រាជធានីភ្នំពេញ ៖ អ្នកនាងកែវ ពេជ្រពិសី បាត់មុខពីពិភពសិល្បៈងាកទៅពង្រឹងមុខជំនួញ និងមើលថែទាំម្តាយមានជំងឺរហូតដង្ហើមចុងក្រោយរបស់គាត់ ។ បាត់បង់ម្ដាយ ពិសីបានកម្លាំងចិត្តពីមិត្តជិតដិត ក៏ចូលវិថីសិល្បៈវិញ ។ ទោះជាយ៉ាងណាក៏ដោយ ពិសី ហាក់មើលឃើញថាជីវិតសិល្បៈពេលនេះពិបាកស្តារឡើងវិញ ។
កាលពីពេល ថ្មីៗកន្លងមកកែវ ពេជ្រពិសី ឲ្យដឹងថាមានសាច់រឿងខ្លះឲ្យនាងចូលរួមសម្តែងមិនសមកេរ្តិ៍ឈ្មោះរបស់ខ្លួន ។
ក្នុងពិភពសិល្បៈ គេទទួលស្គាល់ថាកែវ ពេជ្រពិសី ជាតារាសម្តែងមានសមត្ថភាព មិនអន់ឡើយ ។ ប៉ុន្តែរយៈពេលប៉ុន្មានឆ្នាំចុងក្រោយ តារាដែលធ្លាប់តែទទួលការងារពេញដៃនេះ ត្រូវបាត់មុខ ឃ្លាតឆ្ងាយពីអ្នកគាំទ្ររហូតស្ទើរតែបាត់បង់ប្រជាប្រិយភាព ។ នៅពេលមើលឃើញពីផលលំបាក មិត្តភក្តិក្នុងសិល្បៈបានផ្តល់ឱកាស ឲ្យនាងដើរលើដានចាស់ ក្លាយតារាម៉ូដែលដូចមុន និងចេញមុខតាមកម្មវិធី ផ្សេងៗ ដើម្បីបានសាងស្នាដៃ និងរកកម្រៃចិញ្ចឹមជីវិត ។
កែវ ពេជ្រពិសី ពេលចូលសិល្បៈវិញនិយាយទាំងត្អូញត្អែរថា «កន្លងមកមានគេទាក់ទងឲ្យចូលរួមសម្តែងភាពយន្តជាបន្តបន្ទាប់ ប៉ុន្តែការដាក់តួអង្គគឺទទួលយកមិនបានតែម្តង ប្រសិនបើទទួលថតគឺមិនអាចឲ្យយើងលេចធ្លោ មានតែបន្ទាប ។ នាងខ្ញុំមិនបានតាំងចិត្តជ្រើសរើស ឬតាំងខ្លួនថាត្រូវជាដើរតួឯកនោះទេ តែសុំតែតួដែលសម្តែងនោះសមតាមប្រវត្តិការងារសិល្បៈ ដែលនាងខ្ញុំបានកសាងនោះក៏អស់ចិត្ត ។
មានអាយុច្រើន វ័យទៅមុខ សួរថា អាចទៅរួចទេ ឲ្យដើរតួជាសិស្សនៅសាកលវិទ្យាល័យ ។ ប្រសិនជាតួម្តាយ ឬបងស្រី សុំឲ្យតែមានសាច់រឿងមើល ឬមួយសំខាន់ម្នាក់ដែរ ។ មូលហេតុទាំងនេះហើយទើបនាងខ្ញុំ មិនបានថតរឿង ថ្មីៗ ជូនអ្នកគាំទ្រ ពីមួយខែទៅមួយខែ ក្រៅពីងាកមើលថែទាំផ្នែកមុខរបរសំអាងការ »។
កែវ ពេជ្រពិសី ចំពោះស្នេហានាងប្រាថ្នាចង់រកគូស្នេហ៍ថ្មីជាបុរសនៅក្នុងស្រុក ក្រោយប៉ះស្នេហ៍ មិនសមប្រកបជាមួយបុរសនៅក្រៅស្រុក។ «ដោយសារដំបៅបេះដូងធ្លាប់ឈឺម្តងរួចទៅហើយ អ៊ីចឹងការសម្រេចចិត្តដោយលឿនរហ័សពេក មិនមែនជាជម្រើសល្អនោះទេ ហេតុនេះហើយ នាងខ្ញុំសុខចិត្តយឺតបន្តិចចុះឱ្យតែច្បាស់លាស់ជាមួយគ្នា»៕ (កែសម្រួលដោយ ៖ បុប្ផា)
ចែករំលែកព័តមាននេះ