លោក Jack Ma និយាយថា ឆ្នាំនេះជាឆ្នាំមិនល្អឡើយសម្រាប់អាជីវករ
លោកមហាសេដ្ឋី ជេក ម៉ា (Jack Ma) ដែលជាស្ថាបនិកក្រុមហ៊ុន Alibaba បាននិយាយក្នុងពេលថ្មីៗនេះថា ឆ្នាំនេះជាឆ្នាំមិនល្អទេសម្រាប់សហគ្រិន ឬអាជីវករចិន…
លោកមហាសេដ្ឋី ជេក ម៉ា (Jack Ma) ដែលជាស្ថាបនិកក្រុមហ៊ុន Alibaba បាននិយាយក្នុងពេលថ្មីៗនេះថា ឆ្នាំនេះជាឆ្នាំមិនល្អទេសម្រាប់សហគ្រិន ឬអាជីវករចិន ប៉ុន្តែទុក្ខលំបាកដែលពួកគេកំពុងជួបប្រទះនឹងមិនមានទីបញ្ចប់ក្នុងពេលឆាប់ៗឡើយ។ ប៉ុន្តែលោកបានជំរុញដល់សហគ្រិនទាំងអស់ឲ្យរក្សាភាពជឿជាក់ និងសម្របខ្លួនទៅតាមការផ្លាស់ប្តូរផ្សេងៗជុំវិញពិភពលោក និងក្នុងសេដ្ឋកិច្ចចិនផងដែរ។
លោកបាននិយាយថា «វាដល់ពេលចុងឆ្នាំហើយ កាលពីម្សិលមិញខ្ញុំបានទទួលទូរស័ព្ទពីមិត្តភក្តិជាច្រើនដែលសុំខ្ចីលុយ… ខ្ញុំទទួលទូរស័ព្ទបែបនេះប្រមាណ ៥ដងក្នុងមួយថ្ងៃឯណោះ។ កាលពីសប្តាហ៍មុននេះ មិត្តចំនួន ១០នាក់ព្យាយាមលក់អចលនទ្រព្យពួកគេឲ្យមកខ្ញុំ ពួកគេកំពុងតែជួបទុក្ខលំបាកយ៉ាងខ្លាំង»។
លោកម៉ាមិនបាននិយាយលម្អិតបន្ថែមទេ ប៉ុន្តែប្រសាសន៍ និងការជំរុញរបស់លោកបានបង្ហាញពីភាពប្រុងប្រយ័ត្នក្នុងចំណោមអាជីវកម្មចិនជាពិសេសអាជីវកម្មឯកជនទាក់ទិននឹងទស្សនៈវិស័យ និងការលូតលាស់សេដ្ឋកិច្ចដែលកំពុងតែអន់ថយ ព្រមទាំងបំណុល និងភាពតានតឹងរវាងប្រទេសចិននិងប្រទេសដទៃជុំវិញពិភពលោកជាដើម។
អាជីវកម្មចិនកំពុងតែជួបប្រទះទុក្ខលំបាកព្រោះតែបញ្ហាឥណទានដែលកាន់តែមានភាពត្បិតត្បៀតក្នុងប្រទេស។ សហគ្រិន ជូ សៀវគ័ង (Zhou Xiaoguang) ដែលបានបង្កើតក្រុមហ៊ុនលក់គ្រឿងអលង្ការធំជាងគេលើលោក NeoGlory បានប្រកាសក្ស័យធនក្នុងឆ្នាំនេះ។ យិន មីងសាន (Yin Mingshan) របស់ក្រុមហ៊ុន Lifan Group ក៏កំពុងជាប់ក្នុងបំណុលដែរ។
លោក ម៉ា បានចែករំលែកទៀតថា គំរូពាណិជ្ជកម្មពិភពលោកកំពុងតែមានការផ្លាស់ប្តូរ ហើយកិច្ចព្រមព្រៀងពាណិជ្ជកម្មថ្មីរវាងប្រទេសចិននិងសហរដ្ឋអាមេរិកអាចនឹងបង្កើតជំនាញថ្មីសម្រាប់ការធ្វើពាណិជ្ជកម្មអន្តរជាតិ។ លោកបានបន្តថា កិច្ចព្រមព្រៀងនេះមិនត្រឹមតែជះឥទ្ធិពលដល់ប្រទេសចិននិងសហរដ្ឋអាមេរិកទេ តែក៏ដល់ប្រទេសដទៃដែរ៕ កែសម្រួលដោយ ៖ សុឃាក់
ចែករំលែកព័តមាននេះ