រាជធានីភ្នំពេញ៖ បន្ទាប់ពីរាជរដ្ឋាភិបាលដាក់ចេញនូវគោលនយោបាយជំរុញផលិតកម្មស្រូវ ក្នុងនោះរាជរដ្ឋាភិបាលបានដាក់ផែនការជំរុញការនាំចេញអង្ករទៅបរទេសឱ្យបាន ១ លានតោនក្នុងមួយឆ្នាំ រាប់ចាប់តាំងពីពេលនោះរហូតមកដល់ឆ្នាំ២០១៩នេះ អាចនិយាយថាមិនទទួលបានជោគជ័យដូចការចង់បាននោះទេ ។ ប៉ុន្តែនៅក្នុងគោលនយោបាយមួយនេះរាជរដ្ឋាភិបាលទទួលជោគជ័យទៅលើផលិតកម្មស្រូវ គឺកម្ពុជាអាចនៅសល់ស្រូវក្រៅពីការកែច្នៃនាំចេញអង្ករមានរហូតជិត ៦លានតោន ។
ពាក់ព័ន្ធនឹងគោលនយោបាយជំរុញផលិតកម្មស្រូវនេះកាលពីថ្មីៗនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា នៅក្នុងគោលនយោបាយរបស់យើងបានដាក់ចេញ និងជំរុញផលិតកម្មស្រូវនិងការនាំចេញអង្ករឱ្យបាន ១លានតោន ។ នៅក្នុងគោលដៅទាំង ២របស់យើងសម្រេចបានតែ ១គោលដៅទេ គឺយើងធ្វើឱ្យសល់ស្រូវនៅក្នុងប្រទេសរបស់យើង គឺប្រមាណជិត ៦លានតោន ។ តែនិយាយដល់ការនាំចេញអង្ករយើងមិនដែលនាំចេញបាន ១លានតោនទេ» ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍បន្ថែមថា «ស្ថិតនៅក្នុងស្ថានភាពជោគជ័យក្នុងគោលដៅមួយ គឺផលិតកម្មស្រូវលើសពីតម្រូវការ ។ កាលពីឆ្នាំ ២០០២យើងនៅខ្វះស្រូវនៅឡើយទេ ប៉ុន្តែក្រោយមកយើងខិតខំធ្វើឱ្យសល់ស្រូវ ១លានតោន, ២លានតោន, ៣លានតោន រហូតនៅសល់ជិត ៦លានតោន ។ ប៉ុន្តែដល់ការនាំចេញយើងមកដល់ឆ្នាំនេះ គឺមានកំណើនតិច គឺបានប្រហែល ៥៨ម៉ឺន ឬអាចដល់ ៦០ម៉ឺនតោនដល់ដំណាច់ឆ្នាំ ២០១៩ ប៉ុន្តែនៅមិនទាន់គ្រប់គោលដៅរបស់យើងកំណត់ ១លានតោននោះទេ» ។
បើតាមសម្តេច តើស្រូវដែលនៅសល់ត្រូវយកទៅណា? ស្រូវដែលនៅសល់គឺត្រូវលក់ទៅវៀតណាមប្រមាណ ៧០% និងទៅប្រទេសថៃ ៣០% ។ ផ្អែកលើបរិមាណស្រូវនៅសល់នេះរាជរដ្ឋាភិបាលកម្ពុជាតែងតែខិតខំទាក់ទាញអ្នកវិនិយោគិនឱ្យចូលមកបណ្តាក់ទុននៅក្នុងវិស័យនេះ ដើម្បីបង្កើតការងារក៏ដូចបង្កើនតម្លៃបន្ថែមលើផលិតផល ។
សម្តេចលើកឡើងថា យើងកន្លងទៅខ្វះឡសម្ងួត, ខ្វះម៉ាស៊ីនកិនស្រូវ, ខ្វះឃ្លាំង អ៊ីចឹងជម្រើសស្រូវដែលនៅសល់ គឺលក់ទៅឱ្យប្រទេសជិតខាង ។ រឿងសំខាខ់បើយើងមានចំណុចខាងលើនេះគ្រប់គ្រាន់ នៅក្នុងស្រុកគឺម្ខាងយើងមានការងារធ្វើ និងម្ខាងបានបង្កើនតម្លៃបន្ថែមនៅស្រុកយើងគឺល្អ ។ ចុងអង្ករ អង្កាម និងកន្ទក់ក៏នៅក្នុងស្រុកយើងដែលបង្កើតនៅអំណោយផលដល់ការចិញ្ចឹមសត្វនៅក្នុងស្រុកថែមទៀត ។ សម្តេចសង្កត់ធ្ងន់ថា «យើងចង់ឱ្យមិត្តបរទេសទាំងឡាយមកធ្វើឧស្សាហកម្មកែច្នៃនៅក្នុងប្រទេសកម្ពុជា ។ គោលនយោបាយឧស្សាហកម្មរបស់យើងនៅបន្ត គឺយើងចង់ទាក់ទាញលើផ្នែកពីរដែលសំខាន់ ។ ឧស្សាហកម្មទីមួយ គឺឧស្សាហកម្មកែច្នៃផលិតផលកសិកម្មដែលមានស្រាប់របស់កម្ពុជា ។ ចំណុចនេះ គឺយើងចង់បានដែលក្នុងនោះវាមិនទាមទារការប្រើប្រាស់ទុនធំពេកនោះទេ ហើយសហគ្រាសធុនតូច និងមធ្យមត្រូវដំណើរលើចំណុចនេះទាំងអ្នកនៅក្នុងស្រុក និងអ្នកនៅក្រៅស្រុក ។ ឯការចង់បានទី ២ គឺការវិនិយោគទៅលើឧស្សាហកម្មបច្ចេកវិទ្យា ។ យើងនៅរក្សាឧស្សាហកម្មអតិពលកម្ម គឺជាឧស្សាហកម្មប្រើកម្លាំងច្រើនដូចជានៅក្នុងវិស័យកាត់ដេរ ប៉ុន្តែបើយើងនៅទ្រឹងប៉ុណ្ណឹងគឺទៅមិនរួចទេ ។ ដូចនេះត្រូវទាញឧស្សាហកម្មមានជំនាញខ្ពស់ ដូចជាជប៉ុនបានមកវិនិយោគនៅក្នុងប្រទេសបានតម្លើងទុនរួចអស់ ៤០០លានដុល្លារអាមេរិក មានកម្លាំងកម្មករជំនាញដែលបានហ្វឹកហាត់ និងកំពុងធ្វើការនៅក្នុងរោងចក្រ ៧.០០០នាក់ ហើយគេនឹងពង្រីកទៅដល់ ២០.០០០នាក់» ។
ទាក់ទងនិងវិស័យកសិកម្ម និងការវិនិយោគនេះនៅពេលកន្លងមក បើតាមសម្តេចបានឱ្យដឹងថា មានអនុប្រធានធិបតីនៅប្រទេសប៉ាឡាវ បានទិញអង្ករពីអាមេរិក និងអូស្ត្រាលីមានតម្លៃថ្លៃណាស់យកទៅផ្គត់ផ្គង់នៅប្រទេសរបស់ខ្លួន ។ ក្នុងពេលនោះសម្តេចបានប្រាប់ទៅអនុប្រធានធិបតីរូបនេះបញ្ជូនអ្នកជំនាញមកសិក្សា និងបង្កើតក្រុមហ៊ុន ធ្វើជាម៉ាស៊ីនកិនស្រូវនៅកម្ពុជាតាមរយៈទិញស្រូវពីប្រជាជនរួចកិនកែច្នៃនាំចេញទៅប្រទេសរបស់ខ្លួននោះនឹងចំណេញ ព្រោះកម្ពុជាអត់មានការហាមឃាត់ទេ គឺឱ្យបរទេសវិនិយោគ ១០០% ៕ កែសម្រួលដោយ ៖ សុឃាក់
ចែករំលែកព័តមាននេះ