រាជធានីភ្នំពេញ ៖ ប្រជាពលរដ្ឋជាង១០នាក់ដែលអះអាងថា ជាតំណាងឱ្យប្រជាពលរដ្ឋចំនួន៣៥៧គ្រួសារ រស់នៅក្នុងបុរីផ្ទះល្វែងល្អពេញចិត្ត បាននាំគ្នាធ្វើការតវ៉ាដោយលើកបដាទទូចសុំដល់រាជរដ្ឋាបាលភិបាលកម្ពុជា ក៏ដូចជាក្រុមហ៊ុនអគ្គិសនីកម្ពុជា ប្តូរទីតាំងរោងម៉ាស៊ីនភ្លើងរបស់ក្រុមហ៊ុន ខូលប៊ីន អេនើជី(ខេមបូឌា)លីមីតធីត…
រាជធានីភ្នំពេញ ៖ ប្រជាពលរដ្ឋជាង១០នាក់ដែលអះអាងថា ជាតំណាងឱ្យប្រជាពលរដ្ឋចំនួន៣៥៧គ្រួសារ រស់នៅក្នុងបុរីផ្ទះល្វែងល្អពេញចិត្ត បាននាំគ្នាធ្វើការតវ៉ាដោយលើកបដាទទូចសុំដល់រាជរដ្ឋាបាល
ភិបាលកម្ពុជា ក៏ដូចជាក្រុមហ៊ុនអគ្គិសនីកម្ពុជា ប្តូរទីតាំងរោងម៉ាស៊ីនភ្លើងរបស់ក្រុមហ៊ុន ខូលប៊ីន អេនើជី(ខេមបូឌា)លីមីតធីត (Colben Energy(Cambodia) Limited ដែលបានបង្កសំឡេងរំខានរហូតដល់រង្គើផ្ទះ និងផ្សែងបំពុលបរិស្ថានយ៉ាងធ្ងន់ធ្ងរ ប៉ះពាល់ដល់សុខភាព និងការរស់នៅប្រចាំថ្ងៃរបស់ពួកគាត់ដែលនៅជុំវិញ ។
ការតវ៉ានេះ បានផ្ទុះឡើងកាលពីវេលាម៉ោងប្រមាណ១១និង៣០នាទីព្រឹកថ្ងៃទី២៧ ខែធ្នូកន្លងមក នៅមុខក្រុមហ៊ុនខាងលើ ស្ថិតក្នុងភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។ តាមព័ត៌មានបានឱ្យដឹងថា ការតវ៉ានេះគឺបន្ទាប់ពីប្រជាពលរដ្ឋនាំគ្នាផ្តិតមេដៃប្តឹង ហើយក្រសួងបរិស្ថានក៏ដូចជាសាលារាជធានីភ្នំពេញ និងក្រុមហ៊ុនអគ្គិសនី ពុំមានលទ្ធភាពដើម្បីបញ្ឈប់រោងម៉ាស៊ីនរបស់ក្រុមហ៊ុនខាងលើនេះបាន ។
តាមប្រជាពលរដ្ឋបានឱ្យដឹងថា រោងម៉ាស៊ីនភ្លើងរបស់ក្រុមហ៊ុន ខូលប៊ីនអេនើជី(ខេមបូឌា) លីមីតធីត បានបង្កសំឡេងរំខានលាន់ឮខ្លាំងៗ រហូតដល់រង្គើផ្ទះ និងហុយផ្សែងបំពុលបរិយាកាសយ៉ាងធ្ងន់ធ្ងរជារៀងរាល់ថ្ងៃ ចាប់តាំងពីម៉ោង៥ព្រឹករហូតដល់ម៉ោង១២អធ្រាត្រ ជាហេតុធ្វើឲ្យប៉ះពាល់ដល់ការរស់នៅ និងសុខភាពរបស់អ្នករស់នៅជុំវិញ ។ ជាពិសេស ប៉ះពាល់ដល់កុមារ ចាស់ជរា ស្ត្រីមានផ្ទៃពោះ ស្ត្រីសម្រាលកូនហើយ និងអ្នកជំងឺ ដែលរស់នៅក្នុងបុរីល្អពេញចិត្ត ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។
ប្រជាពលរដ្ឋបានឱ្យដឹងទៀតថា កន្លងមកពួកគាត់បានដាក់ពាក្យបណ្តឹងទៅអាជ្ញាធរមូ ដ្ឋាន លោកចៅ សង្កាត់ឫស្សីកែវ កាលពីដើមឆ្នាំ២០១៦ ដល់២០១៧ ឲ្យជួយដោះស្រាយ ប៉ុន្តែមិនមានការឆ្លើយតបនិងដោះស្រាយឡើយ ។ លុះកាលពីខែមករា ឆ្នាំ២០១៨ បានដាក់ពាក្យបណ្តឹងទៅសាលារាជធានីភ្នំពេញ និងបន្តដាក់ពាក្យបណ្តឹងទៅអាជ្ញាធរអគ្គិសនីកម្ពុជា កាលពីខែមីនា ឆ្នាំ២០១៨ និងដាក់ពាក្យបណ្តឹងទៅរដ្ឋមន្ត្រីក្រសួងបរិស្ថាន ឲ្យជួយអន្តរាគមន៍ តែលទ្ធផលមិនទទួលបានសមស្រប ។
ដោយសារក្រុមហ៊ុនផ្គត់ផ្គង់អគ្គិសនីឯកជននេះ នៅតែបន្តសំឡេងរំខានដល់ការរស់នៅដល់សព្វថ្ងៃ ប្រជាពលរដ្ឋក៏បានទទូចសុំសម្តេចតេជោនាយករដ្ឋមន្ត្រី មេត្តាជួយអន្តរាគមន៍ដោះស្រាយដោយបញ្ឈប់សកម្មភាពរោងម៉ាស៊ីនភ្លើង របស់ក្រុមហ៊ុនខូលប៊ីនអេនើជី(ខេមបូឌា) លីមីតធីត ព្រោះតែរោងម៉ាស៊ីននេះបង្កឱ្យប៉ះពាល់ដល់បរិស្ថានយ៉ាងធ្ងន់ធ្ងរ ។
តាមលិខិតរបស់ក្រុមហ៊ុនអគ្គិសនីកម្ពុជា គោរពជូនលោករដ្ឋមន្ត្រីក្រសួងបរិស្ថាន បានឱ្យដឹងថា រោងមា៉សុីនភ្លើងរបស់ក្រុមហុ៊នខូលប៊ីន ដើរដោយប្រេងខ្មៅ ស្ថិតនៅក្នុងភូមិបឹងសាឡាងសង្កាត់ឫស្សីកែវខណ្ឌឫស្សីកែវ បានចាប់ផ្តើមសាងសង់កាលពីឆ្នាំ២០០៥ និងដំណើរការនៅឆ្នាំ២០០៦ ដែលនាពេលនោះតំបន់ជុំវិញគឺជាដីវាល និងបឹង ហើយក៏ពុំទាន់មានលំនៅឋានរបស់ប្រជាពលរដ្ឋរស់នៅទេ ។ លុះមកដល់ឆ្នាំ២០១៣ ទើបមានប្រជាពលរដ្ឋមកតាំងទីលំនៅជាបណ្តើរៗ និងមានក្រុមហ៊ុនឯកជនមួយចំនួន មកសាងសង់ផ្ទះល្វែងលក់ជូនប្រពលរដ្ឋជាបន្ត បន្ទាប់រហូតដល់បច្ចុប្បន្ន ដែលផ្ទះខ្លះបានសង់មកជាប់នឹងរបងរោងចក្រ
តែម្តង ។
ផ្អែកលើកិច្ចព្រមព្រៀងទិញ-លក់អគ្គិសនី (PPA) រវាងអគ្គិសនីកម្ពុជានិងក្រុមហ៊ុនខូលប៊ីន ត្រូវបញ្ចប់អាណត្តិនៅពាក់កណ្តាលឆ្នាំ២០១៩។កន្លងមកនេះ ស្ថានភាពនយោបាយមានស្ថិរភាពល្អ បានផ្តល់ជំនឿទុកចិត្តដល់ប្រជាពលរដ្ឋ ក៏ដូចជាអ្នកវិនិយោគក្នុងនិងក្រៅប្រទេសកាន់តែច្រើន ធ្វើឱ្យតម្រូវការថាមពលអគ្គិសនីមានការកើនឡើងយ៉ាងគំហុកលើសពីការព្យាករ ជាហេតុនាំឲ្យអគ្គិសនីកម្ពុជា អាចត្រូវប្រឈមនឹងការខ្វះប្រភពផ្គត់ផ្គង់ថាមពលច្រើនក្នុងរង្វង់ពី២ ទៅ៣ឆ្នាំខាងមុខនេះ ពិសេសនៅរដូវប្រាំង ។
ក្នុងនាម ជាអង្គភាពរដ្ឋតំណាងឱ្យរាជរដ្ឋាភិបាលកម្ពុជា ដែលមានភារកិច្ចនិងកាតព្វកិច្ចបន្តរក្សាស្ថិរភាពផ្គត់ផ្គង់ថាមពលអគ្គិសនីជូនអតិថិជនទូទៅទូទាំងប្រទេសឲ្យមានស្ថិរភាពល្អប្រសើរ និងដើម្បីរួមចំណែកក្នុងការកាត់បន្ថយហានិភ័យខាងលើ អគ្គិសនីកម្ពុជាចាំបាច់ត្រូវរក្សាប្រភពផ្គត់ផ្គង់ពីរោងចក្រខូលប៊ីនខាងលើ ដែលមានស្រាប់បន្តទៀតសិន រហូតដល់អគ្គិសនីកម្ពុជា មានប្រភពផ្គត់ផ្គង់គ្រប់គ្រាន់ ឆ្លើយតបនឹងតម្រូវការជាក់ស្តែង ។ កោះសន្តិភាព ពុំទាន់អាចស្វែងរកការបំភ្លឺពីក្រុមហ៊ុនបាននៅឡើយទេ ៕
ចែករំលែកព័តមាននេះ