ខេត្តកំពង់ចាម ៖ ដោយអនុវត្តន៍តាមការណែនាំរបស់លោក អ៊ុន ចាន់ដា អភិបាលខេត្តកាលពីថ្ងៃទី២៩ ធ្នូ កម្លាំងសមត្ថកិច្ចបានបើកកិច្ចប្រតិបត្តិការបង្ក្រាបល្បែងបញ្ជល់មាន់ក្នុងនោះរួមមាន ស្រុកបាធាយ ស្រុកព្រៃឈរ…
ខេត្តកំពង់ចាម ៖ ដោយអនុវត្តន៍តាមការណែនាំរបស់លោក អ៊ុន ចាន់ដា អភិបាលខេត្តកាលពីថ្ងៃទី២៩ ធ្នូ កម្លាំងសមត្ថកិច្ចបានបើកកិច្ចប្រតិបត្តិការបង្ក្រាបល្បែងបញ្ជល់មាន់ក្នុងនោះរួមមាន ស្រុកបាធាយ ស្រុកព្រៃឈរ និងក្រុងកំពង់ចាម ដោយរឹបអូសបានវត្ថុតាងជាច្រើន តែមិនបានឃាត់ខ្លួនជនណាម្នាក់នោះទេ ។ ជាមួយនោះដោយមានការឯកភាពពីលោក ហួត វុទ្ធី ព្រះរាជអាជ្ញាអមសាលាដំបូងខេត្ត វត្ថុតាងត្រូវបានប្រមូលដុតកម្ទេចចោលនិងស្រាវជ្រាវរកម្ចាស់សង្វៀនបញ្ជល់មាន់មកទទួលខុសត្រូវ ។
លោកឧត្តមសេនីយ៍ទោ ឯម កុសល ស្នងការនគរបាលខេត្តបានឲ្យដឹងថា ក្រោមការចង្អុលបង្ហាញរបស់គណៈបញ្ជាការឯកភាពខេត្តរូបលោកបានចាប់ឱ្យកម្លាំងនគរបាលនៅតាមបណ្ដាស្រុក-ក្រុងចំនួន១០ត្រូវតាមដានល្បែងបញ្ជល់មាន់បើកលេងលួចលាក់ដែលខុសច្បាប់ប្រសិនបើឃើញត្រូវតែបង្ក្រាប ដើម្បីពង្រឹងគោលនយោបាយភូមិឃុំមានសុវត្ថិភាព ។
លោកឧត្តមសេនីយ៍ស្នងការបានឲ្យដឹងទៀតថា ចំពោះករណីទី១ នៅថ្ងៃទី២៩ ធ្នូ ២០១៩ វេលាម៉ោង៨និង១៥នាទីព្រឹក បន្ទាប់ពីទទួលបានព័ត៌មានពីប្រជាពលរដ្ឋភ្លាមៗនោះបានបញ្ជាដល់កម្លាំងជំនាញរបស់អធិការដ្ឋាននគរបាល ស្រុកបាធាយ, កម្លាំងរបស់ប៉ុស្ដិ៍នគរបាលតាំងក្រាំង សហការជាមួយកម្លាំងប៉ុស្តិ៍នគរបាលរដ្ឋបាលស្វាយអំពារ ស្រុកមុខកំពូល និងកម្លាំងប្រជាការពារភូមិជើងឆ្នុក និងភូមិកំពង់ព្រះ ឃុំតាំងក្រាំង ចុះបង្ក្រាបទីតាំងបញ្ជល់មាន់ ស្ថិតនៅចំណុចទំនប់មេទឹកត្រពាំងធំ ជាប់ព្រំប្រទល់ស្រុកមុខកំពូល ខេត្តកណ្ដាល ជាមួយនឹងស្រុកបាធាយ ។ សូមបញ្ជាក់ថា ចំពោះទីតាំងនេះមិនទាន់មានសកម្មភាពនៅឡើយទេ ហើយសមត្ថកិច្ចបានរុះរើសម្ភារនិងរោងដុតចោលនៅនឹងកន្លែងតែម្ដង ។
ករណីទី២ នៅថ្ងៃទី២៩ ធ្នូ ឆ្នាំ២០១៩ វេលាម៉ោង១១និង៥នាទី បន្ទាប់ពីទទួលបានព័ត៌មានពីប្រជាពលរដ្ឋបានបញ្ជាដល់កម្លាំងជំនាញរបស់អធិការដ្ឋាននគរបាលក្រុងកំពង់ចាម សហការជាមួយកម្លាំងប៉ុស្តិ៍នគរបាលរដ្ឋបាលបឹងកុក ដឹកនាំដោយលោកវរសេនីយ៍ទោ ឃឹម គឹមសេង អធិការរងទទួលផែនព្រហ្មទណ្ឌបានចុះបង្ក្រាបករណីលួចលេងល្បែងស៊ីសងបញ្ជល់មាន់ដាក់លុយនៅចំណុចក្នុងព្រៃ ស្ថិតក្នុងភូមិឡឥដ្ឋ សង្កាត់បឹងកុក ក្រុងកំពង់ចាម ។ ជាលទ្ធផលនៅពេលកម្លាំងសមត្ថកិច្ចយើងចុះទៅដល់មុខសញ្ញាញៀនល្បែងទាំងអស់នោះបាននាំគ្នារត់គេចខ្លួនបាត់អស់ ។ ដោយបន្សល់ទុកវត្ថុតាងរួមមានមាន់១ក្បាល(ងាប់) កន្ត្រកដាក់មាន់ចំនួន២ម៉ូតូចំនួន៦គ្រឿង ។
ចំពោះករណីទី៣ វេលាម៉ោង១២និង៥នាទី កម្លាំងជំនាញរបស់អធិការដ្ឋាននគរបាលស្រុកព្រៃឈរដឹកនាំដោយ លោកវរសេនីយ៍ទោ សួន រស់ អធិការរងទទួលផែននគរបាលព្រហ្មទណ្ឌចុះបង្ក្រាបករណីលួចលេងល្បែងស៊ីសងខុសច្បាប់បញ្ជល់មាន់នៅចំណុចដីទួលខាងជើងភូមិអង្គ្រង ឃុំខ្វិតធំ ជាដីរបស់ឈ្មោះ ថន ពៅ ភេទស្រី អាយុ៥៣ឆ្នាំ ។
ជាលទ្ធផល នៅពេលដែលកម្លាំងសមត្ថកិច្ចយើង ចុះទៅជិតដល់ពួកមុខសញ្ញាញៀនល្បែងទាំងអស់នោះបានដឹងខ្លួនហើយនាំគ្នារត់គេចខ្លួនបាត់អស់ ។ ដោយបន្សល់ទុកវត្ថុតាងរួមមាន មាន់ចំនួន២ក្បាល(ងាប់) ម៉ូតូម៉ាកស្គូពី១គ្រឿងពណ៌ក្រហម(គ្មានផ្លាកលេខ) ។ ស្កុតសម្រាប់រុំខ្នាយមាន់១ដុំ ។
យោងតាមប្រសាសន៍របស់លោក អ៊ុន ចាន់ដា អភិបាលខេត្តបានបញ្ជាក់ឲ្យដឹងនៅក្នុងពេលប្រារព្ធកម្មវិធីប្រយុទ្ធប្រឆាំងការជួញដូរមនុស្សដែលបានធ្វើ ឡើងនៅបរិវេណសាលាស្រុកចំការលើ នាពេលកន្លងមកដោយគូសបញ្ជាក់ថា ក្នុងករណីដែលសមត្ថកិច្ចចុះបង្ក្រាបល្បែងស៊ីសងបញ្ជល់មាន់និងអាប៉ោងដែលខុសច្បាប់នៅដីចម្ការរបស់អ្នកណាម្នាក់គឺម្ចាស់ចម្ការនោះនឹងត្រូវសមត្ថកិច្ចកោះហៅមកសួរនាំហើយប្រសិនបើមានករណីល្បែងស៊ីសងនៅបន្តលួចលេងដោយខុសច្បាប់ទៀតនោះសមត្ថកិច្ចនឹងមានវិធានការផ្លូវច្បាប់ដោយបញ្ជូនម្ចាស់ចម្ការឬក៏ម្ចាស់ដីទៅកាន់សាលាដំបូងខេត្តចាត់វិធានការទៅតាមច្បាប់ ៕
ចែករំលែកព័តមាននេះ