រាជធានីភ្នំពេញ៖ ថ្នាក់ដឹកនាំនៃរដ្ឋលេខាធិការដ្ឋានអាកាសចរស៊ីវិលបានឲ្យដឹងកាលពីមុនប្រទេសកម្ពុជានាឆ្នាំ១៩៩៣ មានតែក្រុមហ៊ុនអាកាសចរណ៏អន្តរជាតិមួយគត់ហោះមកប្រទេសកម្ពុជា និងសមត្ថភាពអាកាសយានដ្ឋានអន្តរជាតិមានចំណតយន្តហោះ ដែលអាចចតបានតែ ១០ យន្តហោះ ប៉ុណ្ណោះ ។
យ៉ាងណាមិញនាពេលបច្ចុប្បន្ននេះគឺមានក្រុមហ៊ុនអាកាសចរអន្តរជាតិ ហោះមកកម្ពុជា ចំនួន ៤៤ ក្រុមហ៊ុន បូករួមក្រុមហ៊ុនអាកាសចរក្នុងស្រុកចំនួន ០៥ទៀត ដោយឡែកចំណតយន្តហោះអាចចតបានយន្តហោះបានចំនួន ៤០ ដែលក្នុហនោះ យន្តហោះប្រភេទធំអាចចតបានចំនួន១០ យន្តហោះ និងនាពេលនេះប្រទេសកម្ពុជា ចុងខែវិច្ឆិកានេះបានទទួលអ្នក ១០ លាន និងប្រាំសែននាក់។ នេះជាការលើកឡើងរបស់លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរស៊ីវិល នាឱកាសជួបពិភាគ្សាការងារជាមួយគណប្រតិភូ ក្រសួងដឹកជញ្ចូនឡាវ ដឹកនាំដោយ លោក Mr. Sengdaove KATTIGNASACK អគ្គនាយក និងលោក Viengxay Singkham អគ្គនាយករង អាជ្ញាធរអាកាសចរស៊ីវិលឡាវកាលពីសប្តាហ៍មុន ។
នៅក្នុងកិច្ចប្រជុំដាច់ដោយឡែកមួយទៀតកាលពីដើមខែធ្នូនេះ នាឱកាសដឹកនាំគណៈប្រតិភូ ចូលរួមសន្និសីទ ស្តីពីការចរចាសេវាកម្មដឹកជញ្ជូនតាមផ្លូវអាកាស ដែលសហការរៀបចំដោយ អង្គការអាកាសចរស៊ីវិលអន្តរជាតិ (ICAO) និងអាជ្ញាធរអាកាសចរស៊ីវិល នៃព្រះរាជាណាចក្រហ្សកដានី ដោយមានតំណាង៧៦ ប្រទេសចូលរួម លោក ម៉ៅ ហាវណ្ណាល់ ដែលបានចូលរួមសន្និសីទនេះក៏បានជួបជាមួយនឹង លោកបណ្ឌិត ខាលិត សាហ្វីស (H.E.DR. KHALID SAIF) រដ្ឋមន្ត្រីដឹកជញ្ជូន នៃព្រះរាជាណាចក្រហ្សកដានី និងបានចុះអនុស្សរណៈយោគយល់ រវាងអាជ្ញាធរអាកាសចរស៊ីវិល នៃប្រទេសទាំងពីរ ដើម្បីជុំរុញឱ្យមានការហោះហើររវាងប្រទេសទាំងពីរ និងជុំរុញកិច្ចសហប្រតិបត្តិការវិស័យអាកាសចរស៊ីវិលផងដែរ។
នាពេលនោះ លោក ម៉ៅ ហាវណ្ណាល់ ក៏បានស្នើសុំទៅ លោកបណ្ឌិត ខាលិត សាហ្វីស «ឱ្យជួយស្វែងរកគ្រប់លទ្ធភាព ជុំរុញក្រុមហ៊ុនអាកាសចរណ៍ជាតិហ្សកដានី (Royal Jordanian Airlines) ដែលកំពុងហោះហើរមកកាន់រាជធានីបាងកក ឱ្យពង្រីកផ្លូវហោះហើររបស់ខ្លួនមកកាន់ព្រះរាជាណាចក្រកម្ពុជាផងដែរ» ។
ក្រៅពីកិច្ចប្រជុំទ្វេភាគីជាមួយប្រទេសម្ចាស់ផ្ទៈរៀបចំសន្និសីទ និងចូលរួមសន្និសីទ លោកបណ្ឌិត រដ្ឋមន្ត្រី ក៏បានជួបប្រជុំទ្វេភាគី ជាមួយបណ្តាប្រទេសមួយចំនួនថែមទៀត ដូចជា ចក្រភពអង់គ្លេស សហរដ្ឋអាមេរិក កាតា កូឡ៊ុំប៊ៀ ឈីលី បង់ក្លាដេស និងអូម៉ង់ ជាដើម ដើម្បីពង្រឹកកិច្ចសហប្រតិបត្តិការវិស័យអាកាសចរស៊ីវិល និងស្វែងរកលទ្ធភាពចុះហត្ថលេខាកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស។
សូមបញ្ជាក់ថា មកទល់ពេលបច្ចុប្បន្ននេះកម្ពុជា បានសម្រេចនូវការចុះហត្ថលេខាលើកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស ជាលក្ខណៈទ្វេភាគី បានចំនួន ៤៤ប្រទេស និងកិច្ចព្រមព្រៀងពហុភាគីអាស៊ានមួយចំនួនផងដែរ ដែលអាចជួយជុំរុញឱ្យមានកំណើនដឹកជញ្ជូនតាមផ្លូវអាកាសកាន់តែទូលំទូលាយថែមទៀត និងផ្តល់ភាពងាយស្រួលក្នុងការធ្វើដំណើរតាមផ្លូវអាកាសក្នុងតំបន់ និងអន្តរតំបន់ថែមទៀតផង៕ កែសម្រួលដោយ ៖ សុឃាក់
ចែករំលែកព័តមាននេះ