ខេត្តបាត់ដំបង ៖ យោងតាមប្រភពព័ត៌មានបានឲ្យដឹងថា ក្រុមពលរដ្ឋដែលចាញ់បោកមេតុងទីននៅឃុំស្នឹងប្រមាណជាង១០០នាក់ បាននិងកំពុងនាំគ្នាឡោមព័ទ្ធរថយន្តរបស់កូនប្រសាប្រុសមេតុងទីន ដែលជិះក្នុងរថយន្តនោះ ចាប់តាំងពីវេលាម៉ោង២រសៀលថ្ងៃទី២៥ ធ្នូ បន្ទាប់ពីកូនប្រសារមេតុងទីនកំហូចនេះ បង្ហាញខ្លួនជាមួយរថយន្តទំនើប នៅក្នុងបរិវេណសាលាបឋមសិក្សាស្នឹង ដែលស្ថិតនៅក្នុងឃុំស្នឹង ស្រុកបាណន់ ហើយគិតត្រិមម៉ោងជិត៨យប់ទៅហើយ ជននោះកំពុងស្ថិតនៅក្នុងការឡោមព័ទ្ធនៅឡើយដោយសារតែគ្មានដំណោះស្រាយ បើទោះជាកម្លាំងសមត្ថកិច្ចកំពុងការពារនិងព្យាយាមជួយរកដំណោះស្រាយក្ដី។
ពលរដ្ឋម្នាក់ដែលកំពុងស្ថិតនៅទីនោះបានប្រាប់ថា ជនដែលពលរដ្ឋកំពុងឡោមព័ទ្ធជាមួយនឹងរថយន្ត១គ្រឿងនោះ ឈ្មោះយៀង ចាន់ ភេទប្រុស អាយុ៣២ឆ្នាំ ជាកូនប្រសារមេតុងទីនឈ្មោះណែម ផល ស្រីអាយុ៤៨ឆ្នាំ ស្វាមីរបស់គាត់ឈ្មោះរស់ បូរិន មានមុខរបជាគ្រូបង្រៀន និងរស់នៅភូមិស្នឹងកើត ឃុំស្នឹង ស្រុកបាណន់ ។
ប្រភពដដែលបាននិយាយថា ក្រុមគ្រួសារនេះជាមេតុងទីនដ៏ធំប្រចាំឃុំស្នឹង ដែលម្ដាយក្មេងរបស់ជននេះ មានឈ្មោះណែម ផល ជាអ្នកឈរឈ្មោះលេងមេតុងទីននេះ ជាមួយកូនតុងទីនសរុបប្រមាណជាង២០០នាក់។ ប៉ុន្តែសមាជិកនៅក្នុងគ្រួសារនេះទាំងអស់ រាប់ទាំងកូនប្រសារឈ្មោះយៀង ចាន់ ដែលពលរដ្ឋកំពុងឡោមព័ទ្ធនេះផង សុទ្ធតែជាអ្នកទទួលលុយពីកូនៗតុងទីនរាល់ខែ ។
ជាមួយនឹងការប្រមូលលុយពីកូនៗតុងទីនម្នាក់ៗរាប់សិបលានរៀលជារៀងរាល់ខែ មេតុងទីនទាំងគ្រួសារនេះ បានប្រើកលល្បិចគ្រប់បែបយ៉ាងមិនឲ្យកូនៗដេញយកលុយទេ។ លុះមួយរយៈចុងក្រោយ ស្រាប់តែគ្រួសារនេះបានចាប់ផ្ដើមប្រើល្បិចខូច លួចជន្លៀមក្រុមគ្រួសារចេញពីផ្ទះ ស្ពាយលុយរាប់រយលានរៀលរត់ចោលស្រុកតែម្ដង ។ ប៉ុន្តែក្រោយពីដឹងល្បិចកលនេះ ពលរដ្ឋដែលដឹងខ្លួនថា ចាញ់បោកមេតុងទីននេះ ប្រមូលគ្នាបានប្រហែងជាង១០០នាក់ផ្ដិតមេដៃប្ដឹងសុំឱ្យសមត្ថកិច្ចកងរាជអាវុធហត្ថខេត្តជួយអន្តរាគមន៍ រហូតឈានដល់ការជ៊ឃាត់ខ្លួនប្ដីមេតុងទីនឈ្មោះរស់ បូរិន កាលពីប៉ុន្មានសប្ដាហ៍មុនបញ្ជូនទៅតុលាការ តែត្រូវតុលាការដោះលេងវិញ ទាំងគ្មានដំណោះស្រាយដែលធ្វើឱ្យអ្នកចាញ់បោករាប់រយនាក់ឈឺចាប់យ៉ាងខ្លាំង ។
បើតាមអ្នកលេងតុងទីនបានប្រាប់ថា ក្រុមគ្រួសារមេតុងទីនឈ្មោះណែម ផល នេះបានវេចលុយជាង៧០០លានរៀលរត់ចោលស្រុក។ ហើយនេះ គ្រាន់តែជាចំនួនលុយរបស់កូនៗតុងទីនត្រឹមជាង១០០នាក់ដែលបានផ្តិតមេដៃប្ដឹងទៅសមត្ថកិច្ច តែនៅមានលុយរាប់រយលានរៀលរបស់កូនៗរាប់សិបនាក់ទៀតដែលមិនបានប្ដឹង ព្រោះពួកគេមិនបានដឹងពីល្បិចបោកប្រាសរបស់គ្រួសារមេតុងទីននេះ។ អ្នកចាញ់បោកទាំងនោះបានបញ្ជាក់ថា ក្រោយពីនាំគ្នាស្ពាយលុយរត់ចោលស្រុក ក្រុមគ្រួសារនេះបានទៅសម្ងំលាក់ខ្លួននៅភ្នំពេញ។ ប៉ុន្តែនៅរសៀលថ្ងៃទី២៥ ធ្នូ ស្រាប់តែគេឃើញកូនប្រសារមេតុងទីននេះ ឈ្មោះយៀង ចាន់ ជិះរថយន្តទំនើបចូលក្នុងសាលាបឋមសិក្សាស្នឹង ទើបអ្នកលេងតុងទីនរាប់រយនាក់បានទាក់ទងគ្នាទៅព័ទ្ធកូនប្រសារមេតុងទីនទាំងមនុស្សទាំងរថយន្តតែម្ដង ដើម្បសួរនាំរឿងបោកលុយតុងទីនរាប់រយលានរៀលនេះ ។
ប្រភពដដែលបានប្រាប់ថា កូនប្រសារមេតុងទីន ឈ្មោះយៀង ចាន់ នេះជិះរថយន្តម៉ាកឡិចស៊ីស៤៧០ ពណ៌ខ្មៅ ពាក់ស្លាកលេខ បាត់ដំបង2A-6979 ។ បើតាមព័ត៌មានបឋមពីសមត្ថកិច្ចបានឱ្យដឹងដែរថា កូនប្រសារមេតុងទីន ឈ្មោះយៀង ចាន់ នេះបានឆ្មក់ចូលទៅក្នុងសាលាបឋមសិក្សាស្នឹង ក្នុងគោលបំណងទៅទំនាក់ទំនងនាយកសាលា ដើម្បីសុំប្ដូរឈ្មោះឪពុកក្មេកខ្លួន ឈ្មោះរស់ បូរិន ចេញពីបឋមសិក្សាស្នឹងនេះទៅបង្រៀននៅកន្លែងផ្សេង។ ប៉ុន្តែគ្រានោះ ត្រូវកូនៗតុងទីនដឹងថា ជននេះបង្ហាញមុខនៅសាលានោះ ក៏ប្រគោកប្រកាសហៅគ្នាទៅឡោមព័ទ្ធទាំងមនុស្សទាំងរថយន្តជាប់នៅទីនោះតែម្ដង។
ពាក់ព័ន្ធនឹងករណីអ្នកចាញ់បោកមេតុងទីន ឃាត់ខ្លួនកូនប្រសារមេតុងទីនេះនេះ បើតាមក្រុមអ្នកចាញ់តុងទីនបានបញ្ជាក់ថា ដោយសារតែឈ្មោះយៀង ចាន់ នេះជាមេគំនិតរៀបចំផែនការឱ្យមានការបោកប្រាសលុយនេះ ហើយជននេះក៏ជាអ្នកទទូលលុយពីកូនៗឡើងតុងទីនរៀងរាល់ខែដែរ។ ដូច្នេះជននេះក៏ត្រូវទទូលខុសត្រូវដែរ ។
ទោះយ៉ាងណា បើតាមប្រភពចុងក្រោយបានឲ្យដឹងថា ពេលនេះសមត្ថកិច្ចកំពុងចុះទៅអន្តរាគមន៍នៅទីនោះ ដើម្បីការពារក្រែងមានអំពើហិង្សាកើតឡើង ហើយក៏កំពុងព្យាយាមជួយរកដំណោះស្រាយផងដែរ។ ប៉ុន្តែហាក់មិនទាន់រកច្រកចេញរួចនៅឡើយទេ ខណ:ក្រុមអ្នកចាញ់បោកតុងទីនប្រមូលគ្នាកាន់តែច្រើនទៅឡោមព័ទ្ធកូនប្រសារមេតុងទីនជាមួយនឹងតថយន្ត៕
ចែករំលែកព័តមាននេះ