រាជធានីភ្នំពេញ ៖ ករណីសមត្ថកិច្ចមន្ទីរប្រឆាំងគ្រឿងញៀននៃអគ្គស្នងការនគរបាលជាតិ ដែលប្រដេញបង្ក្រាបជនសង្ស័យជាមុខសញ្ញាជួញដូរគ្រឿងញៀន ហើយជនសង្ស័យបានផ្ទុះអាវុធទៅលើសមត្ថកិច្ចបង្កឲ្យមានការភ្ញាក់ផ្អើលកាលពីយប់ថ្ងៃទី២៣ ខែធ្នូ ក្នុងរង្វង់កិច្ចប្រតិបត្តការសមត្តកិច្ចបានធ្វើការឃាត់ខ្លួនជនសង្ស័យ២នាក់ ប៉ុន្តែក្រោយពីបើកការសាកសួរមានម្នាក់មិនជាប់ពាក់ព័ន្ធនោះទេ ហើយបានអនុញ្ញាតឲ្យទៅផ្ទះវិញ និងម្នាក់ទៀតត្រូវបញ្ជូនទៅសាលាដំបូងរាជធានីភ្នំពេញ កាលពីព្រឹកថ្ងៃទី២៦ ខែធ្នូ នេះដើម្បីចាត់តាមផ្លូវច្បាប់ ។
ជនសង្ស័យម្នាក់ដែលសមត្ថកិច្ចបញ្ជូនទៅតុលាការនោះឈ្មោះ មាស សិលា ភេទប្រុស អាយុ២៧ឆ្នាំ រីឯឈ្មោះ គិត ម៉េងលី ភេទប្រុស អាយុ១៨ឆ្នាំ ជានិស្សិត បានអនុញ្ញាតឲ្យទៅផ្ទះហើយ ។
ទាក់ទិននឹងករណីខាងលើនេះ លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀនបានឲ្យដឹងថា កាលពីវេលាម៉ោង១០និង៣០នាទីយប់ថ្ងៃកើតហេតុលើនោះ កម្លាំងសមត្តកិច្ចការិយាល័យទី៦ នៃមន្ទីរប្រឆាំងគ្រឿងញៀន បានតាមប្រមាញ់មុខសញ្ញាជួញដូរគ្រឿងញៀនម្នាក់ឈ្មោះមាស សិលា ខណៈជនសង្ស័យកំពុងជិះម៉ូតូមកធ្វើសកម្មភាពនៅត្រង់ចំណុចមុខមន្ទីរពេទ្យព្រះកុសុមៈ តាមបណ្ដោយផ្លូវ២៧១ ស្ថិតក្នុងសង្កាត់ទឹកល្អក់ទី២ ខណ្ឌទួលគោក ។ ពេលនោះជនសង្ស័យដឹងខ្លួន រួចបានផ្ទុះអាវុធបាញ់មកលើសមត្ថកិច្ចចំនួន៤គ្រាប់ ហើយក៏រត់ទៅពួនសង្ងំក្នុងផ្ទះគ្មានលេខ នៅលើដីឡូតិ៍លេខ៩០ តាមបណ្ដោយផ្លូវ៣១៥ ក្រុមទី៣៣ ភូមិ៧ សង្កាត់បឹងកក់ទី២ ខណ្ឌទួលគោក ជាផ្ទះរបស់ឈ្មោះ គិត ម៉េងលី ដែលម្ចាស់ផ្ទះកំពុងសំងំដេកដោយមិនដឹងខ្លួន ។
លោក ឡឹក វណ្ណៈ បន្តថា ក្នុងរង្វង់ប្រតិបត្តិការភ្លាមៗ សមត្ថកិច្ចបានឃាត់ខ្លួនជនទាំងពីរយកទៅសាកសួរនៅអធិកាដ្ឋាននគរបាលខណ្ឌទួលគោក ក្រោយមកទើបដឹងថា យុវជនជាម្ចាស់ផ្ទះមិនជាប់ពាក់ព័ន្ធជាមួយជនសង្ស័យឈ្មោះ មាស សិលា ជាមុខសញ្ញាជួញដូរគ្រឿងញៀនដែលផ្ទុះអាវុធបានមកលើសមត្ថកិច្ចនោះទេ ទើបត្រូវអនុញ្ញាតឲ្យទៅផ្ទះវិញទៅ ។ ក្នុងប្រតិបត្តិការនោះទៀតសមត្ថកិច្ចបានធ្វើការដកហូតថ្នាំញៀនប្រភេទក្រាមសថ្លា ១កញ្ចប់ធំ កាំភ្លើងខ្លីមួយដើម ម៉ាក SIGSOWER P320 ពណ៌ខ្មៅ មានគ្រាប់ចំនួន៦គ្រាប់ និង ម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ ១GD-៤៧២៩ ។ ជនសង្ស័យម្នាក់ នឹងវត្ថុតាងត្រូវបានកម្លាំងសមត្ថកិច្ចបញ្ជូនទៅសាលាដំបូងរាជធានីភ្នំពេញហើយ ៕ (កែសម្រួលដោយ ៖ ធីតា)
ចែករំលែកព័តមាននេះ