រាជធានីភ្នំពេញ ៖ នារសៀលថ្ងៃទី២៤ ខែធ្នូ ឆ្នាំ២០១៩ កម្លាំងនគរបាលនាយកដ្ឋានប្រឆាំងការជួញដូរមនុស្សនិងការពារអនីតិជនក្រសួងមហាផ្ទៃ បានបញ្ជូនខ្លួនប្រធានក្រុមហ៊ុនមួយទៅសាលាដំបូងរាជធានីភ្នំពេញ ពាក់ព័ន្ធនឹងករណីឆបោកប្រាក់ពីការនាំពលករទៅធ្វើការនៅសាធារណរដ្ឋកូរ៉េ និងអារ៉ាប់អេមីរ៉េត។ ជននេះឈ្មោះ…
រាជធានីភ្នំពេញ ៖ នារសៀលថ្ងៃទី២៤ ខែធ្នូ ឆ្នាំ២០១៩ កម្លាំងនគរបាលនាយកដ្ឋានប្រឆាំងការជួញដូរមនុស្សនិងការពារអនីតិជនក្រសួងមហាផ្ទៃ បានបញ្ជូនខ្លួនប្រធានក្រុមហ៊ុនមួយទៅសាលាដំបូងរាជធានីភ្នំពេញ ពាក់ព័ន្ធនឹងករណីឆបោកប្រាក់ពីការនាំពលករទៅធ្វើការនៅសាធារណរដ្ឋកូរ៉េ និងអារ៉ាប់អេមីរ៉េត។
ជននេះឈ្មោះ ប៉ែន សុខ ភេទប្រុស អាយុ៣៥ឆ្នាំ ជាគ្រូបង្រៀនផង និងជាប្រធានក្រុមហ៊ុនផង មានទីលំនៅផ្ទះលេខD២២ ផ្លូវបេតុង ភូមិក្បាលដំរី សង្កាត់កាកាបទី២ ខណ្ឌពោធិ៍សែនជ័យ ។ តាមមន្ត្រីសមត្ថកិច្ចបានបង្ហើបឲ្យដឹងថា កាលពីអំឡុងខែឧសភា ឆ្នាំ២០១៩ មានប្រជាពលរដ្ឋចំនួន៥៣នាក់មកពីខេត្តព្រៃវែង តាកែវ ពោធិ៍សាត់ ស្វាយរៀង កំពង់ចាម បន្ទាយមានជ័យ កំពង់ឆ្នាំង កំពង់ធំ និងរាជធានីភ្នំពេញ បានដាក់ពាក្យបណ្តឹងទៅនាយកដ្ឋាននគរបាលប្រឆាំងការជួញដូរមនុស្សនិងការពារអនីតិជន ដោយចោទប្រកាន់មណ្ឌលបណ្តុះបណ្តាលភាសាកូរ៉េចំនួន៤ ដែលបានជ្រើសរើសនិងនាំពលករទៅធ្វើការនៅកូរ៉េខាងត្បូង និងអារ៉ាប់អេមីរ៉េតដោយខុសច្បាប់ ។
ទោះជាយ៉ាងណា មណ្ឌលបណ្តុះបណ្តាលភាសាកូរ៉េទាំង៤នេះ មានមណ្ឌលមួយឈ្មោះ មណ្ឌលបណ្តុះបណ្តាលភាសាកូរ៉េសាំសុ៊ង ដែលមានឈ្មោះ ប៉ែន សុខ ជាប្រធាន និងត្រូវបានចាប់ឃាត់ខ្លួននេះ ឯមណ្ឌលបណ្តុះបណ្តាលភាសាកូរ៉េចំនួន៣ទៀត មិនទាន់ត្រូវបានសមត្ថកិច្ចប្រាប់ឈ្មោះឲ្យដឹងទេ ។
ក្នុងពាក្យបណ្តឹងបានរៀបរាប់ថា ក្រោយពេលជ្រើសរើសបានពលករហើយ នាយកនិងប្រធានគ្រប់គ្រងមណ្ឌលទាំង៤ បានយកប្រាក់ពីប្រជាពលរដ្ឋក្នុងម្នាក់ពី១.៥០០ទៅ៣.០០០ដុល្លារអាមេរិក ក្នុងនោះមានមួយចំនួនបានបញ្ជូនទៅដល់ប្រទេសកូរ៉េខាងត្បូង និងប្រទេសអារ៉ាប់អេមីរ៉េតរួចហើយ និងមួយចំនួនទៀតត្រៀមបញ្ជូនចេញ។
ដោយសារការបើកមណ្ឌលបណ្តុះបណ្តាលនេះពុំមានច្បាប់អនុញ្ញាតិក្រសួងការងារនិងបណ្តុះបណ្តាលវិជ្ជាជីវៈ ហើយថែមទាំងត្រូវថៅកែកេងប្រវ័ញ្ចប្រាក់ឈ្នួលទៀតនោះ ទើបក្រុមពលករទាំងនោះទាមទារមកកម្ពុជាវិញ និងដាក់ពាក្យប្តឹងក្រុមហ៊ុនដែលជាមណ្ឌលបណ្តុះបណ្តាលទាំង៤ខាងលើ ។
ក្រោយពីទទួលបានពាក្យបណ្តឹងនេះ ទើបសមត្ថកិច្ចឃាត់ខ្លួនបានម្នាក់គឺឈ្មោះ ប៉ែន សុខនេះ ឯ៤ទៅ៥នាក់ទៀតកំពុងគេចខ្លួន ។ ជនសង្ស័យរងនូវពាក្យបណ្តឹងរបស់ជនរងគ្រោះចំនួន៥៣នាក់ក្នុងទំហំទឹកប្រាក់ប្រមាណ១៦មុឺនដុល្លារសហរដ្ឋអាមេរិក ក្នុងរូបភាពអូសទាញជ្រើសរើសពលករនាំទៅ ធ្វើការនៅសាធារណរដ្ឋកូរ៉េ និងអារ៉ាប់អេមីរ៉េត ៕
ចែករំលែកព័តមាននេះ