ខេត្តកណ្តាល ៖ ដើម្បីចូលរួមអបអរសាទរទិវាកុមារអន្តរជាតិ ថ្ងៃទី១ មិថុនា ឆ្នាំ២០១៤ ក្រុមហ៊ុន Kyungshin សាខាកម្ពុជាបានបង្កើតកម្មវិធីសប្បុរសធម៌មួយក្រោមប្រធានបទ ចែករំលែកក្តីស្រលាញ់ដល់កុមារកម្ពុជា ដោយធ្វើការឧបត្ថម្ភសៀវភៅរឿងនិទានខ្មែរ-កូរ៉េ ជាភាសាខ្មែរចំនួន៥០០ក្បាលដល់សិស្សានុសិស្សនៃសាលាបឋមសិក្សាព្រៃចាស់ ដែលស្ថិតនៅភូមិព្រៃចាស់ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល កាលពីថ្ងៃទី៣១ ខែ ឧសភា ឆ្នាំ២០១៤ ។ ក្នុងឱកាសនោះ មានការចូលរួមពីសំណាក់លោកគ្រូ អ្នកគ្រូ ថ្នាក់ដឹកនាំសាលា តំណាងសហគមន៍ សិស្សានុសិស្ស ព្រមទាំងមានការចូលរួមជាអធិបតីភាពដោយលោកនាយកក្រុមហ៊ុន Kyungshin សាខាកម្ពុជា លោក Kim Dongsoo ផងដែរ ។
លោកនាយកសាលាបានថ្លែងអំណរគុណយ៉ាងជ្រាលជ្រៅ និងថ្លែងការកោតសរសើរដល់ក្រុមហ៊ុន Kyungshin សាខាកម្ពុជាដែលបង្កើតឱ្យមានកម្មវិធីដ៏ល្អនេះ ក្នុងគោលបំណងពង្រីកចំណេះដឹងដល់ប្អូនៗកុមារា-កុមារី ដែលជាសិស្សានុសិស្សនៃសាលាបឋមសិក្សាព្រៃចាស់ឱ្យកាន់តែប្រសើរឡើងថែមមួយកម្រិតទៀត ។
សូមបញ្ជាក់ផងដែរថា នេះជាលើកដំបូងរបស់សាលាបឋមសិក្សាព្រៃចាស់ ដែលទទួលបានអំណោយសប្បុរសធម៌ពីក្រុមហ៊ុនដែលមានទីតាំងនៅឃុំវិហារសួគ៌យើងនេះ ។ កាយវិការនេះជាគំរូដ៏ប្រពៃដែលក្រុមហ៊ុនវិនិយោគដទៃទៀតក្នុងសហគមន៍គួរយកតម្រាប់តាម ។
ថ្នាក់ដឹកនាំ Kyungshin សាខាកម្ពុជា ផ្តល់តម្លៃខ្ពស់ចំពោះការអប់រំ ក្នុងប្រទេសកម្ពុជា ជាពិសេសសហគមន៍ដែលក្រុមហ៊ុនយើងកំពុងវិនិយោគជាមួយ ។ យើងរីករាយនឹងចូលរួមជួយសង្គមកម្ពុជាឱ្យកាន់តែរីកចម្រើនតទៅមុខទៀត ដោយសេចក្តីស្រឡាញ់ដ៏ជ្រាលជ្រៅ ៕
ចែករំលែកព័តមាននេះ