ខេត្តមណ្ឌលគិរី ៖ រថយន្តដឹកឈើពេញព្រៀបមួយគ្រឿងត្រូវបានគេប្រទះឃើញក្រឡាប់ធ្លាក់ចេញពីផ្លូវកាលពីព្រឹកថ្ងៃទី២៨ ធ្នូ ឆ្នាំ២០១៩ នៅចំណុចផ្លូវបំបែកប៊ូស្រា ក្នុងភូមិពូលូង សង្កាត់រមនា ក្រុងសែនមនោរម្យ។
តាមសេចក្តីរាយការណ៍បានឲ្យដឹងថា ឈើខាងលើនេះត្រូវបានគេដឹកចេញពីភូមិក្រង់តេះ ឃុំស្រែអំពូម ស្រុកពេជ្រាដា ជាឈើដេញថ្លៃពីជំនាញបរិស្ថាន។ បើតាមការបញ្ជាក់ពីមន្ត្រីថា ឈើនេះមានចំនួន៥រថយន្តបានដឹកចេញទៅអស់ហើយ នៅសល់តែមួយគ្រឿងនេះ ពេលឡើងចំណោតក៏ដាច់កាឡេរអិលថយក្រោយក្រឡាប់តែម្តង។
គួរបញ្ជាក់ថា គណៈកម្មការជាតិទប់ស្កាត់បទល្មើសព្រៃឈើកាលពីអំឡុងដើមឆ្នាំ២០១៩ បានបង្ក្រាបការកាប់បំផ្លាញឈើខុសច្បាប់តាមបណ្តាក្រុមហ៊ុនទូទាំងខេត្តមណ្ឌលគិរី និងបានចាប់ខ្លួនអ្នកពាក់ព័ន្ឋបញ្ជូនទៅតុលាការ ។
បន្ទាប់ពីប្រតិបត្តិការនេះបញ្ចប់ឈើជាង១ពាន់ម៉ែត្រគូបត្រូវបានគណៈកម្មការជាតិដាក់ដេញថ្លៃ ឲ្យដឹកចេញពីខេត្តមណ្ឌលគិរី ទៅស្កុបទុកនៅខេត្តកំពង់ធំ៕ (កែសម្រួលដោយ ៖ ធីតា)
ចែករំលែកព័តមាននេះ