នេះជាលើកដំបូងដែលពួកបះបោរស៊ុននីត កាលពីថ្ងៃទី១០ មិថុនា វាយដណ្តើមកាន់កាប់ខេត្តមួយទាំងស្រុង គឺខេត្តនីនីវ ពិសេសក្រុងម៉ូសស៊ូល ទីប្រជុំជនខេត្តនោះដែលជាទីក្រុងធំទី២ របស់ប្រទេស រួចក៏ជាតំបន់សម្បូរដោយអណ្តូងប្រេងកាតផងដែរ ។ក្រៅពីដណ្តើមកាន់កាប់ខេត្តនេះទាំងស្រុង ពួកឧទ្ទាមប្រដាប់អាវុធដណ្តើមត្រួតត្រាទីក្រុងកាន់តែច្រើននៃខេត្តសម្បូរប្រេងគៀរគុកមួយទៀតនាថ្ងៃទី១០ មិថុនានោះដែរ ក្រោយពី ដណ្តើមកាន់កាប់ក្រុងម៉ូសស៊ូលមក ។
ពួកជនប្រដាប់អាវុធជាច្រើនរយនាក់បានធ្វើការវាយលុកលើទីក្រុង HAWIJAH ក្រុង ZAB ក្រុង RIYADH ក្រុង ABBASI និងក្រុង RASHAD នាភាគខាងត្បូង និងភាគខាងកើតក្រុងគៀរគុក ស្ថិតនៅចម្ងាយប្រមាណជា២៥០គីឡូម៉ែត្រខាងជើងក្រុងបាដាដ ។ ពួកបះបោរដណ្តើមកាន់កាប់ទីក្រុងទាំងនោះដោយពុំមានការតតាំងរបស់កងកម្លាំងសន្តិសុខអុីរ៉ាក់ដោយកងទាហាន និងកងប៉ូលិសបានដកថយមុនពេលពួកឧទ្ទាមលើកមកដល់ ។
ការវាយប្រហារវាតទីរបស់ពួកបះបោរនោះជាអន្លូងយ៉ាងធ្ងន់មួយចំពោះរដ្ឋាភិបាលអុីរ៉ាក់ ។ ពួកជីហាដនិយមពិសេសប្រហែលស្ថិតក្នុងចលនារ៉ាឌីកាល់បំផុត គឺចលនារដ្ឋអ៊ិស្លាមនៅអុីរ៉ាក់ និង LEVANT (EIIL) ពេលនេះបានត្រួតត្រាក្រុងមូ៉សស៊ូលមានប្រជាជនដល់ទៅ២លាននាក់ទាំងស្រុង ។
ក្រៅពីការរុលទៅមុខនេះ ពួកបះបោរបានវាយប្រហារនៅទីក្រុងបាគូបា ចម្ងាយ៦០គីឡូម៉ែត្រខាងជើងក្រុងបាដាដ ដែលនៅទីនោះមនុស្សប្រមាណជា២០នាក់ស្លាប់ក្នុងការវាយប្រហារដោយគ្រឿងផ្ទុះសំដៅលើពិធីបុណ្យសពមួយ ។ ពួកបះបោរក៏កាន់កាប់ចាប់តាំងពីជាង៥ខែមកហើយនូវទីក្រុងហ្វាល់លូចា មានប្រជាជន៣២០.០០០នាក់ ព្រមទាំងសង្កាត់ជាច្រើន និងសាកលវិទ្យាល័យក្រុងរ៉ាម៉ាឌី ទីប្រជុំជនខេត្តអានបា ព្រមទាំងកាន់កាប់ស្រុកទាំងឡាយនៃខេត្តសាឡាហុីនឌីន និងខេត្តឌីយ៉ាឡា ។ ពួកជីហាដនិយម ក៏លុកលុយផងដែរចូលសង្កាត់ស៊ុតនីតទាំងឡាយនៅភាគខាងជើងក្រុងបាដាដ។
នាយករដ្ឋមន្ត្រីអុីរ៉ាក់ ប្រកាសអាសន្នពេញបន្ទុក
នាយករដ្ឋមន្ត្រីអុីរ៉ាក់ លោកនូនីរីអាល់ម៉ាលីគី កាលពីថ្ងៃទី១០ មិថុនា បានប្រកាសអាសន្នពេញបន្ទុកក្នុងប្រទេស ហើយអំពាវនាវឱ្យសភាបើកកិច្ចប្រជុំបន្ទាន់មួយដើម្បីចេញការប្រកាសសំដៅប្រឆាំងនឹងបណ្តាក្រុមភេរវកម្ម ។ក្នុងសេចក្តីប្រកាសមួយតាមទូរទស្សន៍ជាតិ លោកម៉ាលីគី ថ្លែងថា គណៈរដ្ឋមន្ត្រីប្រកាសអាសន្នពេញបន្ទុក ហើយប្រមូលរាល់សក្តានុពលដើម្បីប្រឈមមុខទល់នឹងបណ្តាបញ្ហាបច្ចុប្បន្ន ។ លោកពន្យល់ថា សភាពការណ៍ពិតជាធ្ងន់ធ្ងរបំផុតក្នុងប្រទេស ដែលតម្រូវឱ្យគណៈរដ្ឋមន្ត្រី និងវិមានប្រធានាធិបតីស្នើដល់សភាឱ្យចេញការប្រកាសអាសន្ន និងការកេណ្ឌកងទ័ពជាទូទៅ។
លោកម៉ាលីគី ក៏អំពាវនាវផងដែរដល់បណ្តាអង្គការអន្តរជាតិ ក្នុងនោះមានអ.ស.ប សម្ព័ន្ធអារ៉ាប់ សហភាពអឺរុ៉បជាដើមឱ្យជួយទ្រទ្រង់ដល់អីុរ៉ាក់ និងជំហររបស់ខ្លួនប្រឆាំងពួកភេរវករ ។ ម្យ៉ាងវិញទៀត លោកក៏ស្នើផងដែរដល់បណ្តាប្រទេសជិតខាងឱ្យត្រួតពិនិត្យព្រំដែនរបស់ពួកគេ ហើយរារាំងកុំឱ្យពួកភេរវករជ្រៀតចូលក្នុងប្រទេសអុីរ៉ាក់ ។
អាមេរិកព្រមានថា ពួកជីហាដអុីរ៉ាក់គំរាមតំបន់ទាំងមូល
សហរដ្ឋអាមេរិក កាលពីថ្ងៃទី១០ មិថុនា វាយតម្លៃថា ពួកជីហាដនិយមនៃក្រុម EIIL ដែលដណ្តើមកាន់កាប់ខេត្តនីនីវ និងក្រុងម៉ូសស៊ូល ទីប្រជុំជនខេត្តនេះនៅភាគខាងជើងអុីរ៉ាក់ បានគំរាមកំហែងតំបន់ទាំងមូល ។ ក្នុងសេចក្តីប្រកាសមួយ អ្នកនាំពាក្យក្រសួងការបរទេសអាមេរិក លោកស្រី JENNIFER PSAKI ថ្លែងថា ក្រុងវ៉ាស៊ីនតោនគាំទ្រចំពោះចម្លើយតបខ្លាំងមួយដើម្បីរុញច្រានការលុកទន្ទ្រាននេះ ។ សហរដ្ឋអាមេរិកឈរនៅខាងប្រជាជនអុីរ៉ាក់ ប្រជាជនខេត្តនីនីវ និងអានបា ដែលកំពុងប្រឈមមុខនឹងការគំរាមកំហែងនោះ។ យើងនឹងបន្តធ្វើការយ៉ាងជិតស្និទ្ធជាមួយបណ្តាអ្នកទទួលខុសត្រូវនយោបាយ និងសន្តិសុខអុីរ៉ាក់ ដើម្បីរកមធ្យោបាយជាសាកលកាត់បន្ថយសមត្ថភាពរបស់ពួក EIIL នៅអុីរ៉ាក់ ។
ចំណែកមន្ទីរប៉ង់តាហ្គោនវិញ អះអាងថា បានតាមដានយ៉ាងប្រកិតចំពោះការវិវត្តនៃសភាពការណ៍ តែដោយបដិសេធរាល់សកម្មភាពយោធាអាមេរិក ។ រីឯអគ្គលេខាធិការ អ.ស.ប លោកបាន គីមូន មានប្រសាសន៍ថា លោកមានការព្រួយបារម្ភខ្លាំងបំផុតចំពោះការស្រុតចុះដុនដាបនៃសភាពការណ៍នៅអុីរ៉ាក់ ៕
ចែករំលែកព័តមាននេះ