រាជធានីភ្នំពេញ ៖ កីឡាករ Arturo អ្នកប្រដាល់អេស្ប៉ាញ ប្រកួតចាញ់នន់ ជំនិត មកពីក្លឹបស៊ីម៉ាក់ ដោយពិន្ទុ ទាំងមិនអស់ចិត្ត ឯឃឹម ឌីម៉ា មកពីក្លឹបរស្មីភូមិគាប ទោះខំប្រឹងបញ្ចេញស្នៀតកែងយ៉ាងណាក៏ដោយក៏មិនអាចយកឈ្នះកីឡាករ Cristian មកពីអេស្ប៉ាញដូចគ្នា គឺបានត្រឹមតែស្មើពិន្ទុប៉ុណ្ណោះ ក្នុងការប្រកួតនៅលើសង្វៀនស្ថានីយទូរទស្សន៍ប៉ុស្តិ៍លេខ៣ កាលពីរសៀលថ្ងៃទី៥ មីនា កន្លងមកនេះ ។
ប្រវត្តិឈានជើងមកកម្ពុជា៤លើក Arturo ធ្លាប់ឈ្នះ១ ស្មើ១ និងចាញ់២ ។ Arturo មានប្រៀបខាងកម្ពស់ជាងជំនិត ហើយល្បិចប្រកួតរបស់គេក៏អស្ចារ្យណាស់ដែរ ប៉ុន្តែរាល់ការវាយចេញដូចជាមិនសូវទទួលបានផលល្អឡើយ ។ Arturo បានព្យាយាមដើរចូលវាយសំរុកទៅលើជំនិតតាំងពីទឹកទី១ម៉្លេះ ជាពិសេសស្នៀតជើងរបស់គេបានទាត់សំដៅកញ្ចឹង.កជំនិតយ៉ាងសាហាវតែជំនិតគេចផុតរហូត ។ ជំនិតទាបជាងបន្តិចមែន តែគេអាចដើរចូលនិងវាយសងមកវិញបានយ៉ាងល្អ ម្យ៉ាងស្នៀតជើងរបស់គេបានចាក់ចូលមុខ Arturo ពេញៗទៀតផង ។ ក្នុងទឹកទី៤ Arturo វាយបានយ៉ាងល្អបំផុត តែក៏ត្រូវជំនិតធ្វើឱ្យគេចាញ់ទាំងមិនអស់ចិត្តឡើយ ។
ឃឹម ឌីម៉ា មិនមានសំណាងបានឈ្នះកីឡាករ Cristianទេ ខណៈពេលដែលគេមានឱកាសគ្រប់គ្រងស្ថានភាពប្រកួតស្ទើរតែទាំងស្រុងតាំងពីទឹកទី១ម៉្លេះ ។ ពួកអ្នកលេងភ្នាល់លុយ សុទ្ធតែបានចាប់យកខាងឌីម៉ា ដោយតសន្លប់ខាង Cristian នៅក្នុងទឹកទី៣ ឬទឹកទី៤ប៉ុណ្ណោះ ម្យ៉ាងទៀតក៏មានអ្នករង់ចាំឧបត្ថម្ភដល់ឌីម៉ាជាច្រើនទៀតប្រសិនបើឌីម៉ាវាយគូប្រកួតឱ្យសន្លប់ ។ ប៉ុន្តែទីបំផុតគឺមិនបានសមនឹងបំណងឡើយ ព្រោះសមត្ថភាពរបស់ឌីម៉ាមិនអាចទៅរួច ។ ក្នុងទឹកទី១ ឌីម៉ាមិនបានវាយបកភ្លាមៗទេ បើទោះជា Cristianវាយសំរុកយ៉ាងណាក៏ដោយ គឺគេគិតតែពីការពារមុខហើយដើរចូល ព្រោះគេចង់បញ្ចេញស្នៀតកែងវាយតែម្តងឱ្យស្រេច ប៉ុន្តែស្នៀតកែងរបស់គេមិនអាចទម្លុះបារ៉ាស់របស់ Cristian បានឡើយ ។
Cristian វាយផងដកថយផង ចំណែកឌីម៉ាគិតតែពីរុលចូលទាត់ចេញម្តងម្កាល ប៉ុន្តែស្នៀតកែងរបស់គេបានវាយសន្ធាប់ក្នុងគោលបំណងបំបាក់អ្នកប្រដាល់មកពីអេស្ប៉ាញម្នាក់នេះមិនឱ្យលើសពីទឹកទី៣បានឡើយ ។ ប៉ុន្តែគេសង្កេតឃើញកម្លាំងរបស់ឌីម៉ាស្រុតចុះបន្តិចនៅក្នុងទឹកទី៤ ។ ក្នុងទឹកទី៤និងទឹកទី៥ ឌីម៉ានៅសល់តែកម្លាំងចិត្តប៉ុណ្ណោះ ឯកម្លាំងកាយរបស់គេនៅសេសសល់បន្តិចបន្តួចប៉ុណ្ណោះ ។ ចលនាវាយលុករបស់ Arturo មើលទៅដូចជាដកថយច្រើនបន្តិចមែន តែការវាយចេញរបស់គេបានផលល្អច្រើន ។ លទ្ធផលស្មើពិន្ទុគ្នា លើកនេះត្រូវបានគណៈកម្មការប្រកាសឱ្យសងសឹកនាលើកក្រោយម្តងទៀតតែមិនដឹងថ្ងៃណានោះទេ ។
ជិន រ៉ា មកពីសមាគមកីឡាក្រសួងការពារជាតិ យកឈ្នះបឿត រដ្ឋា មកពីក្លឹបសិង្ហកីឡា បានដោយពិន្ទុ ។ នួន វិចិត្រ មកពីសមាគមកីឡាក្រសួងមហាផ្ទៃ ឈ្នះសំ ចន្ថា មកពីក្លឹបសាលវ័ន្តកីឡា ដោយពិន្ទុ ។ ផល ផាន មកពីក្លឹបឥន្ទ្រីកីឡា ប្រកួតជាសាកលអាជីពបានយកឈ្នះស្វាយ ចាន់ថន មកពីក្លឹបកងរាជអាវុធហត្ថរាជធានីភ្នំពេញបានដោយពិន្ទុ ៕
ចែករំលែកព័តមាននេះ