តាមប្រភពព័ត៌មាន Soccer Laduma បានឱ្យដឹងថា តារាឆ្នើមរបស់ក្រុមតោខៀវ Chelsea បានធ្វើឱ្យមានការសង្ស័យកាន់តែខ្លាំង លើអនាគតរបស់គាត់នៅឯក្លិបបច្ចុប្បន្ន បន្ទាប់ពីបានអះអាងថា គាត់នឹងចាកចេញពីអ្វីៗទាំងអស់ ប្រសិនបើក្លិបអ្នកមានបុណ្យ Barcelona ហៅឱ្យទៅលេង ។
ពេលវេលារបស់ Pedro នៅ Stamford Bridge នឹងត្រូវបញ្ចប់នៅពេលឆាប់ៗនេះ បន្ទាប់មិនបន្តកុងត្រា ក្រោមការដឹកនាំរបស់លោក Frank Lampard នៅរដូវកាលនេះ។ កិច្ចសន្យារបស់ខ្សែប្រយុទ្ធអេស្ប៉ាញនឹងផុតកំណត់នៅចុងបញ្ចប់នៃរដូវកាលនេះ ហើយគាត់បានសារភាពថាគាត់នឹងមិនស្ទាក់ស្ទើរក្នុងការវិលត្រឡប់ទៅកាន់ទឹកដី Camp Nou វិញទេ។
កីឡាករអេស្ប៉ាញរូបនេះបានប្រាប់សារព័ត៌មាន L’Esportiu ថា៖«ប្រសិនបើ Barcelona ហៅខ្ញុំ ខ្ញុំនឹងទុកអ្វីៗចោលទាំងអស់។ នៅមុនរដូវកាលនេះ លទ្ធភាពនៃការវិលត្រឡប់ទៅវិញ បានកើតឡើងនៅពេល ដែលក្រុមតោខៀវ Chelsea លេងប៉ះនឹងក្រុម Barcelona »។
គេបានបន្តថា៖ «ខ្ញុំបាននិយាយជាមួយគ្រូបង្វឹកប៉ុន្តែទ្វារបានបិទយ៉ាងលឿន។ ឥឡូវខ្ញុំមិនដឹងថានឹងមានអ្វីកើតឡើងនោះទេ»។
Pedro ក៏បានបន្តពន្យល់ពីមូលហេតុដែលគាត់ចាកចេញពីក្លិបយក្សកាតាឡាន់ ហើយមកលេងនៅក្រុមតោខៀវ Chelsea នៅដើមរដូវកាល ២០១៥-២០១៦ ផងដែរ ដោយប្រាប់ថា៖ «ខ្ញុំបានចាកចេញពី Barcelona ព្រោះខ្ញុំមានភាពក្លាហាន។ Neymar បានមកដល់ ធ្វើឱ្យខ្ញុំលេងបានតិចជាងមុន។ រឿងទាំងនេះកើតឡើងនៅក្នុងបាល់ទាត់ជាធម្មតា»៕
ចែករំលែកព័តមាននេះ