រាជធានីភ្នំពេញ ៖ បន្ទាប់ពីរើសបានមេថ្មីសហព័ន្ធកីឡាវាយកូនឃ្លីលើតុ(ប៉េងប៉ុង) បានប្រកាសពីការរៀបចំព្រឹត្តិការណ៍ប្រកួតជ្រើសរើសជើងឯកថ្នាក់ជាតិសម្រាប់ឆ្នាំ២០១៩ និងអបអរសាទរទិវាជ័យជម្នះ៧មករា ខួបលើកទី៤១ ។ ការប្រកួតនឹងប្រព្រឹត្តទៅចាប់ពីថ្ងៃទី២ ដល់ ថ្ងៃទី៧ ខែមករា ឆ្នាំ២០២០ ខាងមុខនេះ នៅសាលដំបូលទូកថ្មី ក្នុងពហុកីឡដ្ឋានជាតិអូឡាំពិក រាជធានីភ្នំពេញ។
លោកស៊ុន សុទ្ធារិទ្ធ អគ្គលេខាធិការសហ ព័ន្ធកីឡាវាយកូនឃ្លីលើតុ បានបញ្ជាក់ក្នុងសេចក្ដីជូនដំណឹងថា ព្រឹត្តិការណ៍ប្រកួតជើងឯកថ្នាក់ជាតិកីឡាវាយកូនឃ្លីលើតុប្រចាំឆ្នាំ២០១៩ និងអបអរសាទរទិវាជ័យជម្នះ៧មករា ខួបលើកទី៤១ (៧ មករា ១៩៧៩-៧ មករា ២០២០) នៅថ្ងៃទី២ ខែមករា ខាងមុខនេះ មានវិញ្ញាសាប្រកួតចំនួន៤ គឺវិញ្ញាសាក្រុមបុរសក្របខណ្ឌ ក១ វិញ្ញាសាវាយគូបុរសក្របខណ្ឌក១-ក២ វិញ្ញាសាឯកត្តជនបុរសក្របខណ្ឌក១-ក២ និង វិញ្ញាសាឯកត្តជននារីក្របខណ្ឌក១-ក២ ។
ការដាក់ពាក្យចូលរួមប្រកួត គឺចាប់ពីថ្ងៃជូនដំណឹងរហូតដល់ថ្ងៃទី១ ខែមករា ឆ្នាំ២០២០ វេលាម៉ោង៨ និង៣០នាទីព្រឹក ជួបជុំសមាគម ក្លិប ដើម្បីប្រជុំចាប់ឆ្នោតនៅទីស្នាក់ការសហព័ន្ធកីឡាវាយកូនឃ្លីលើតុ ស្ថិតក្នុងពហុកីឡដ្ឋានជាតិ អូឡាំពិក(សាលដំបូលទូកថ្មី)។
បើតាមមន្ត្រីជាន់ខ្ពស់គណៈកម្មាធិការជាតិអូឡាំពិកកម្ពុជាឲ្យដឹងថា ការយឺតយ៉ាវក្នុងការរៀបចំការប្រកួតកីឡាវាយកូនឃ្លីលើតុជើងឯកថ្នាក់ជាតិប្រចាំឆ្នាំ២០១៩នេះ ដោយសារតែឆ្នាំនេះជាប់រវល់មមាញឹករឿងត្រៀមចេញទៅស៊ីហ្គេមនៅប្រទេសហ្វីលីពីនដែលទើបបញ្ចប់ទៅកន្លងមកនេះ។
មួយទៀតសហព័ន្ធកីឡាវាយកូនឃ្លីលើតុ(ប៉េងប៉ុង)មានបញ្ហាផ្ទៃក្នុងសហព័ន្ធ គឺដោយសារទី១ ប្រធានចាស់លោកឧកញ៉ា រ័ត្ន សាខន បានលាឈប់លែងធ្វើសកម្មភាព និងទី២ដោយសារមានការឯកភាពនិងសំណូមពរពីព្រឹទ្ធាចារ្យ ក៏ដូចជាគ្រូបង្វឹកនិង ក្លិបក្នុងសហព័ន្ធឲ្យជួយដោះស្រាយនៅលើរចនា សម្ព័ន្ធដឹកនាំនោះ គណៈកម្មាធិការជាតិអូឡាំពិកកម្ពុជា រួមជាមួយក្រសួងអប់រំ យុវជន និងកីឡា នៅថ្ងៃទី២១ ខែវិច្ឆិកា ឆ្នាំ២០១៩ សម្រេចរៀបចំធ្វើមហាសន្និបាតវិសាមញ្ញ ដើម្បីកែសម្រួលរចនាសម្ព័ន្ធដឹកនាំ ដែលក្នុងនោះសមាជិកទាំងអស់ក៏បានឯកភាពជ្រើសរើសលោកនាយ ឧត្ដមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍ ឲ្យធ្វើជាប្រធានសហព័ន្ធកីឡាវាយកូនឃ្លីលើតុកម្ពុជា ដែលមានសមាជិកប្រតិបត្តិសរុបចំនួន១១នាក់ ។
ដូច្នេះហើយទើបពេលនេះ សហព័ន្ធចាប់ផ្ដើមការងាររបស់ខ្លួនឡើងវិញ ដោយរៀបចំធ្វើជើងឯករួមជាមួយនឹងការអបអរសាទរទិវាជ័យជម្នះ៧ មករា ខួបលើកទី៤១ តែម្ដង។
ទោះបីយ៉ាងណា ការរៀបចំការប្រកួតជ្រើសរើសជើងឯកថ្នាក់ជាតិសម្រាប់ឆ្នាំ២០១៩ របស់សហព័ន្ធកីឡាវាយកូនឃ្លីលើតុ ក៏ស្ថិតក្រោមគម្រោងចំណាយប្រចាំឆ្នាំរបស់ក្រសួងអប់រំ យុវជន និងកីឡា ដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ