ខេត្តកំពង់ចាម ៖ នៅតាមផ្លូវ និងតាមមាត់ទន្លេមេគង្គក្នុងក្រុងកំពង់ចាមត្រូវបានរៀបចំភ្លើងលំអរួមនឹងស្តង់តាំងពិព័រណ៍ជាង២០០ស្តង់ ដើម្បីត្រៀមស្វាគមន៍ចូលឆ្នាំសកល និងបុណ្យខួបជាតិ៧មករា ។ ហើយនៅពេលល្ងាចតាមផ្លូវជួរដងទន្លេមានប្រជាពលរដ្ឋ ធ្វើដំណើរតាមម៉ូតូនិងរថយន្តច្រើនកុះករផងដែរ។
លោកចាន់ ផល្លី អភិបាលក្រុងកំពង់ចាម ប្រាប់ឱ្យដឹងនៅល្ងាចថ្ងៃទី២៦ ធ្នូ ឆ្នាំ២០១៩ ថាក្រោមការយកចិត្តទុកដាក់របស់អាជ្ញាធរខេត្តពីមួយអាណត្តិទៅមួយអាណត្តិបានខិតខំប្រឹងអភិវឌ្ឍនូវហេដ្ឋារចនាសម្ព័ន្កក្នុងក្រុងកំពង់ចាមដោយមានផ្លូវអ៊ុតកៅស៊ូសួនច្បារបំពាក់ដោយអំពូលភ្លើងចំរុះពណ៌ផងដែរ។
លោកចាន់ ផល្លី អភិបាលក្រុងកំពង់ចាម បន្តឲ្យដឹងទៀតថា ដោយមានការណែនាំពីលោក អ៊ុន ចាន់ដា អភិបាលខេត្ត លោកបានរៀបចំកម្លាំងមន្ត្រីក្រោមឱវាទជាច្រើននាក់ ដោយបានចុះណែនាំដល់ប្រជាពលរដ្ឋម្ចាស់ផ្ទះសំណាក់ សណ្ឋាគារនិងក្រុមហ៊ុននានា ពិសេសនៅតាមផ្លូវបងទន្លេមេគង្គ ត្រូវតុបតែងភ្លើងលម្អ ដើម្បីត្រៀមចូលឆ្នាំសកលនិងបុណ្យខួបអនុស្សាវរីយ៍លើកទី៤១នៃទីវាជ័យជម្នះ៧មករា១៩៧៩-៧ មករា២០២០។ រហូតមកដល់ល្ងាចថ្ងៃទី២៦ ធ្នូ អ្វីៗ ត្រូវបានរៀបចំរួចរាល់ហើយ។ ក្រោមការដឹកនាំរបស់សម្ដេចតេជោសែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យប្រទេសមានសន្តិភាព នៅគ្រប់ទិសទី ហើយហេដ្ឋារចនាសម្ព័ន្ធត្រូវបានរីកចម្រើនចាប់ពីទីក្រុងរហូតដល់ជនបទដាច់ស្រយាល។
លោកអភិបាលក្រុងបានបន្តថា ដោយឡែកនៅតាមមាត់ទន្លេក្រុងកំពង់ចាមមានសួនច្បារ កន្លែងហាត់ប្រាណ បង្កលក្ខណៈងាយស្រួលដល់ប្រជាពលរដ្ឋមកហាត់ប្រាណមិនថាព្រឹកឬក៏ល្ងាចនោះទេ។ ក្រោមការយកចិត្តទុកដាក់របស់អាជ្ញាធរខេត្តតាមផ្លូវដងទន្លេ ពេលរាត្រីបានបំពាក់ភ្លើងចំរុះពណ៌ ដែលមើលទៅស្អាត គួរអោយគយគន់ ហើយនៅពេលល្ងាច និងយប់មានប្រជាពលរដ្ឋមកកម្សាន្តលេងពីគ្រប់ទិសទី ជាមួយនោះក៏មានរមណីយដ្ឋានកែច្នៃឆ្នេរខ្សាច់កោះប៉ែន ក៏នឹងត្រៀមចាំទទួលភ្ញៀវមកលេងកំសាន្តក្នុងឱកាសបុណ្យឆ្លងឆ្នាំសកលផងដែរ។
លោកស៊ាន សុគុណ ប្រធានមន្ទីរទេសចរណ៍ខេត្តមានប្រសាសន៍ឲ្យដឹងដែរថា ក្រោមការចង្អុលបង្ហាញរបស់លោកអ៊ុន ចាន់ដា អភិបាលខេត្ត ក្នុងឱកាសឆ្លងឆ្នាំសកលនឹងមានរៀបចំការតាំងពិព័រណ៍ផលិតផលខ្មែរដែលមានចំនួនជាង២០០ស្តង់ចាប់ពីថ្ងៃទី៤ដល់ទី៨ មករា ឆ្នាំ២០២០ នៅក្រោយមន្ទីរវប្បធម៌ខេត្ត សូមឲ្យប្រជាពលរដ្ឋទាំងនាំគ្នាគាំទ្រផលិតផលខ្មែរឱ្យបានផុលផុស ៕ (កែសម្រួលដោយ ៖ ធីតា)
ចែករំលែកព័តមាននេះ