១)- សមត្ថភាពមន្ត្រីមួយចំនួននៅមានកម្រិតនិងពុំយកចិត្តទុកដាក់ក្នុងការអនវុត្តការងារស្នូល, ២)បញ្ហាវិវាទដីធ្លីមានច្រើននិងស្មុគស្មាញជាហេតុនាំឱ្យការដោះស្រាយមានភាពយឺតយាវ, ៣)ភាគីវិវាទមួយចំនួនពុំចូលរួមសហការក្នុងការដោះស្រាយវិវាទដីធ្លី និងយកឈ្នះរៀងៗខ្លួន, ៤)នៅក្នុងដំណើរការចុះបញ្ជីដីធ្លីមានលក្ខណៈជាប្រព័ន្ធ ប្រជាពលរដ្ឋមួយចំនួនដាក់ពាក្យបណ្តឹងទប់ស្កាត់ការចេញបណ្ណ័ ហើយកន្លងមកគណៈកម្មការរដ្ឋបាលពុំដែលអញ្ចើញគូភាគីចូលរួមដោះស្រាយ ជាហេតុធ្វើឱ្យវិវាទនៅសេសសល់ច្រើននិងចំនួនប័ណ្ណដែលត្រូវចេញ ធ្លាក់ចុះ, ៥) ការសាងសង់ ការជួសជុល និងការរុះរើសំណង់មួយចំនួនគ្មានលិខិតអនុញ្ញាត និងបានដំណើការសាងសង់មុន ព្រមទាំងខុសលិខិតអនុញ្ញាតសាងសង់ ខុសនគរូនីយប្បញ្ញាត្តិ ជាហេតុបង្កឱ្យមានផលប៉ះពាល់ដល់សុវត្ថិភាពអ្នកជិតខាងនិងសណ្តាប់ធ្នាប់សាធារណៈ, ៦)បញ្ហាម្ចាស់ប័ណ្ណសំគាល់លិខិតកាន់កាប់ប្រើប្រាស់ដីធ្លីឆ្នាំ១៩៩២ដល់១៩៩៧មួយចំនួនមិនបានកាន់កាប់និងប្រើប្រាស់ដី ហើយត្រូវបានប្រជាពលរដ្ឋរស់នៅកាន់កាប់រស់នៅអាស្រ័យផលនិងខ្លះបានលក់ទិញតាមរយៈអាជ្ញាធរភូមិឃុំជាបន្តបន្ទាប់ ដែលបង្កទំនាស់ជាបន្តបន្ទាប់ឥតឈប់ឈររវាងអ្នកកាន់កាប់ជាក់ស្តែង និងម្ចាស់ប័ណ្ណភោគៈទាំងអស់នោះ, ៧)កន្លងមកការចុះបញ្ជីចេញប័ណ្ណសំគាល់សិទ្ធិ ដែលមិនបានកំណត់ឱ្យបានច្បាស់នូវព្រំប្រទល់រដ្ឋបាលរវាងក្រុងព្រះសីហនុ និងស្រុកស្ទឹងហាវ និងគំនូសប្លង់បង្ហាញទីតាំងដីមិនច្បាស់លាស់ បង្កឱ្យមានបញ្ហាវិវាទដីធ្លីជាច្រើនពិបាកដោះស្រាយមកទល់បច្ចុប្បន្ន,៨)ក្បាលដីជាច្រើនដែលម្ចាស់បាកាន់កាប់ជាក់ស្តែង ខុសពីនិយាមការនៅក្នុងប្លង់សុរិយោដី បង្កឱ្យមានការលំបាកក្នុងការកំណត់ព្រំដីឡើងវិញ ដើម្បីគ្រប់គ្រងនិងសាងសង់ និង៩) កង្វះខាតមន្ត្រីជំនាញ កង្វះសម្ភារៈបច្ចេកទេសត្រួតពិនិត្យគុណភាពសំណង់និងឧបករណ៍វាស់វែងជាដើម។
ពាក់ព័ន្ធនឹងការប្រមូលចំណូលនៅក្នុងវិស័យសំណង់និងអចលនទ្រព្យសរុបក្នុងឆ្នាំ២០១៩នេះ បើតាមការធ្វើបទបង្ហាញពីមន្ត្រីជាន់ខ្ពស់នៃក្រសួងរៀបចំដែនដីបានគូសបញ្ជាក់ថា ការប្រមូលចំណូលចូលថវិកាជាតិសរុបមានចំនួន ៤៥៦. ៦១៧. ៦៨៦. ០៧៧រៀល គិតទាំងពន្ធប្រថាប់ត្រាលើការផ្ទេរអចលនទ្រព្យ រួមមាន ៖១-)ចំណូលរបស់រដ្ឋបាលកណ្តាលចំនួន ២៩. ១០៧. ៧៣៦. ៣៧៤រៀល,២-)ចំណូលរបស់មន្ទីរ ដ.ន.ស.ស.រាជធានី ខេត្ត ចំនួន៨០. ២៣៤. ៨០៣. ២២៧រៀល និង៣-)ពន្ធប្រថាប់ត្រា (អគ្គនាយកដ្ឋានពន្ធដារ) ចំនួន ៣៤៧. ២៧៥ .១៤៦. ៤៧៦រៀល៕ កែសម្រួលដោយ ៖ សុឃាក់
ចែករំលែកព័តមាននេះ