រាជធានីភ្នំពេញ ៖ ស្របពេលសហគ្រាសក្នុងស្រុកមានការកែច្នៃនិងមានលទ្ធភាពក្នុងការផលិតផលនូវផលិតផលក្នុងស្រុកមានចំនួនកាន់តែច្រើនពីមួយឆ្នាំទៅមួយឆ្នាំ ប្រមុខរាជរដ្ឋាភិបាលកម្ពុជាបានស្នើឱ្យប្រទេសដៃគូវៀតណាមបង្កើនការទិញទំនិញពីកម្ពុជាបន្ថែមទៀតនៅពេលបច្ចុប្បន្ននិងអនាគត ។ នេះជាការលើកឡើងរបស់សម្តេច តេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី ២៤ ខែធ្នូ ឆ្នាំ២០១៩ នាឱកាសពិធីបើកសម្ពោធផ្សារគំរូព្រំដែន កម្ពុជា-វៀតណាម នៅខេត្តត្បូងឃ្មុំ។
សម្តេចតេជោ បានមានប្រសាសន៍ថា «ខ្ញុំសូមស្នើឱ្យវៀតណាមយកចិត្តទុកដាក់មើលការទិញនូវទំនិញមួយចំនួនផ្សេងទៀតរបស់កម្ពុជាដែលកម្ពុជាមាន ។ ផលិតផលខ្មែរដែលពីមុនបានដាក់តាំងពិព័រណ៍នៅទីក្រុងភ្នំពេញមានច្រើន បន្ថែមនូវផលិតផលខ្មែរតាំងបង្ហាញនៅបុណ្យសមុទ្រនៅខេត្តកំពត»។ សម្តេចតេជោ បានលើកឡើងបន្ថែមទៀតថា សម្តេចសង្ឃឹមថាទំនិញទាំងអស់នោះនឹងហូរចូលទៅក្នុងប្រទេសវៀតណាម ព្រោះការដោះដូរទំនិញជាទូទៅត្រូវតែមានទៅមានមក ប៉ុន្តែការមានទៅមានមកក៏ត្រូវស្របនិងតម្រូវការនៅក្នុងប្រទេសរៀងៗខ្លួន ។ ដូច្នេះកម្ពុជានាំចូលមុខទំនិញពីវៀតណាមនូវមុខទំនិញដែលកម្ពុជាត្រូវការ មិនអាចនាំចូលទំនិញខុសពីតម្រូវការរបស់ខ្លួននោះទេ។ ជាមួយគ្នានោះផងដែរ «ស្វាយប្រទេសកម្ពុជាបាននាំចូលទៅប្រទេសវៀតណាម ព្រោះស្វាយវៀតណាមផ្គត់ផ្គង់មិនគ្រប់គ្រាន់នៅក្នុងប្រទេសវៀតណាម ។ ដូច្នេះខ្ញុំសង្ឃឹមថាផ្លែស្វាយរបស់
កម្ពុជា ផ្លែចេករបស់កម្ពុជា រួមនិងផលិតផលរបស់កម្ពុជា ដូចជាធុរេនអាចនឹងផ្គត់ផ្គង់ទៅកាន់ទីផ្សារវៀតណាមផងដែរ» ។
ទន្ទឹមនឹងប្រមុខរដ្ឋាភិបាលកម្ពុជាស្នើប្រទេសដៃគូវៀតណាមបង្កើនការទិញផលិត
ផលក្នុងស្រុក កម្ពុជាបាននឹងកំពុងបង្កើតផ្សារគំរូនៅតាមព្រំដែនហើយផ្សារគំរូដំបូងមួយនេះអាចឱ្យប្រជាកសិករកម្ពុជាកាន់តែខិតខំកែច្នៃផលិតផលរបស់ខ្លួនបានកាន់តែច្រើនលក់ចេញទៅប្រទេសវៀតណាម។
សម្តេចតេជោ ហ៊ុនសែន មានប្រសាសន៍ថា «ផ្សារនេះមិនមែនជាទីផ្សារដែលគ្រាន់តែទិញទំនិញពីវៀតណាមទេ ក៏ប៉ុន្តែគឺជាទីផ្សារដែលកម្ពុជាត្រូវខិខំដើម្បីកែច្នៃផលិតផលរបស់ខ្លួនដើម្បីលក់ចេញទៅកាន់ប្រទេសវៀតណាមដែលជាទីផ្សារមួយដែលយើងត្រូវគិតគូជាអាទិភាពនៅក្នុងការផ្តល់នូវអត្ថប្រយោជន៍សម្រាប់ប្រជាពលរដ្ឋរបស់យើង»។
យោងតាមរបាយការណ៍រដ្ឋមន្ត្រីក្រសួងពាណិជ្ជកម្មនិងឧស្សាហកម្មវៀតណាមសម្តេចតេជោ លើកឡើងថា «ទំហំពាណិជ្ជកម្មរួមនៃប្រទេសទាំងពីរកម្ពុជា វៀតណាមមានត្រឹម៤.៧០០លានដុល្លារអាមេរិកនិងបានកើនឡើង១១% នៅក្នុងគោលដៅនោះយើងត្រូវសម្រេចនូវទំហំពាណិជ្ជកម្មរួមនៃប្រទេសទាំងពីរឱ្យកើនដល់៥.០០០លានដុល្លារអាមរិកនិងលើសពីនេះទៅទៀត»។
សូមរម្លឹកថាថ្នាក់ដឹកនាំប្រទេសកម្ពុជាបាននឹងកំពុងបន្តជំរុញតទៅទៀត នូវការធ្វើពាណិជ្ជកម្មទ្វេភាគីជាមួយប្រទេសជិតខាង ដូចជា វៀតណាម ឡាវ និងថៃ ព្រោះព្រំដែននឹងក្លាយជាកន្លែងសន្តិភាព មិត្តភាព សហប្រតិបត្តិការ និងការអភិវឌ្ឍរួចទៅហើយ ហើយរដ្ឋាភិបាលកម្ពុជាធ្លាប់អះអាងថានឹងធ្វើការចរចារជាមួយនឹងឡាវ ថៃ និងវៀតណាម ដើម្បីបើកច្រកថ្មីៗបន្ថែមទៀត ជំរុញឲ្យមានទំនាក់ទំនងទ្វេភាគី ផ្នែកសេដ្ឋកិច្ចពាណិជ្ជកម្ម ជាមួយប្រទេសជិតខាង ឲ្យកាន់តែប្រសើរឡើងថែមទៀត។
បើយោងតាមរបាយការណ៍ពីរាជរដ្ឋាភិបាលបានឲ្យដឹងថា កាលពីឆ្នាំ ២០១៨ ទំហំពាណិជ្ជកម្មទ្វេភាគីរវាងកម្ពុជា-ថៃ បានកើនឡើងរហូតដល់ជាង ៧ពាន់លានដុល្លារអាមេរិក ហើយគ្រោងបង្កើនទំហំពាណិជ្ជកម្ម ឱ្យបានដល់ ១៥ពាន់លានដុល្លារអាមេរិក នៅឆ្នាំ ២០២០។ ជាមួយគ្នានោះផងដែរ ទំហំពាណិជ្ជកម្មរវាង កម្ពុជា និងឡាវ គឺមានត្រឹមតែ ២៤ លានដុល្លារអាមេរិក នៅឆ្នាំ២០១៨ ធៀបឆ្នាំ២០១៧ មានតែត្រឹម ១០លានដុល្លារអាមេរិកប៉ុណ្ណោះ៕ កែសម្រួលដោយ ៖ សុឃាក់
ចែករំលែកព័តមាននេះ